Aayush Sharma: ಸಲ್ಮಾನ್​ ಖಾನ್​ ಚಿತ್ರದಿಂದ ಆಯುಷ್ ಶರ್ಮಾ​ ಹೊರ ಬರೋಕೆ ಇದೇ ಕಾರಣವಂತೆ

2018ರಲ್ಲಿ ಸಲ್ಮಾನ್ ಖಾನ್ ನಿರ್ಮಿಸಿದ್ದ ಲವ್ ಯಾತ್ರಿ ಸಿನಿಮಾದ ಮೂಲಕ ಮೊದಲ ಬಾರಿಗೆ ನಾಯಕನಾಗಿ ಬಾಲಿವುಡ್ ಪ್ರವೇಶಿಸಿದ್ದ ಆಯುಷ್, ಅಂತಿಮ್ ಚಿತ್ರದ ಮೂಲಕ ಜನರಿಗೆ ಇನ್ನಷ್ಟು ಹತ್ತಿರವಾಗಿದ್ದಾರೆ.

ಸಲ್ಮಾನ್​ ಸಹೋದರಿ ಅರ್ಪಿತಾ ಖಾನ್​ ಅವರನ್ನು ಪ್ರೀತಿಸಿ ಮದುವೆಯಾಗಿದ್ದ ಆಯುಷ್, ಸಲ್ಮಾನ್​ ಖಾನ್​ ಜೊತೆ ಒಳ್ಳೆಯ ಸಂಬಂಧವನ್ನು ಸಹ ಹೊಂದಿದ್ದರು. ಹಲವಾರು ಕಾರ್ಯಕ್ರಮಗಳಲ್ಲಿ ಒಟ್ಟಿಗೆ ಕಾಣಿಸಿಕೊಂಡಿದ್ದರು.

ಆದರೆ ಸಲ್ಮಾನ್​ ಹಾಗೂ ಆಯುಷ್​ ನಡುವೆ ಈಗ ಎಲ್ಲವೂ ಸರಿಯಲ್ಲ ಎಂಬ ಗುಸಗುಸು ಬಾಲಿವುಡ್​ನಲ್ಲಿ ಹರಿದಾಡುತ್ತಿದ್ದು, ಇದಕ್ಕೆ ಕಾರಣ ಕಭಿ ಈದ್ ಕಭಿ ದಿವಾಲಿ’ ಚಿತ್ರ.

ಸಲ್ಮಾನ್ ಖಾನ್ ನಟನೆಯ ಬಹುನಿರೀಕ್ಷಿತ `ಕಭಿ ಈದ್ ಕಭಿ ದಿವಾಲಿ’ ಸಿನಿಮಾದಿಂದ ನಟ ಆಯುಷ್ ಶರ್ಮಾ ಹೊರ ಬಂದಿದ್ದು, ಬಾಲಿವುಡ್​ನಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿರುವುದು ಸುಳ್ಳಲ್ಲ.

ಕೆಲ ಮೂಲಗಳ ಪ್ರಕಾರ, ಸಲ್ಮಾನ್​ ಖಾನ್​ ಫಿಲ್ಮ್ಸ್​ ಹಾಗೂ ಆಯುಷ್​ ಮಧ್ಯೆ ಸಣ್ಣ ಮನಸ್ತಾಪ ಆಗಿದ್ದು, ಈ ಕಾರಣಕ್ಕೆ ಆಯುಷ್ ಈ ಚಿತ್ರದಿಂದ ಹೊರಬಂದಿದ್ದಾರೆ ಎನ್ನಲಾಗುತ್ತಿದೆ. ಆದರೆ ಈ ಬಗ್ಗೆ ಆಯುಷ್ ಶರ್ಮಾ ಆಗಲಿ ಅಥವಾ ಸಲ್ಮಾನ್​ ಖಾನ್​ ಆಗಲಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಈ ಚಿತ್ರ ಶುರುವಾದಗಿನಿಂದ ಒಂದಲ್ಲಾ ಒಂದು ವಿಚಾರಕ್ಕೆ ಸುದ್ದಿಯಾಗುತ್ತಲೇ ಇದೆ. ಇದೀಗ ಆಯುಷ್​ ಶರ್ಮಾ ಹೊರ ನಡೆದಿರುವುದು ಶಾಕ್​ ಆಗಿದ್ದು, ಮುಂದೇನಾಗುತ್ತದೆ ಎಂಬುದು ಮಾತ್ರ ಇನ್ನು ಕುತೂಹಲ.

ಕೇವಲ ಆಯುಷ್​ ಶರ್ಮಾ ಮಾತ್ರವಲ್ಲದೇ ಇದರ ಮತ್ತೊಬ್ಬ ನಿರ್ಮಾಪಕರಾಗಿದ್ದ ಸಾಜಿದ್​ ನಾಡಿಯಾದ್ವಾಲಾ ಸಹ ಹಿಂದೆ ಸರಿದಿದ್ದು, ಮತ್ತೆಷ್ಟು ಬದಲಾವಣೆಗಳಾಗುತ್ತದೆ ಎಂಬ ಚಿಂತೆಯಲ್ಲಿ ಚಿತ್ರತಂಡವಿದೆ.

ಇನ್ನು ಆಯುಷ್​ ಬದಲಿಗೆ ಯಾವ ನಟ ಬರಲಿದ್ದಾರೆ ಎಂಬುದು ಇದುವರೆಗೂ ಖಾತ್ರಿಯಾಗಿಲ್ಲ. ಅಲ್ಲದೇ ಆ ಭಾಗವನ್ನು ಮತ್ತೆ ಶೂಟ್​ ಮಾಡಬೇಕಿದೆ.