Pooja Hegde: ಪೂಜಾ ಖಾತೆಗೆ ಮತ್ತೊಂದು ಫ್ಲಾಪ್! KKBKKJ ಸಿನಿಮಾಗೂ ಡಲ್ ರೆಸ್ಪಾನ್ಸ್

ಬಹುಭಾಷಾ ನಟಿ ಪೂಜಾ ಹೆಗ್ಡೆಗೆ ಯಾಕೋ ಟೈಮ್ ಸರಿ ಇಲ್ಲ. ನಟಿಯ ಸಾಲು ಸಾಲು ಸಿನಿಮಾಗಳು ಬಾಕ್ಸ್​ ಆಫೀಸ್​ನಲ್ಲಿ ನೆಲ ಕಚ್ಚುತ್ತಿವೆ. 2022ರಿಂದಲೂ ಪೂಜಾ ಹೆಗ್ಡೆ ಬರೀ ಫ್ಲಾಪ್ ಸಿನಿಮಾಗಳನ್ನೇ ಮಾಡಿದ್ದಾರೆ.

2022 ಅಂತೂ ಹಾಗೂ ಹೀಗೂ ಫ್ಲಾಫ್ ಆಯಿತು. 2023ರಲ್ಲಿ ಆದರೂ ಅದೃಷ್ಟ ಬರುತ್ತೆ ಅಂದುಕೊಂಡರೆ ಅದು ಕೂಡಾ ಸುಳ್ಳಾಗಿದೆ. ಪೂಜಾ ಖಾತೆಗೆ ಇನ್ನೊಂದು ಹಿಟ್ ಯಾವಾಗ ಬರುತ್ತೋ ಎಂದು ಕಾಯುವಂತಾಗಿದೆ ಸದ್ಯದ ಪರಿಸ್ಥಿತಿ. ಅವರ ಮಾಡಿದ ಸಿನಿಮಾ ಬಾಕ್ಸ್​ ಆಫೀಸ್​ನಲ್ಲಿ ಕಲೆಕ್ಷನ್ ಮಾಡುತ್ತಿಲ್ಲ, ಪ್ರೇಕ್ಷಕರ ಮೆಚ್ಚುಗೆಯನ್ನೂ ಪಡೆಯುತ್ತಿಲ್ಲ.

ಒಂದಷ್ಟು ಸಮಯ ಗ್ಯಾಪ್ ಕೊಟ್ಟು ವೆಕೇಷನ್ ಎಂಜಾಯ್ ಮಾಡಿಬಂದಿದ್ದ ನಟಿ ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್ ಸಿನಿಮಾದ ಮೇಲೆ ಭಾರೀ ನಿರೀಕ್ಷೆ ಇಟ್ಟುಕೊಂಡಿದ್ದರು. ಅದರಂತೆ ಸಲ್ಮಾನ್ ಈದ್ ಸಿನಿಮಾ ಬಗ್ಗೆ ನಿರೀಕ್ಷೆ ಕೂಡಾ ಹೆಚ್ಚಿತ್ತು. ಆದರೆ ಇದೂ ಕೂಡಾ ಫ್ಲಾಪ್ ಲಿಸ್ಟ್ ಸೇರಿದೆ.

ಬಾಲಿವುಡ್ ಬ್ಯೂಟಿ ನಟಿ ಪೂಜಾ ಹೆಗ್ಡೆ ತಮ್ಮ ಈ ಸಿನಿಮಾಗಾಗಿ ಸಾಕಷ್ಟು ಶ್ರಮಿಸಿದ್ದರು ಎನ್ನುವುದರಲ್ಲಿ ಸಂದೇಹವೇ ಇಲ್ಲ. ಸಿನಿಮಾದ ಪ್ರಚಾರಕ್ಕಾಗಿಯೂ ವಿಶೇಷ ಆಸಕ್ತಿವಹಿಸಿಕೊಂಡು ಕೆಲಸ ಮಾಡಿದ್ದಾರೆ. ಆದರೂ ನಟಿಗೆ ಅದೃಷ್ಟ ಕೈಕೊಟ್ಟಿದೆ.

2019ರಿಂದಲೇ ಪೂಜಾ ಹೆಗ್ಡೆ ಫ್ಲಾಪ್ ಸಿನಿಮಾ ಸಾಲು ಶುರುವಾಯಿತು. ಮಹೇಶ್ ಬಾಬು ಜೊತೆ ಮಾಡಿದ ಮಹರ್ಷಿ ಸಿನಿಮಾ ರಿಲೀಸ್​ಗೆ ಮೊದಲು ಸದ್ದು ಮಾಡಿದರೂ ನಂತರ ಅಷ್ಟಾಗಿ ಸೌಂಡ್ ಮಾಡಲೇ ಇಲ್ಲ. ಇದರಲ್ಲಿ ನಟಿ ಪೂಜಾ ಹೆಗ್ಡೆ ಅಭಿನಯ ಚೆನ್ನಾಗಿದ್ದರೂ ಸಿನಿಮಾ ಯಶಸ್ಸಾಗುವುದರಲ್ಲಿ ವಿಫಲವಾಯಿತು.

