ವಿಭಿನ್ನ ಪಾತ್ರದೊಂದಿಗೆ ನಾಲ್ಕು ವರ್ಷಗಳ ನಂತರ ಬಣ್ಣದ ಲೋಕಕ್ಕೆ ಮರಳಿದ ನಟಿ Prema

ಕೊಡಗಿನ ಕುವರಿ ಪ್ರೇಮಾ ಅವರು ಕನ್ನಡದಲ್ಲಿ ತಮ್ಮ ಸಿನಿ ಜರ್ನಿ ಆರಂಭಿಸಿ, ಅಭಿನಯಿಸಿದ ಎರಡನೇ ಸಿನಿಮಾಗೆ ರಾಜ್ಯ ಪ್ರಶಸ್ತಿ ಪಡೆದುಕೊಂಡರು. ಮೊದಲ ಸಿನಿಮಾ ಸವ್ಯಸಾಚಿಯಿಂದ ಬಣ್ಣದ ಲೋಕಕ್ಕೆ ಕಾಲಿಟ್ಟ ಪ್ರೇಮಾ ಅಭಿನಯಿಸಿದ 2ನೇ ಸಿನಿಮಾ ಓಂ.

1995ರಲ್ಲಿ ತೆರೆಕಂಡ ಉಪೇಂದ್ರ ನಿರ್ದೇಶನದ ಸಿನಿಮಾ ಓಂನಲ್ಲಿ ಶಿವರಾಜ್​ಕುಮಾರ್ ಜತೆ ಪ್ರೇಮಾ ನಾಯಕಿಯಾಗಿ ನಟಿಸಿದ್ದಾರೆ. ಈ ಸಿನಿಮಾ ಬಾಕ್ಸಾಫಿಸ್​ನಲ್ಲಿ ಧೂಳೆಬ್ಬಿಸಿತ್ತು. ನಂತರ ಶಿವಣ್ಣ ಹಾಗೂ ರಮೇಶ್​ ಅಭಿನಯದ ನಮ್ಮೂರ ಮಂದಾರ ಹೂವೆ ಸಿನಿಮಾ, ರಮೇಶ್ ಅವರ ಜತೆ ತುತ್ತಾಮುತ್ತಾ, ಚಂದ್ರಮುಖಿ ಪ್ರಾಣಸಖಿ ಸಿನಿಮಾಗಳು ಪ್ರೇಮಾ ಅವರಿಗೆ ಖ್ಯಾತಿ ತಂದುಕೊಟ್ಟವು.

2006ರಲ್ಲಿ ಮದುವೆಯಾದ ಪ್ರೇಮಾ ಅವರು ನಂತರ 2017ರಲ್ಲಿ ಉಪೇಂದ್ರ ಮತ್ತೆ ಬಾ ಚಿತ್ರದಲ್ಲಿ ಅಭಿನಯಿಸಿದರು. ಅದು ಬಾಕ್ಸಾಫಿಸ್​ನಲ್ಲಿ ನೆಲ ಕಚ್ಚಿತ್ತು. ನಂತರ ಸಿನಿಮಾಗಳಿಂದ ಕೊಂಚ ದೂರಾಗಿದ್ದ ಪ್ರೇಮ ಈಗ ಮತ್ತೆ ಸಿನಿಮಾಗೆ ಮರಳಿದ್ದಾರೆ. 

ವಿಕ್ರಂಪ್ರಭು ನಿರ್ಮಿಸಿ, ನಿರ್ದೇಶಿಸುತ್ತಿರುವ "ವೆಡ್ಡಿಂಗ್ ಗಿಫ್ಟ್" ಚಿತ್ರದಲ್ಲಿ ಪ್ರೇಮಾ ಪ್ರಮುಖ ಹಾಗೂ ವಿಭಿನ್ನ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಸಲ ಪ್ರೇಮಾ ಕಪ್ಪು ಕೋಟ್​ ಧರಿಸುವ ವಕೀಲೆಯಾಗಿ ತೆರೆ ಮೇಲೆ ಮಿಂಚಲಿದ್ದಾರಂತೆ. 

ಸೋನು ಗೌಡ, ಪ್ರೇಮ, ನಿಶಾನ್ ನಾಣಯ್ಯ ಅಭಿನಯದ ವೆಡ್ಡಿಂಗ್ ಗಿಫ್ಟ್​ ಸಿನಿಮಾದ ಮುಹೂರ್ತ ಸಮಾರಂಭ ಹನುಮಂತನಗರದ ಕುಮಾರಸ್ವಾಮಿ ದೇವಸ್ಥಾನದಲ್ಲಿ ನೆರವೇರಿತು. ಚಿತ್ರದ ಮೊದಲ ಸನ್ನಿವೇಶಕ್ಕೆ ಖ್ಯಾತ ನಿರ್ದೇಶಕ ನಾಗತಿಹಳ್ಳಿ ಚಂದ್ರಶೇಖರ್ ಆರಂಭ ಫಲಕ ತೋರಿದ್ದಾರೆ.

ನಮ್ಮೂರ ಮಂದಾರ ಹೂವೆ ಖ್ಯಾತಿಯ ನಟಿ ಪ್ರೇಮಾ ಕನ್ನಡ ಸೇರಿದಂತೆ ತೆಲುಗಿನಲ್ಲೂ ಸಾಕಷ್ಟು ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಟಾಲಿವುಡ್​ನಲ್ಲೂ ಸ್ಟಾರ್​ ನಟಿಯಾಗಿ ಮಿಂಚಿದ್ದ ಪ್ರೇಮಾ ಸಾಕಷ್ಟು ಕಮರ್ಷಿಯಲ್ ಹಾಗೂ ವಿಭಿನ್ನ ಜಾನರ್​ನ ಚಿತ್ರಗಳ ಮೂಲಕ ರಂಜಿಸಿದ್ದಾರೆ. ನಂತರದಲ್ಲಿ ತೆಲುಗಿನ ಜತೆಗೆ ಮಲಯಾಳಂನಲ್ಲೂ ಅಭಿನಯಿಸಿದರು. ವಿಷ್ಣುವರ್ಧನ್​ ಅವರ ಜತೆ ಯಜಮಾನ ಸಿನಿಮಾದಲ್ಲಿ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ.