Samantha Ruth Prabhu: ಶಾಕುಂತಲಂ ಸಿನಿಮಾ ರಿಲೀಸ್​ ಬೆನ್ನಲ್ಲೇ ಗುಡ್​ನ್ಯೂಸ್​ ಹಂಚಿಕೊಂಡ ಸಮಂತಾ!

ಕಳೆದ ಕೆಲವು ವರ್ಷಗಳಿಂದ ಒಂದಲ್ಲ ಒಂದು ಕಾರಣಕ್ಕೆ ಪದೇ ಪದೇ ಸುದ್ದಿಯಲ್ಲಿರುತ್ತಿರುವ ತೆಲುಗು ಚಿತ್ರರಂಗದ ನಟಿ ಸಮಂತಾ ರುತ್ ಪ್ರಭು ಈಗ ಮತ್ತೆ ಸುದ್ದಿಯಲ್ಲಿದ್ದಾರೆ. ಮೊದಲೆಲ್ಲಾ ಅವರು ತಮ್ಮ ವೈವಾಹಿಕ ಜೀವನದಲ್ಲಿ ಆದಂತಹ ಕೆಲವು ಬೆಳವಣಿಗೆಗಳಿಂದ ಸುದ್ದಿಯಲ್ಲಿದ್ದರೆ, ನಂತರ ಅವರ ಚಿತ್ರಗಳಿಂದ ಮತ್ತು ಅವರ ಪಾತ್ರಗಳಿಂದ ಸುದ್ದಿಯಾದರು.

ಎಲ್ಲವೂ ಈಗ ಸರಿ ಹಾದಿಯಲ್ಲಿ ಸಾಗುತ್ತಿದೆ ಎನ್ನುವಾಗ ಈ ನಟಿಯ ಆರೋಗ್ಯ ಕೈ ಕೊಟ್ಟಿತ್ತು. ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರೂ ಸಹ ನಟಿ ಸಮಂತಾ ಅವರು ಮಾತ್ರ ತಮ್ಮ ಅಭಿಮಾನಿಗಳಿಗಾಗಿ ತಮ್ಮ ಆರೋಗ್ಯದ ಸ್ಥಿತಿಗತಿಯ ಬಗ್ಗೆ ಅಪ್ಡೇಟ್ಸ್ ಗಳನ್ನು ಆಗಾಗ ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಳ್ಳುತ್ತಲೇ ಇರುತ್ತಿದ್ದರು.

ಹೈದರಾಬಾದ್ ನಲ್ಲಿ ಹೊಸದಾಗಿ ಖರೀದಿಸಿದ ಐಷಾರಾಮಿ ಡ್ಯೂಪ್ಲೆಕ್ಸ್ ಅಪಾರ್ಟ್ಮೆಂಟ್ ನಿಂದಾಗಿ ಈ ನಟಿ ಈಗ ಸುದ್ದಿಯಲ್ಲಿದ್ದಾರೆ. ಈ ನಟಿ ಈಗ ಜಯಭೇರಿ ಆರೆಂಜ್ ಕೌಂಟಿಯಲ್ಲಿ ಐಷಾರಾಮಿ 3 ಬಿಎಚ್‌ಕೆ ಡ್ಯೂಪ್ಲೆಕ್ಸ್ ಅಪಾರ್ಟ್ಮೆಂಟ್ ಅನ್ನು ಖರೀದಿಸಿದ್ದಾರೆ. ಇದರ ಬೆಲೆ ಕೇಳಿದರೆ, ನೀವು ಒಂದು ಕ್ಷಣ ಶಾಕ್ ಆಗುವುದಂತೂ ಗ್ಯಾರಂಟಿ. ಏಕೆಂದರೆ ಇದು ಬರೋಬ್ಬರಿ 7.8 ಕೋಟಿ ರೂಪಾಯಿ ಬೆಲೆಯ ಐಷಾರಾಮಿ ಅಪಾರ್ಟ್ಮೆಂಟ್ ಆಗಿದೆಯಂತೆ.

ಸಮಂತಾ ಅವರ ಇತ್ತೀಚಿನ ಚಿತ್ರ ‘ಶಾಕುಂತಲಂ’ ಗಲ್ಲಾಪೆಟ್ಟಿಗೆಯಲ್ಲಿ ಫ್ಲಾಪ್ ಆಗಿದ್ದರೂ ಸಹ ಈ ನಟಿ ಇಂತಹ ಒಂದು ಐಷಾರಾಮಿ ಮನೆಯನ್ನು ಖರೀದಿಸಿದ್ದಾರಲ್ಲ ಅನ್ನೋ ಅಚ್ಚರಿ ಈಗ ಸಿನಿಮಾ ಮಂದಿಗಳ ಮನಸ್ಸಿನಲ್ಲಿದೆ. ಇನ್‌ಸ್ಟಾಗ್ರಾಮ್ ನಲ್ಲಿ 26 ದಶಲಕ್ಷಕ್ಕೂ ಹೆಚ್ಚು ಫಾಲೋವರ್ ಗಳನ್ನು ಹೊಂದಿರುವ ಸ್ಯಾಮ್ ತನ್ನ ಅಭಿಮಾನಿಗಳಲ್ಲಿ ತುಂಬಾನೇ ಜನಪ್ರಿಯರಾಗಿದ್ದಾರೆ.

