Allu Arjun: ಪುಷ್ಪಾ 2 ಒಟಿಟಿ ರೈಟ್ಸ್​ಗಾಗಿ ಈಗಲೇ ಪೈಪೋಟಿ! ಡೀಲ್ ಮೊತ್ತ ಕೇಳಿದ್ರೆ ಶಾಕ್ ಆಗ್ತೀರಿ

ಪುಷ್ಪ ಚಿತ್ರದ ನಂತರ ಅಲ್ಲು ಅರ್ಜುನ್ ಸದ್ಯ ಪುಷ್ಪ 2 ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಭಾರೀ ನಿರೀಕ್ಷೆಗಳ ನಡುವೆ ಮೂಡಿಬರುತ್ತಿರುವ ಈ ಚಿತ್ರ ಸದ್ಯ ಶೂಟಿಂಗ್ ಹಂತದಲ್ಲಿದೆ. ಸುಕುಮಾರ್ ಅವರು ಬಹಳ ಮಹತ್ವಾಕಾಂಕ್ಷೆಯಿಂದ ಸಿನಿಮಾ ಮಾಡುತ್ತಿದ್ದಾರೆ. ನಾಯಕಿಯಾಗಿ ರಶ್ಮಿಕಾ ಮಂದಣ್ಣ ನಟಿಸುತ್ತಿದ್ದಾರೆ.

ಈ ಸಿನಿಮಾದ ಬಗ್ಗೆ ಕುತೂಹಲಕಾರಿ ವದಂತಿಯೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಪುಷ್ಪ ದಿ ರೂಲ್ ಚಿತ್ರದ ಎಲ್ಲಾ ಭಾಷೆಯ ಹಕ್ಕುಗಳು ಹಾಗೂ ಡಿಜಿಟಲ್ ಮತ್ತು ಸ್ಯಾಟಲೈಟ್ ರೈಟ್ಸ್​ಗಳಿಗೆ ಬೃಹತ್ ಕಂಪನಿಯಿಂದ 900 ಕೋಟಿ ರೂಪಾಯಿಗಳ ಆಫರ್ ಬಂದಿದೆ ಎಂದು ಹೇಳಲಾಗಿದೆ. 250 ಕೋಟಿಯಲ್ಲಿ ಪುಷ್ಪ ದಿ ರೂಲ್ ಚಿತ್ರ ತಯಾರಾಗಲಿದೆ.

ಅಲ್ಲು ಅರ್ಜುನ್ ಹುಟ್ಟುಹಬ್ಬದ ಸಂದರ್ಭದಲ್ಲಿ ಚಿತ್ರತಂಡ ಏಪ್ರಿಲ್ 8 ರಂದು ಚಿತ್ರದ ಒಂದು ನೋಟವನ್ನು ಬಿಡುಗಡೆ ಮಾಡಲಿದೆ ಎನ್ನಲಾಗಿದೆ. ಪುಷ್ಪ ದಿ ರೂಲ್ ಎಂಬ ಶೀರ್ಷಿಕೆಯ ಈ ಸಿನಿಮಾದಿಂದ ಕ್ರೇಜಿ ಅಪ್ಡೇಟ್ ಕೂಡಾ ಬರಲಿದೆಯಂತೆ.

ಹೊಸ ಅಪ್ಡೇಟ್ ಕೊಡಲು ಸುಕುಮಾರ್ ಈ ಗ್ಲಿಂಪ್ಸ್‌ಗಳಿಗಾಗಿ ಕೆಲವು ಶಾಟ್‌ಗಳನ್ನು ಶೂಟ್ ಮಾಡುತ್ತಿದ್ದಾರೆ. ಮೊನ್ನೆ ಮೊನ್ನೆಯವರೆಗೂ ವೈಜಾಗ್ ನಲ್ಲಿ ನಡೆದಿದ್ದ ಈ ಸಿನಿಮಾದ ಶೂಟಿಂಗ್ ಹೈದರಾಬಾದ್ ಗೆ ಶಿಫ್ಟ್ ಆಗಿದೆಯಂತೆ.

ಅಲ್ಲು ಅರ್ಜುನ್ ಬ್ಯಾಂಕಾಕ್‌ನಲ್ಲಿ ಬೃಹತ್ ಸೆಟ್‌ಗಳನ್ನು ಸೇರಿಕೊಳ್ಳಲಿದ್ದಾರೆ. ಅಲ್ಲಿ ಸುಮಾರು 30 ದಿನಗಳ ಕಾಲ ಶೂಟಿಂಗ್ ನಡೆಯಲಿದೆ ಎನ್ನಲಾಗಿದೆ. ಈ ಮೂವತ್ತು ದಿನಗಳಲ್ಲಿ ಶೇ.40ರಷ್ಟು ಚಿತ್ರೀಕರಣ ಪೂರ್ಣಗೊಳ್ಳಲಿದೆ. ಬ್ಯಾಂಕಾಕ್ ದಟ್ಟ ಅರಣ್ಯದಲ್ಲಿ ಚಿತ್ರತಂಡ ಶೂಟಿಂಗ್ ಪ್ಲಾನ್ ಮಾಡಿದೆ.

ಅತ್ಯಂತ ಮಹತ್ವಾಕಾಂಕ್ಷೆಯ 'ಪುಷ್ಪ 2' ನಲ್ಲಿ ರೋಚಕ ಫೈಟ್ ಇರಲಿದೆ. ಇಂಟರ್ವಲ್ ಬ್ಲಾಕ್ ಸೀಕ್ವೆನ್ಸ್‌ನಲ್ಲಿ, ಅಲ್ಲು ಅರ್ಜುನ್ ತನ್ನ ಸ್ನೇಹಿತನನ್ನು ಉಳಿಸಲು ಸಿಂಹದೊಂದಿಗೆ ಹೋರಾಡುವ ಸೀನ್ ಕೂಡಾ ಇದೆ ಎನ್ನಲಾಗಿದೆ. ಈ ಸಿಂಹದ ಕಾದಾಟದ ದೃಶ್ಯವನ್ನು ಸುಕುಮಾರ್ ಒಂದು ರೇಂಜ್ ನಲ್ಲಿ ಡಿಸೈನ್ ಮಾಡಿದ್ದಾರೆ. ಈ ಒಂದು ದೃಶ್ಯದ ಚಿತ್ರೀಕರಣಕ್ಕಾಗಿ ಚಿತ್ರತಂಡ ಥಾಯ್ಲೆಂಡ್‌ಗೆ ತೆರಳಲಿದೆಯಂತೆ.

ಈ ಸಿನಿಮಾದ ಮೊದಲ ಭಾಗದಲ್ಲಿ ಅಲ್ಲು ಅರ್ಜುನ್ ರೆಡ್ ಸ್ಯಾಂಡಲ್ ವುಡ್ ಸ್ಮಗ್ಲರ್ ಆಗಿ ಮಾಸ್ ಲುಕ್ ನಲ್ಲಿ ಕಾಣಿಸಿಕೊಂಡಿದ್ದರು. ಅದೇ ಲುಕ್ ಅನ್ನು ಕೆಲವು ಬದಲಾವಣೆಗಳೊಂದಿಗೆ ಸೀಕ್ವೆಲ್‌ನಲ್ಲಿ ಮುಂದುವರಿಸಲಾಗುತ್ತದೆ. ಈ ಚಿತ್ರಕ್ಕಾಗಿ ಅಲ್ಲು ಅರ್ಜುನ್ 125 ಕೋಟಿ ವರೆಗೆ ಸಂಭಾವನೆ ಪಡೆಯಲಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ.