'ಲವ್ ಮಾಕ್ಟೇಲ್'​ ಚಿತ್ರಕ್ಕೆ ತೆಲುಗು ಸ್ಟಾರ್ ನಟ ಫುಲ್ ಫಿದಾ..!

ಲವ್ ಮಾಕ್ಟೇಲ್ ಚಿತ್ರವು ಥಿಯೇಟರ್​ಗಿಂತಲೂ ಆನ್​ಲೈನ್​ ಪ್ಲಾಟ್​ಫಾರ್ಮ್​ನಲ್ಲಿ ಸಖತ್ತಾಗೆ ಓಡುತ್ತಿದೆ. ಈಗಾಗಲೇ ಅನೇಕರು ಚಿತ್ರ ನೋಡಿ ಚಿತ್ರಮಂದಿರದಲ್ಲಿ ಮತ್ತೊಮ್ಮೆ ಬಿಡುಗಡೆ ಮಾಡುವಂತೆ ಕೇಳಿಕೊಳ್ಳುತ್ತಿದ್ದಾರೆ.

ಅದರಲ್ಲೂ ಅನ್ಯಭಾಷಾ ​ ಸಿನಿಪ್ರಿಯರು ಕೂಡ ಅಮೆಜಾನ್ ಪ್ರೈಮ್​ನಲ್ಲಿ ಚಿತ್ರ ನೋಡಿ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ಇವೆಲ್ಲದರ ನಡುವೆ ಇದೀಗ ಡಾರ್ಲಿಂಗ್ ಕೃಷ್ಣ ಕನಸಿನ ಕೂಸನ್ನು ಮೆಚ್ಚಿ ಟಾಲಿವುಡ್ ನಟರೊಬ್ಬರು ಬಹುಪರಾಕ್ ಅಂದಿದ್ದಾರೆ.

ಹೌದು, ಡಾರ್ಲಿಂಗ್ ಕೃಷ್ಣ ನಟಿಸಿ ನಿರ್ದೇಶಿಸಿದ ಲವ್ ಮಾಕ್ಟೇಲ್ ಚಿತ್ರ ಒಟಿಟಿ ಪ್ಲಾಟ್​ಫಾರ್ಮ್​ನಲ್ಲಿ ದಿನ ಕಳೆದಂತೆ ಸಿನಿ ಪ್ರಿಯರನ್ನು ಸೆಳೆಯುತ್ತಿದೆ. ಈಗಾಗಲೇ ಚಿತ್ರದ ಮುಂದುವರೆದ ಭಾಗಕ್ಕೂ ಅಭಿಮಾನಿಗಳು ಬೇಡಿಕೆ ಇಟ್ಟಿದ್ದಾರೆ.

ಇದರ ನಡುವೆ ಕನ್ನಡದ ಈ ಸಿನಿಮಾವನ್ನು ನೋಡಿರುವ ತೆಲುಗಿನ ಸ್ಟಾರ್ ನಟ ಅಲ್ಲು ಅರ್ಜುನ್ ತಮ್ಮ ನಟ ಅಲ್ಲು ಸಿರೀಶ್ ಚಿತ್ರದ ಬಗ್ಗೆ ಮೆಚ್ಚುಗೆ ಸೂಚಿಸಿ ಟ್ವೀಟ್ ಮಾಡಿದ್ದಾರೆ.

ಅಮೆಜಾನ್ ಪ್ರೈಮ್‍ನಲ್ಲಿ ಲವ್​ ಮಾಕ್ಟೇಲ್​ ಕನ್ನಡ ಚಿತ್ರವನ್ನು ನೋಡಿದೆ. ಸಿನಿಮಾ ತುಂಬಾ ಇಷ್ಟವಾಯಿತು. ಹೃದಯಕ್ಕೆ ಮುದ ನೀಡಿತು. 90 ಹಾಗೂ 2000ರ ಆಸುಪಾಸಿನಲ್ಲಿ ಜನಿಸಿದವರು ಈ ಸಿನಿಮಾವನ್ನು ಹೆಚ್ಚು ಇಷ್ಟಪಡುತ್ತಾರೆ. ಟ್ಯೂಶನ್ ಕ್ರಷಸ್, ಎಸ್‍ಎಂಎಸ್ ದಿನಗಳು, ಗಲ್ಲಿ ಕ್ರಿಕೆಟ್, ಪ್ರಿ ಸ್ಮಾರ್ಟ್ ಫೋನ್ ಲವ್...ಇವೆಲ್ಲವು ನನ್ನನ್ನು ಹಿಂದಿನ ದಿನಗಳಿಗೆ ಕರೆದುಕೊಂಡು ಹೋಯಿತು ಎಂದು ಅಲ್ಲು ಸಿರೀಶ್ ಬರೆದುಕೊಂಡಿದ್ದಾರೆ.