ನಟಿ ಸಮಂತಾ ಪ್ರಸ್ತುತ ನಟ ವಿಜಯ್ ದೇವರಕೊಂಡ ಅವರೊಂದಿಗೆ ತಮ್ಮ ಮುಂಬರುವ ಚಿತ್ರ 'ಖುಷಿ' ಗಾಗಿ ಸುದ್ದಿಯಲ್ಲಿದ್ದಾರೆ. ತಯಾರಕರು ಇತ್ತೀಚೆಗೆ ಅದರ ಒಂದು ಹಾಡನ್ನು ಬಿಡುಗಡೆ ಮಾಡಿದರು, ಅದು ಪರದೆಯ ಮೇಲೆ ಇವರಿಬ್ಬರ ನಡುವಿನ ಆ ಮುದ್ದಾದ ಕೆಮಿಸ್ಟ್ರಿಯ ಒಂದು ಇಣುಕುನೋಟವನ್ನು ನೀಡುತ್ತದೆ.

ಐಷಾರಾಮಿ ಡ್ಯೂಪ್ಲೆಕ್ಸ್ ಅಪಾರ್ಟ್ಮೆಂಟ್ ನ ಬೆಲೆ ಎಷ್ಟು?: ರಿಯಲ್ ಎಸ್ಟೇಟ್ ಡೇಟಾ ಅನಾಲಿಟಿಕ್ಸ್ ಸಂಸ್ಥೆಯಾದ ಸಿಆರ್‌ಇ ಮ್ಯಾಟ್ರಿಕ್ಸ್ ನ ವರದಿಯು ಸಮಂತಾ ರುತ್ ಪ್ರಭು ಅವರ ಐಷಾರಾಮಿ ಹೊಸ ಆಸ್ತಿಯ ಬಗ್ಗೆ ಬಹಿರಂಗಪಡಿಸಿದೆ. ಹೈದರಾಬಾದ್ ನ ಜಯಭೇರಿ ಆರೆಂಜ್ ಕೌಂಟಿಯಲ್ಲಿ ನಟಿ ತನ್ನ ಈ ಐಷಾರಾಮಿ ಮನೆಯನ್ನು 7.8 ಕೋಟಿ ರೂಪಾಯಿಗೆ ಖರೀದಿಸಿದ್ದಾರೆ. 13ನೇ ಮಹಡಿಯಲ್ಲಿ 3,920 ಚದರ ಅಡಿ ಮತ್ತು 14ನೇ ಮಹಡಿಯಲ್ಲಿ 4,024 ಚದರ ಅಡಿ ವಿಸ್ತೀರ್ಣವನ್ನು ಹೊಂದಿರುವ ಈ ಡ್ಯೂಪ್ಲೆಕ್ಸ್ ಅಪಾರ್ಟ್ಮೆಂಟ್ ಒಟ್ಟು 7,944 ಚದರ ಅಡಿ ವಿಸ್ತೀರ್ಣವನ್ನು ಹೊಂದಿದೆ.

ಈ ಆಸ್ತಿಯು ಹೈದರಾಬಾದ್ ನ ನಾನಕ್‌ರಾಮ್ ಎಂಬ ಐಷಾರಾಮಿ ಸೊಸೈಟಿಯ ಅಡಿಯಲ್ಲಿ ಬರುತ್ತದೆ ಮತ್ತು ಅವರು ಈಗಾಗಲೇ ಜೂಬ್ಲಿ ಹಿಲ್ಸ್ ನಲ್ಲಿ ಐಷಾರಾಮಿ ಮನೆಯನ್ನು ಹೊಂದಿದ್ದಾರೆ. ಇದಲ್ಲದೆ, ಸಮಂತಾ ಮುಂಬೈನಲ್ಲಿ ಸಹ 15 ಕೋಟಿ ರೂಪಾಯಿ ಮೌಲ್ಯದ ಮನೆಯನ್ನು ಹೊಂದಿದ್ದಾರಂತೆ.

ಸ್ಯಾಮ್ ತನ್ನ ಚಿತ್ರಗಳ ಶೂಟಿಂಗ್ ಗೆ ಅಂತ ಆಗಾಗ್ಗೆ ಸಾಕಷ್ಟು ಸ್ಥಳಗಳಿಗೆ ಪ್ರಯಾಣಿಸುತ್ತಿರುತ್ತಾರೆ ಮತ್ತು ಹೈದರಾಬಾದ್ ನಲ್ಲಿ ತನ್ನ ಐಷಾರಾಮಿ ಜ್ಯೂಬ್ಲಿ ಹಿಲ್ಸ್ ಅಪಾರ್ಟ್ಮೆಂಟ್ ನಲ್ಲಿ ತಮ್ಮ ಹ್ಯಾಶ್ ಮತ್ತು ಸಾಶಾ ಎಂಬ ಎರಡು ಮುದ್ದಾದ ನಾಯಿ ಮರಿಗಳೊಂದಿಗೆ ವಾಸಿಸುತ್ತಿದ್ದಾರೆ.