Aishwarya Rai: ಟ್ಯಾಕ್ಸ್ ಕಟ್ಟಿಲ್ವಂತೆ ಬಚ್ಚನ್ ಸೊಸೆ! ಐಶ್ವರ್ಯಾ ರೈ ಮನೆಗೆ ಬಂತು ನೋಟಿಸ್!

ಐಶ್ವರ್ಯಾ ರೈ ಭೂ ತೆರಿಗೆ ಪಾವತಿಸಿಲ್ಲ ಎಂಬ ಆರೋಪ ಕೇಳಿ ಬಂದಿದೆ. ಈ ಬಗ್ಗೆ ನಟಿ ಐಶ್ವರ್ಯಾ ರೈಗೆ ನೋಟಿಸ್ ನೀಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ನಾಸಿಕ್ ನಲ್ಲಿರುವ ಆಸ್ತಿಗೆ ನಟಿ ಐಶ್ವರ್ಯಾ ರೈ ಒಂದು ವರ್ಷದಿಂದ ಯಾವುದೇ ತೆರಿಗೆ ಪಾವತಿಸಿಲ್ಲ. ಈ ಹಿನ್ನೆಲೆ ಜಿಲ್ಲಾಡಳಿತ ಹಾಗೂ ಸಂಬಂಧಪಟ್ಟ ಅಧಿಕಾರಿಗಳು ಪ್ರಕರಣಕ್ಕೆ ಸಂಬಂಧಿಸಿದಂತೆ ನಟಿಗೆ ನೋಟಿಸ್ ಕಳುಹಿಸಿದ್ದಾರೆ.

ಅಮಿತಾಭ್ ಬಚ್ಚನ್ ಸೊಸೆ ನಟಿ ಐಶ್ವರ್ಯಾ ರೈ, ಸಿನ್ನಾರ್ ನ ತಂಗಾವ್ ಬಳಿಯ ನಾಸಿಕ್ನ ಅಡ್ವಾಡಿಯಲ್ಲಿ ಆಸ್ತಿ ಹೊಂದಿದ್ದಾರೆ. ಸುಮಾರು 1 ಹೆಕ್ಟೇರ್ ಭೂಮಿ ಹೊಂದಿದ್ದಾರೆಂದು ವರದಿಯಾಗಿದೆ.

ಈ ಭೂಮಿಗೆ ಸಂಬಂಧಿಸಿದಂತೆ ಕಳೆದ 1 ವರ್ಷದಿಂದ ನಟಿ ಐಶ್ವರ್ಯಾ ರೈ ತೆರಿಗೆ ಪಾವತಿಸಿಲ್ಲ ಎಂದು ವರದಿಗಳು ತಿಳಿಸಿವೆ. ಸಿನ್ನಾರ್ ತಹಸೀಲ್ದಾರ್ ಇದೀಗ ನಟಿಗೆ ನೋಟಿಸ್ ಕಳುಹಿಸಿದ್ದಾರೆ.

ಐಶ್ವರ್ಯಾ ಅವರು ಭೂ ತೆರಿಗೆಯಲ್ಲಿ 21,960 ರೂ. ಬಾಕಿ ಉಳಿಸಿಕೊಂಡಿದ್ದಾರೆ. ನೋಟಿಸ್ ಸ್ವೀಕರಿಸಿದ 10 ದಿನಗಳಲ್ಲಿ ತೆರಿಗೆ ಪಾವತಿಸದಿದ್ದರೆ, ಐಶ್ವರ್ಯಾ ವಿರುದ್ಧ ಮಹಾರಾಷ್ಟ್ರ ಭೂಕಂದಾಯ ಕಾಯಿದೆ, 1966 ರ ಕಲಂ 174 ರ ಅಡಿಯಲ್ಲಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಲಾಗಿದೆ ಎಂದು ಏಷ್ಯಾನೆಟ್ ವರದಿ ಮಾಡಿದೆ.

ತೆರಿಗೆಗೆ ಸಂಬಂಧಿಸಿದಂತೆ ಜನವರಿ 9 ರಂದೇ ಐಶ್ವರ್ಯಾ ರೈಗೆ ನೋಟಿಸ್ ನೀಡಲಾಗಿದ್ದು, ಈ ನೋಟಿಸ್ ನನ್ನು ಐಶ್ವರ್ಯ ರೈ ಸ್ವೀಕರಿಸಿದ್ದಾರಾ? ಇದಕ್ಕೆ ಏನು ಪ್ರತಿಕ್ರಿಯೆ ನೀಡಿದ್ದಾರೆ ಎನ್ನುವುದು ಮಾತ್ರ ಇನ್ನೂ ತಿಳಿದು ಬಂದಿಲ್ಲ.

ಸಿನ್ನಾರ್ ನಲ್ಲಿರುವ 1200 ಆಸ್ತಿ ಮಾಲೀಕರಲ್ಲಿ ಐಶ್ವರ್ಯಾ ಕೂಡ ಒಬ್ಬರು, ಅವರು ತಮ್ಮ ತೆರಿಗೆಯನ್ನು ಪಾವತಿಸದ್ದಕ್ಕೆ ಈ ನೋಟಿಸ್ ಗಳನ್ನು ಕಳುಹಿಸಿದ್ದಾರೆ.

ಕೋಟಿ ಕೋಟಿ ಮೌಲ್ಯ ಆಸ್ತಿ ಒಡತಿ ಐಶ್ವರ್ಯಾ ರೈ ಸಿನ್ನಾರ್ ನಲ್ಲಿರುವ ಆಸ್ತಿಗೆ ತೆರಿಗೆ ಕಟ್ಟಿಲ್ವಾ ಎಂದು ನೆಟ್ಟಿಗರು ಪ್ರಶ್ನೆ ಮಾಡ್ತಿದ್ದಾರೆ. ನೋಟಿಸ್​ಗೆ ನಟಿ ಪ್ರತಿಕ್ರಿಯಿಸ್ತಾರಾ ಕಾದು ನೋಡಬೇಕಿದೆ.