Anushka Shetty: ಅನುಷ್ಕಾ ಶೆಟ್ಟಿ ಸಿಗ್ತಾರೆ ಅಂತ 51 ಲಕ್ಷ ಕೊಟ್ಟು ಮಕ್ಮಲ್ ಟೋಪಿ ಹಾಕಿಸಿಕೊಂಡ ನಿರ್ಮಾಪಕ!

ಅನುಷ್ಕಾ ಶೆಟ್ಟಿಯನ್ನು ಭೇಟಿ ಮಾಡಿಸುವುದಾಗಿ ಹೇಳಿಕೊಂಡು ವ್ಯಕ್ತಿಯೊಬ್ಬ ವಿಶ್ವಕರ್ಮ ಕ್ರಿಯೇಷನ್ಸ್ ಮುಖ್ಯಸ್ಥ ಹಾಗೂ ನಿರ್ಮಾಪಕ ಲಕ್ಷ್ಮಣ್ ಚಾರಿ ಅವರಿಗೆ 51 ಲಕ್ಷ ರೂಪಾಯಿ ಟೋಪಿ ಹಾಕಿದ್ದಾನೆ.

ಯಲಾ ರೆಡ್ಡಿ ಎಂಬ ವ್ಯಕ್ತಿ ನಿರ್ಮಾಪಕ ಲಕ್ಷ್ಮಣ್ ಅವರಿಗೆ ಅನುಷ್ಕಾ ಶೆಟ್ಟಿ ಕಾಲ್​ಶೀಟ್​ ಕೊಡಿಸುವುದಾಗಿ ನಂಬಿಸಿ ಮೋಸ ಮಾಡಿದ್ದಾನೆ.

ಅಷ್ಟೇ ಅಲ್ಲದೇ ಅನುಷ್ಕಾ ಶೆಟ್ಟಿ ಜೊತೆಗೆ ಸಂಗೀತ ನಿರ್ದೇಶಕ ಮಣಿ ಶರ್ಮಾ ಅವರನ್ನೂ ಸಹ ಭೇಟಿ ಮಾಡಿಸುತ್ತೇನೆ ಎಂದು ಹೇಳಿದ್ದ ಯಲಾ ರೆಡ್ಡಿ, ಹಣ ಪಡೆದು ಪರಾರಿಯಾಗಿದ್ದಾನೆ. ನಟ-ನಟಿಯರ ಶೂಟಿಂಗ್ ಸ್ಪಾರ್ಟ್​ಗೆ ಹೋಗಿ ಫೋಟೋ ತೆಗೆಸಿಕೊಳ್ತಿದ್ದ ಯಲ್ಲಾ ರೆಡ್ಡಿ, ಫೋಟೋ ತೋರಿಸಿ ಇವ್ರೆಲ್ಲಾ ನಂಗೆ ಚೆನ್ನಾಗಿ ಗೊತ್ತು ನಿಮಗೂ ಮೀಟ್ ಮಾಡಿಸುವುದಾಗಿ ಹೇಳಿ ಯಮಾರಿಸುತ್ತಿದ್ದ.

ಇದೀಗ ನಿರ್ಮಾಪಕರೇ ಈ ಮೋಸಗಾರನ ಬಲೆಗೆ ಬಿದ್ದು ಮೋಸ ಹೋಗಿದ್ದಾರೆ. ಯಲ್ಲಾ ರೆಡ್ಡಿ ತಾನು ಸಿನಿಮಾ ಮ್ಯಾನೇಜರ್ ಎಂದು ಲಕ್ಷ್ಮಣ್ ಅವರನ್ನು ಪರಿಚಯ ಮಾಡಿಕೊಂಡಿದ್ದ. ತನಗೆ ಟಾಲಿವುಡ್​ನಲ್ಲಿ ಎಲ್ಲಾ ಸ್ಟಾರ್​ಗಳೂ ಗೊತ್ತು ಎಲ್ಲರೂ ಜೊತೆ ನಂಗೆ ಫ್ರೆಂಡ್ಶಿಪ್ ಇದೆ ಎಂದು ಮಾತಾಡಿ ನಿರ್ಮಾಪಕ ಲಕ್ಷ್ಮಣ್ ಚಾರಿ ಅವರನ್ನು ನಂಬಿಸಿದ್ದ.

ಅನುಷ್ಕಾ ಶೆಟ್ಟಿ ಅವರ ಕಾಲ್ ಶೀಟ್ ಕೊಡಿಸುತ್ತೇನೆ ಎಂದು ಸುಳ್ಳು ಹೇಳಿ ನಂಬಿಸಿ 51 ಲಕ್ಷ ರೂಪಾಯಿ ಹಣ ಪಡೆದಿದ್ದಾನೆ. ಲಕ್ಷ್ಮಣ್ ಕೂಡ ಅನುಷ್ಕಾ ಭೇಟಿ ಮಾಡುವ ಆಸೆಯಿಂದ ಯಲ್ಲಾ ರೆಡ್ಡಿ ಕೇಳಿದಷ್ಟು ಹಣ ನೀಡಿದ್ದಾರೆ.

ಅನುಷ್ಕಾ ಶೆಟ್ಟಿ ಭೇಟಿ ಮಾಡಿಸುವುದಾಗಿ ಮೊದಲು 26 ಲಕ್ಷ ತೆಗೆದುಕೊಂಡ ಯಲ್ಲಾ ರೆಡ್ಡಿ, ಬಳಿಕ ನಿರ್ಮಾಪಕರನ್ನು ಬೆಂಗಳೂರಿಗೆ ಕರೆದುಕೊಂಡು ಬಂದು ನಟಿ ಸಖತ್ ಬ್ಯುಸಿ ಅಂತ ಹೇಳಿ ವಾಪಸ್ ಕರೆದುಕೊಂಡು ಹೋಗಿದ್ದಾನೆ.

ಬೆಂಗಳೂರಲ್ಲಿ ಅನುಷ್ಕಾ ಸಿಗಲಿಲ್ಲ ಈ ಬಾರಿ ಪಕ್ಕಾ ಮೀಟ್ ಮಾಡಿಸೋದಾಗಿ ಬಣ್ಣ ಬಣ್ಣದ ಮಾತುಗಳನ್ನು ಆಡಿ 25 ಲಕ್ಷ ರೂಪಾಯಿ ಪಡೆದುಕೊಂಡಿದ್ದಾನೆ. ಬಳಿಕ ಲಕ್ಷ್ಮಣ್ಗೆ ಸಿಗದೆ ಪರಾರಿಯಾಗಿದ್ದಾನೆ.

ಲಕ್ಷ್ಮಣ್ ಚಾರಿ ಅವರು ತೆಲುಗು ಫಿಲ್ಮ್ ಚೇಂಬರ್​ಗೆ ದೂರು ದಾಖಲು ಮಾಡಿದ್ದಾರೆ. ಹಣ ವಾಪಸ್ ಕೇಳಿದರೆ ಮನೆಯಲ್ಲಿರುವ ಹೆಂಗಸರಿಂದ ಕೇಸ್ ಹಾಕಿಸುವುದಾಗಿ ಹೆದರಿಸಿರುವುದಾಗಿ ಲಕ್ಷ್ಮಣ್ ತಿಳಿಸಿದ್ದಾರೆ.