ನನ್ ಹುಟ್ದಬ್ಬ ಇಂದಲ್ಲ ಕಣ್ಲ: ಅಭಿನಯ ಚತುರ ಸ್ಪಷ್ಟನೆ

ಕನ್ನಡ ಚಿತ್ರರಂಗದ ಅಭಿನಯ ಚತುರ ಸತೀಶ್ ನೀನಾಸಂ ಅವರಿಗೆ ನಿನ್ನೆ ರಾತ್ರಿಯಿಂದಲೇ ಹುಟ್ಟುಹಬ್ಬದ ಶುಭಾಶಯಗಳ ಮಹಾಪೂರವೇ ಹರಿದು ಬರುತ್ತಿತ್ತು.

ಇದನ್ನು ನೋಡಿದ ನಟನಿಗೂ ಒಂದು ಡೌಟ್. ಅದೇನೆಂದರೆ ಇಂದು ಜೂನ್ ಇಪ್ಪತ್ತಾ? ಏಕೆಂದರೆ ನೀನಾಸಂ ಸತೀಶ್ ಅವರು ಹುಟ್ಟಿದ್ದು ಜೂನ್ 20 ರಂದು. ಆದರೆ ಯಾರೋ ಮಾಡಿದ ಎಡವಟ್ಟಿನಿಂದಾಗಿ ಇಂದು ಶುಭಾಶಯಗಳು ಹರಿದು ಬಂದಿತ್ತು.

ಈ ಬಗ್ಗೆ ಖುದ್ದು ಸತೀಶ್ ಅವರು ಕೂಡ ಸ್ಪಷ್ಟನೆ ನೀಡಿದ್ದಾರೆ. ಜೂನ್ 20 ನನ್ನ ಹುಟ್ಟುಹಬ್ಬ, ಇಂದಲ್ಲ. ಬುಕ್​ಮೈ ಶೋನಲ್ಲಿ ತಪ್ಪಾಗಿ ತೋರಿಸುತ್ತಿದೆ, ಕ್ಷಮೆ ಇರಲಿ ಮುಂಚಿತವಾಗಿ ಶುಭಾಶಯ ಕೋರಿದ ತಮಗೆಲ್ಲ ಧನ್ಯವಾದಗಳು ಎಂದು ತಿಳಿಸಿದ್ದಾರೆ.

ಈ ಟ್ವೀಟ್ ಕಾಣಿಸುತ್ತಿದ್ದಂತೆ ನಿರ್ದೇಶಕ/ನಿರ್ಮಾಪಕ ಬಿ ಸುರೇಶ್ ಅವರು ಅಭಿನಯ ಚತುರನ ಕಾಲೆಳೆಯುವ ಪ್ರಯತ್ನ ಮಾಡಿದ್ದಾರೆ. ಕಲಾವಿದ ಅಂದ್‌ಮ್ಯಾಲೆ ಪ್ರತಿದಿನ ಉಟ್ದಬ್ಬ ಮಾಡ್ಕಂಬೇಕು ಕಣಪ್ಪೋ...! ಪ್ರತೀ ಪಾತ್ರುಕ್ ಬಣ್ಣ ಆಕ್ಕಣದೆ ಉಟ್ದಬ್ಬ...! ಇವತ್ಗೊಂದು ಕೇಕು, ಇಪ್ಪತ್ತಕ್ಕೊಂದ್ ಕೇಕು...!
ಹಬ್ಬ ಮಾಡ್ತಾ ಇರ‌್ಬೇಕು...! ಎಂದಿದ್ದಾರೆ.

ಸದ್ಯ ಲಾಕ್​ಡೌನ್ ಹಿನ್ನೆಲೆಯಲ್ಲಿ ನೀನಾಸಂ ಸತೀಶ್ ಮನೆಯಲ್ಲಿಯೇ ಕಾಲ ಕಳೆಯುತ್ತಿದ್ದಾರೆ. ಇದರ ನಡುವ 19 ದಿನಗಳ ಬರ್ತ್​ಡೇ ಸರ್​ಪ್ರೈಸ್ ಕೂಡ ಸಿಕ್ಕಂತಾಗಿದೆ.

ಇನ್ನು ಸತೀಶ್ ಅಭಿನಯದ ಬಹುನಿರೀಕ್ಷಿತ ಗೋದ್ರಾ ಸಿನಿಮಾ ಬಿಡುಗಡೆಗೆ ರೆಡಿಯಾಗಿ ನಿಂತಿದೆ. ಇದಲ್ಲದೆ ಒಂದು ತಮಿಳು ಚಿತ್ರ, ಪರಿಮಳ ಲಾಡ್ಜ್, ಮೈ ನೇಮ್ ಇಸ್ ಸಿದ್ದೇಗೌಡ ಸಿನಿಮಾಗಳು ಅಭಿನಯ ಚತುರನ ಕೈಯಲ್ಲಿದೆ.

ಒಟ್ಟಿನಲ್ಲಿ ಲಾಕ್​ಡೌನ್ ಮುಗಿಯುತ್ತಿದ್ದಂತೆ ನೀನಾಸಂ ಸತೀಶ್ ಫುಲ್ ಬ್ಯುಸಿಯಾಗಲಿರುವುದಂತು ಸತ್ಯ. ಅದರೊಂದಿಗೆ ಅವರೇ ಮೈ ನೇಮ್ ಇಸ್ ಸಿದ್ದೇಗೌಡ ಎಂಬ ಚಿತ್ರವನ್ನು ನಿರ್ದೇಶಿಸಲಿದ್ದಾರೆ ಎಂಬ ಮಾತುಗಳು ಕೂಡ ಕೇಳಿ ಬರುತ್ತಿವೆ.