Vikrant Rona ನಂತರ ದಕ್ಷಿಣ ಭಾರತದ ಸಿನಿಮಾಗಳತ್ತ ಮುಖ ಮಾಡಿದ ನಟಿ Jacqueline Fernandez

ದಕ್ಷಿಣ ಭಾರತದ ಸಿನಿಮಾಗಳತ್ತ ಬಾಲಿವುಡ್​ ಬ್ಯೂಟೀಸ್​ ಮುಖ ಮಾಡುವುದು ಬಹಳ ಹಿಂದಿನಿಂದಲೂ ನಡೆದುಕೊಂಡು ಬಂದಿದೆ. ಸಾಕಷ್ಟು ಮಂದಿ, ಹಿಂದಿ ಸಿನಿಮಾಗಳಿಗಿಂತ ದಕ್ಷಿಣ ಭಾರತದ ಚಿತ್ರಗಳಲ್ಲೇ ಹೆಸರು ಮಾಡಿದ್ದಾರೆ. ಈಗ ನಟಿ ಜಾಕ್ವೆಲಿನ್ ಫರ್ನಾಂಡಿಸ್​ ಸಹ ಇದೇ ಹಾದಿ ಹಿಡಿದಿದ್ದಾರೆ. 

ಕೆಲ ಸಮಯ ಹಿಂದೆ ಕಿಚ್ಚ ಸುದೀಪ್​ ಅವರ ವಿಕ್ರಾಂತ್ ರೋಣ ಸಿನಿಮಾದ ಹಾಡೊಂದಕ್ಕೆ ಹೆಜ್ಜೆ ಹಾಕಲು ಬಂದಿದ್ದ ನಟಿ ಜಾಕ್ವೆಲಿನ್ ಫರ್ನಾಂಡಿಸ್​ ಅವರು, ಆ ಸಿನಿಮಾದಲ್ಲಿ ಪಾತ್ರವೊಂದರಲ್ಲಿ ನಟಿಸಿ ಹೋದರು.

ಜಾಕ್ವೆಲಿನ ಫರ್ನಾಂಡಿಸ್​ ಅವರ ಪಾತ್ರದ ಫಸ್ಟ್​ಲುಕ್ ಪೋಸ್ಟರ್ ಸಹ ಈಗಾಗಲೇ ರಿಲೀಸ್ ಆಗಲಿದೆ. ಹೀಗಿರುವಾಗಲೇ ಜಾಕ್ವೆಲಿನ್ ಈಗ ಎರಡು ದಕ್ಷಿಣ ಭಾರತದ ಚಿತ್ರಗಳಲ್ಲಿ ನಟಿಸೋಕೆ  ಒಪ್ಪಿಗೆ ನೀಡಿದ್ದಾರಂತೆ.

ಪವನ್ ಕಲ್ಯಾಣ್​ ಜತೆಗೆ ಹರಿಹರ ವೀರ ಮಲ್ಲು ಸಿನಿಮಾದಲ್ಲಿ ಜಾಕ್ವೆಲಿನ್ ನಟಿಸುತ್ತಿದ್ದಾರಂತೆ. ಈ ವಿಷಯ ಈಗ ಅಧಿಕೃತವಾಗಿದೆ. ಇದರ ಜೊತೆಗೆ ಮತ್ತೊಂದು ತೆಲುಗು ಚಿತ್ರದಲ್ಲಿ ಈ ಶ್ರೀಲಂಕನ್​ ಸುಂದರಿ ನಟಿಸೋಕೆ ಸಜ್ಜಾಗುತ್ತಿದ್ದಾರೆ.

ಅಕ್ಕಿನೇನಿ ನಾಗಾರ್ಜುನ ಅವರ ಅಭಿನಯದ ಹೊಸ ಸಿನಿಮಾದಲ್ಲಿ ಜಾಕಿ ನಾಯಕಿಯಾಗಲಿದ್ದಾರಂತೆ. ದ ಘೋಸ್ಟ್​ ಸಿನಿಮಾದಲ್ಲಿ ಈ ಹಿಂದೆ ಕಾಜಲ್​ ಅಗರ್ವಾಲ್ ನಾಯಕಿ ಎನ್ನಲಾಗಿತ್ತು. ಆದರೆ, ಈಗ ಕಾಜಲ್ ಜಾಗಕ್ಕೆ ಜಾಕ್ವೆಲಿನ್ ಫರ್ನಾಂಡಿಸ್ ಬಂದಿದ್ದಾರಂತೆ.

ದ ಘೋಸ್ಟ್​ ಸಿನಿಮಾದಲ್ಲಿ ಆಗಿರುವ ಈ ಬದಲಾವಣೆಗೆ ಕಾರಣ ಕಾಜಲ್ ಅಗರ್ವಾಲ್ ಗರ್ಭಿಣಿ ಅನ್ನೋ ವಿಷಯವಂತೆ. ಕಾರಣ ಏನೇ ಆಗಲಿ ಜಾಕ್ವೆಲಿನ್ ಮಾತ್ರ ದಕ್ಷಿಣ ಭಾರತದಲ್ಲಿ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿ ಆಗಿರೋದಂತೂ ಸತ್ಯ.