Sooryavanshi : ಎರಡೇ ದಿನದಲ್ಲಿ 50 ಕೋಟಿ ಬಾಚಿದ `ಸೂರ್ಯವಂಶಿ’ ಸಿನಿಮಾ!

ಅಕ್ಷಯ್ ಕುಮಾರ್,  ರಣವೀರ್​ ಸಿಂಗ್​, ಅಜಯ್​ ದೇವಗನ್​ ಹಾಗೂ ಕತ್ರೀನಾ ಕೈಫ್ ನಟನೆಯ ‘ಸೂರ್ಯವಂಶಿ’ ಚಿತ್ರ ಬಾಕ್ಸಾಫೀಸ್​ನಲ್ಲಿ ಉತ್ತಮ ಗಳಿಕೆ ಮಾಡಿ ಮುನ್ನುಗ್ಗುತ್ತಿದೆ. ಮೊದಲ ದಿನಕ್ಕಿಂತ ಎರಡನೇ ದಿನದ ಗಳಿಕೆಯಲ್ಲಿ ತುಸು ಇಳಿಕೆ ಕಂಡುಬಂದಿದ್ದರೂ ಕೂಡ, ಒಟ್ಟಾರೆ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಚಿತ್ರ ನವೆಂಬರ್ 5ರಂದು ಬಿಡುಗಡೆಯಾಗಿತ್ತು. ಮೊದಲ ದಿನದಂದು ಪ್ರೇಕ್ಷಕರು ಚಿತ್ರಕ್ಕೆ ಬಹುಪರಾಕ್ ಎಂದಿದ್ದು, ₹ 26.29 ಕೋಟಿ ಗಳಿಸಿತ್ತು. ಎರಡನೇ ದಿನ ಹಬ್ಬವಿದ್ದ ಕಾರಣ, ಪ್ರೇಕ್ಷಕರು ಅಷ್ಟಾಗಿ ಚಿತ್ರಮಂದಿರಕ್ಕೆ ಆಗಮಿಸಿರಲಿಲ್ಲ.

ಅದಾಗ್ಯೂ ಚಿತ್ರವು ₹ 24.50 ಕೋಟಿ ಗಳಿಕೆ ಮಾಡಿದೆ. ಇದರೊಂದಿಗೆ ವೀಕೆಂಡ್ ಕೂಡ ಇರುವುದರಿಂದ ಇಂದು ಕೂಡ ಚಿತ್ರವು ಉತ್ತಮವಾಗಿ ಗಳಿಸಲಿದೆ ಎಂದು ಬಾಕ್ಸಾಫೀಸ್ ಪಂಡಿತರು ಲೆಕ್ಕಾಚಾರ ಹಾಕಿದ್ದಾರೆ.

ಮೆಟ್ರೋ ನಗರಗಳಲ್ಲಿ ‘ಸೂರ್ಯವಂಶಿ’ ಚಿತ್ರಕ್ಕೆ ಹಾಲಿವುಡ್ ಚಿತ್ರವಾದ ‘ಇಟರ್ನಲ್ಸ್’ ದೊಡ್ಡ ಪೈಪೋಟಿ ನೀಡಿದೆ. ಅದಾಗ್ಯೂ ‘ಸೂರ್ಯವಂಶಿ’ ಚಿತ್ರವು ಉತ್ತಮ ಆರಂಭ ಕಂಡಿದೆ.

ಸೂರ್ಯವಂಶಿ ಚಿತ್ರವು ಈ ಹಿಂದೆ ಹಲವು ಬಾರಿ ಬಿಡುಗಡೆಯಾಗಲು ಸಿದ್ಧತೆ ನಡೆಸಿತ್ತು. ಆದರೆ ಕೊರೊನಾ ಕಾರಣದಿಂದ ಮುಂದೂಡಲ್ಪಟ್ಟು, ಅಂತಿಮವಾಗಿ ನವೆಂಬರ್ 5ಕ್ಕೆ ತೆರೆಗೆ ಬಂದಿದೆ.

‘ಸೂರ್ಯವಂಶಿ’ ಚಿತ್ರವು ಮೂರು ದಿನಗಳಲ್ಲಿ ₹ 75- 85 ಕೋಟಿ ಗಳಿಸಬಹುದು ಎಂದು ಚಿತ್ರತಂಡದವರು ಈ ಹಿಂದೆ ಲೆಕ್ಕಾಚಾರ ಹಾಕಿದ್ದರು. ಚಿತ್ರತಂಡದ ನಿರೀಕ್ಷೆಯಂತೆಯೇ, ಚಿತ್ರವು ಉತ್ತಮ ಗಳಿಕೆ ಮಾಡಿ ಮುನ್ನುಗ್ಗುತ್ತಿದೆ.

ಈ ಹಿಂದೆ ಅಕ್ಷಯ್ ಕುಮಾರ್ ನಟನೆಯ ‘ಬೆಲ್ ಬಾಟಂ’ ಚಿತ್ರ ಮಹಾರಾಷ್ಟ್ರ ಸೇರಿದಂತೆ  ಕಂಡಿತ್ತು. ಆದರೆ ಪ್ರಸ್ತುತ ಅರ್ಧ ಪ್ರತಿಶತ ಭರ್ತಿಯೊಂದಿಗೆ ಕಾರ್ಯನಿರ್ವಹಿಸಲು ಅವಕಾಶ ನೀಡಿರುವುದು, ಚಿತ್ರಗಳಿಗೆ ಸಮಾಧಾನ ತಂದಿದ್ದು, ಗಳಿಕೆಯಲ್ಲೂ ಸಹಾಯ ಮಾಡಿವೆ.