ಇನ್ನು ಈ ಟ್ವೀಟ್​ಗೆ ಡಾರ್ಲಿಂಗ್ ಕೃಷ್ಣ ಪ್ರತಿಕ್ರಿಯಿಸಿದ್ದು, ನಮ್ಮ ಸಿನಿಮಾ ಕುರಿತು ಮೆಚ್ಚುಗೆ ಸೂಚಿಸಿದಕ್ಕೆ ಧನ್ಯವಾದಗಳು ಎಂದು ತಿಳಿಸಿದ್ದಾರೆ. ಇದಕ್ಕೆ ಪ್ರತಿಯಾಗಿ ಮತ್ತೊಮ್ಮೆ ಟ್ವೀಟ್ ಮಾಡಿದ ಅಲ್ಲು ಸಿರೀಶ್ ನಿರ್ದೇಶನ ಹಾಗೂ ನಟನೆ ಎರಡನ್ನೂ ತುಂಬಾ ಚೆನ್ನಾಗಿ ಮಾಡಿದ್ದೀರಿ. ಇಂತಹ ಒಳ್ಳೆಯ ಚಿತ್ರ ನೀಡಿದಕ್ಕೆ ನಿಮಗೆ 'ಧನ್ಯವಾದಗಳು' ಎಂದು ಕನ್ನಡದಲ್ಲೇ ತಿಳಿಸಿದ್ದಾರೆ.

ಬೆಂಗಳೂರಿನಲ್ಲಿರುವ ಓದಿರುವ ಅಲ್ಲು ಸಿರೀಶ್ ಅಲ್ಪ ಸ್ವಲ್ಪ ಕನ್ನಡ ಮಾತನಾಡಬಲ್ಲರು. ಈ ಹಿಂದೆ ಕೂಡ ಕನ್ನಡ ಸಿನಿಮಾಗಳನ್ನು ನೋಡುವುದಾಗಿ ತಿಳಿಸಿದ್ದರು. ಈ ಬಾರಿ ಸಾಮಾಜಿಕ ಜಾಲತಾಣದಲ್ಲಿ ಈ ವಿಷಯವನ್ನು ಹಂಚಿಕೊಳ್ಳುವ ಮೂಲಕ ಸಂತಸ ವ್ಯಕ್ತಪಡಿಸಿದ್ದಾರೆ.

ಸದ್ಯ ಲವ್ ಮಾಕ್ಟೇಲ್ ಸಕ್ಸಸ್ ಅಲೆಯಲ್ಲಿ ತೇಲುತ್ತಿರುವ ಡಾರ್ಲಿಂಗ್ ಕೃಷ್ಣ ಅವರು ಆದಿ ಲವ್ ಸ್ಟೋರಿಯನ್ನು ಮುಂದುವರೆಸುವ ಕಾಯಕದಲ್ಲಿ ತೊಡಗಿದ್ದು, ಈಗಾಗಲೇ ಪಾರ್ಟ್​-2ಗಾಗಿ ಕಥೆ ಬರೆಯುವುದರಲ್ಲಿ ಕೃಷ್ಣ-ಮಿಲನ ಜೋಡಿ ನಿರತರಾಗಿದ್ದಾರೆ.

ಮಿಲನಾ-ಕೃಷ್ಣ

ಅಮೃತಾ-ಕೃಷ್ಣ-ಮಿಲನಾ

ಡಾರ್ಲಿಂಗ್ ಜೋಡಿ