ಒಂದಲ್ಲ, ಎರಡಲ್ಲ ಬರೋಬ್ಬರಿ 17 ಅವತಾರಗಳು: ದಾಖಲೆ ಬರೆಯಲು ಹೊರಟ ಕಿಲ ಕಿಲ ನಗಿಸುವ ಸಾಧು ಕೋಕಿಲ

ಹೀರೋ ಯಾರೇ ಆಗಿರಲಿ...ಪಾತ್ರ ಯಾವುದೇ ಇರಲಿ...ಚಿತ್ರದಲ್ಲಿ ಸಾಧು ಕೋಕಿಲ ಅಲಿಯಾಸ್ ಸಾಧು ಮಹಾರಾಜ್ ಇದ್ದರಂತು ಮುಗೀತು. ಅಲ್ಲಿ ನಗೆಹಬ್ಬವಂತು ಗ್ಯಾರೆಂಟಿ.

ಕನ್ನಡ ಚಿತ್ರರಂಗದ ಬಹು ಬೇಡಿಕೆಯ ಹಾಸ್ಯ ನಟ ಎಂದು ಗುರುತಿಸಿಕೊಂಡಿರುವ ಕಳೆದ 28 ವರ್ಷಗಳಿಂದ ಸ್ಯಾಂಡಲ್​​ವುಡ್ ಅಂಗಳದಲ್ಲಿ ಕಾಮಿಡಿ ಕಮಾಲ್ ಮಾಡುತ್ತಿದ್ದಾರೆ.

1992 ರಲ್ಲಿ ಉಪೇಂದ್ರ ನಿರ್ದೇಶನದ "ಶ್" ಚಿತ್ರದ ಮೂಲಕ ಸಿನಿ ಕೆರಿಯರ್ ಆರಂಭಿಸಿದ್ದ ಸಾಧು ಕೋಕಿಲ ನಟನೆಯೊಂದಿಗೆ ಸಂಗೀತ ನಿರ್ದೇಶಕರಾಗಿಯೂ ಗುರುತಿಸಿಕೊಂಡಿದ್ದಾರೆ.

ಇದೀಗ ತಮ್ಮ ನಗೆಗಡಲಲ್ಲಿ ತೇಲಿಸುವ ಅಭಿನಯದ ಮೂಲಕವೇ ಹೊಸದೊಂದು ವಿಶ್ವ ದಾಖಲೆ ಬರೆಯಲು ಮುಂದಾಗಿದ್ದಾರೆ.

ಹೌದು, ಈ ಹಿಂದೆ ಕಮಲ್ ಹಾಸನ್ ದಶಾವತಾರಂ ಚಿತ್ರದಲ್ಲಿ ಬರೋಬ್ಬರಿ 10 ವಿಭಿನ್ನ ಅವತಾರಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕ ಇತಿಹಾಸ ಬರೆದಿದ್ದರು.

ಕಮಲ್ ಹಾಸನ್ ಸೃಷ್ಟಿಸಿದ ಈ ದಾಖಲೆಯನ್ನು ಮುರಿದಿದ್ದು ನಟ ಹರೀಶ್ ರಾಜ್. ಹೌದು, ತಮ್ಮ ನಿರ್ದೇಶನ ಮತ್ತು ನಿರ್ಮಾಣದ ಶ್ರೀ ಸತ್ಯನಾರಾಯಣ ಚಿತ್ರದಲ್ಲಿ ಹರೀಶ್ 16 ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು.

ಈ ಮೂಲಕ ನಟ ಹರೀಶ್ ರಾಜ್ ಲಿಮ್ಕಾ ದಾಖಲೆಯನ್ನು ಬರೆದು ಕನ್ನಡ ಚಿತ್ರರಂಗವನ್ನು ವಿಶ್ವವೇ ತಿರುಗಿ ನೋಡುವಂತೆ ಮಾಡಿದ್ದರು.

ಇದೀಗ ಕನ್ನಡಿಗನ ದಾಖಲೆಯನ್ನು ಮುರಿಯಲು ಕನ್ನಡಿಗನೇ ಮುಂದೆ ಬಂದಿದ್ದಾನೆ. ಅದು ಸಾಧು ಮಹಾರಾಜ್ ಅವರ ವಿಭಿನ್ನ ಅವತಾರದ ಮೂಲಕ ಎಂಬುದೇ ವಿಶೇಷ.

ಮನುರಂಜನ್ ರವಿಚಂದ್ರನ್ ಅಭಿನಯದ ಮುಗಿಲ್ ಪೇಟೆ ಚಿತ್ರದ ಮೂಲಕ ಹೊಸ ಇತಿಹಾಸ ಬರೆಯಲು ಸಾಧು ಕೋಕಿಲ ಹೊರಟಿದ್ದಾರೆ.

ಈ ಚಿತ್ರದಲ್ಲಿ ಸಾಧು ಮಹಾರಾಜ್  17 ಪಾತ್ರಗಳಲ್ಲಿ ಪ್ರೇಕ್ಷಕರ ಮುಂದೆ ಪ್ರತ್ಯಕ್ಷರಾಗಲಿದ್ದಾರಂತೆ. ಆ ಮೂಲಕ ಲಿಮ್ಕಾ ರೆಕಾರ್ಡ್​ಗೆ ಸೇರ್ಪಡೆಯಾಗಲು ರೆಡಿಯಾಗಿದ್ದಾರೆ.

ಭರತ್ ನಿರ್ದೇಶನದ ಮುಗಿಲ್ ಪೇಟೆ ಚಿತ್ರದಲ್ಲಿ ಸಾಧುವಿನ ವಿಭಿನ್ನ ಅವತಾರಗಳು ಮೂಡಿಬರಲಿದ್ದು, ಇದಕ್ಕಾಗಿ ಸಕಲ ತಯಾರಿಯಲ್ಲಿದ್ದಾರೆ ಸಾಧು ಮಹಾರಾಜ್.

ಒಟ್ಟಿನಲ್ಲಿ ಹೊಟ್ಟೆ ಹುಣ್ಣಾಗುವಂತೆ ನಗಿಸುವ ಸಾಧು ಕೋಕಿಲ ಅವರ ಹೆಸರಿಗೆ ಲಿಮ್ಕಾ ದಾಖಲೆ ಶೀಘ್ರದಲ್ಲೇ ಸೇರ್ಪಡೆಯಾಗಲಿ ಎಂದು ಆಶಿಸೋಣ.