ಪೂಜಾ ಹೆಗ್ಡೆ ರಾಮ್ ಚರಣ್ ಜೊತೆ ಆಚಾರ್ಯ ಸಿನಿಮಾದಲ್ಲಿ ನಟಿಸಿದ್ದರು. ಇದರಲ್ಲಿ ಮೆಗಾಸ್ಟಾರ್ ಚಿರಂಜೀವಿಯೂ ನಟಿಸಿದ್ದರು. ಆದರೆ ಈ ಸಿನಿಮಾ ಕೂಡಾ ತೆಲುಗು ಇಂಡಸ್ಟ್ರಿಯಲ್ಲಿ ದೊಡ್ಡ ಫ್ಲಾಪ್ ಎಂದೇ ಕರೆಯಲ್ಪಟ್ಟಿತ್ತು.

ಕ್ಯೂಟ್ ಆಗಿ ಹಳ್ಳಿ ಹುಡುಗಿಯಾಗಿ ಕಾಣಿಸಿಕೊಂಡಿದ್ದ ಪೂಜಾ ಹೆಗ್ಡೆ ಲುಕ್ ಏನೋ ಮಸ್ತಾಗಿತ್ತು. ರಾಮ್ ಚರಣ್ ಜೊತೆ ಪೂಜಾ ಹೆಗ್ಡೆ ಕೆಮೆಸ್ಟ್ರಿ ಕೂಡಾ ಪ್ರೇಕ್ಷಕರಿಗೆ ಮೆಚ್ಚುಗೆಯಾಗಿತ್ತು. ಆದರೆ ಒಟ್ಟಾಗಿ ಸಿನಿಮಾ ಪ್ರೇಕ್ಷಕರ ಮೆಚ್ಚುಗೆ ಗಳಿಸಲು ವಿಫಲವಾಯ್ತು.

ಪೂಜಾ ಹೆಗ್ಡೆ ವಿಜಯ್ ಅವರ ಬೀಸ್ಟ್ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದಾರೆ. ಕಾಲಿವುಡ್​ನಲ್ಲಿ ಭಾರೀ ಹೈಫ್ ಕ್ರಿಯೇಟ್ ಮಾಡಿದ್ದ ಮೂವಿ ಇದಾಗಿತ್ತು. ಇದರ ಸಾಂಗ್​ಗಳು ಸಖತ್ ವೈರಲ್ ಆದವು. ಆದರೆ ಈ ಸಿನಿಮಾ ಫ್ಲಾಪ್ ಆಯಿತು. ಇದರ ನಂತರವೇ ವಿಜಯ್ ಕೂಡಾ ತಮ್ಮ ಸಿನಿಮಾ ಸ್ಟೈಲ್ ಸ್ವಲ್ಪ ಬದಲಾಯಿಸಿದರು.

ರಾಧೆ ಶ್ಯಾಮ್ ಸಿನಿಮಾದ ಬಗ್ಗೆ ಜನರಲ್ಲಿ ಭಾರೀ ನಿರೀಕ್ಷೆ ಇತ್ತು. ಇದರ ಒಂದೊಂದು ಪೋಸ್ಟರ್ ಕೂಡಾ ಕುತೂಹಲಭರಿತವಾಗಿತ್ತು. ಆದರೆ ಸಿನಿಮಾ ಬಾಕ್ಸ್ ಆಫೀಸ್​ನಲ್ಲಿ ನೆಲಕಚ್ಚಿತ್ತು.

ಈಗ ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್ ಸಿನಿಮಾ ಪರಿಸ್ಥಿತಿಯೂ ಇದೆ ಆಗಿದೆ. ಸಿನಿಮಾ ಭರ್ಜರಿಯಾಗಿ ಸಕ್ಸಸ್ ಆಗುತ್ತೆ ಅಂದುಕೊಂಡರೂ ಈ ಮೂವಿ ಓಕೆ ಓಕೆ ಎನಿಸಿಕೊಂಡಿದೆಯಷ್ಟೆ. ಆದರೆ ದೊಡ್ಡ ಮಟ್ಟದಲ್ಲಿ ಸಕ್ಸಸ್ ಆಗಿಲ್ಲ.

ಅಂತೂ ಪೂಜಾ ಹೆಗ್ಡೆ ಫ್ಲಾಪ್ ಲಿಸ್ಟ್​ಗೆ ಮತ್ತೊಂದು ಮೂವಿ ಸೇರಿದೆ. ಇನ್ನು ಮುಂದೆ ನಟಿ ಬ್ರೇಕ್ ತಗೊಳ್ತಾರಾ ಅಥವಾ ಸಿನಿಮಾ ಆಯ್ಕೆಯಲ್ಲಿ ಮತ್ತಷ್ಟು ಹುಷಾರಾಗ್ತಾರಾ ಎನ್ನುವುದನ್ನು ಕಾದು ನೋಡಬೇಕಷ್ಟೆ.