Indian Army- ಹಾಸನದ ಪ್ರೀತಿ, ವಿಶ್ವಸಂಸ್ಥೆ ಕರ್ತವ್ಯಕ್ಕೆ ಆಯ್ಕೆಯಾದ ರಾಜ್ಯದ ಏಕೈಕ ಸೈನಿಕ ಮಹಿಳೆ

ಹೆಣ್ಣುಮಕ್ಕಳು ಹುಟ್ಟಿದರೆ ತಲೆಯ ಮೇಲೆ ಕೈಹೊತ್ತು ಕೂರುತ್ತಾರೆ. ಹಿಂದಿನಿಂದಲೂ ಹೆಣ್ಣು ಕೇವಲ ಅಡುಗೆ ಮನೆಗೆ ಮಾತ್ರ ಸೀಮಿತ ಎಂಬ ಮಾತಿದೆ. ಕಾಲ ಉರುಳಿದಂತೆ ಮಹಿಳೆಯರಿಗೆ ಎಲ್ಲಾ ಕ್ಷೇತ್ರದಲ್ಲೂ ಮೀಸಲಾತಿ ನೀಡಲಾಗುತ್ತಿದೆ. ಹೆಣ್ಣುಮಕ್ಕಳು ಗಂಡುಮಕ್ಕಳಂತೆಯೇ ಅಂತರಾಷ್ಟ್ರೀಯ ಮಟ್ಟದಲ್ಲಿ ಸಾಧನೆ ಮಾಡುತ್ತಿದ್ದಾರೆ. ಇದಕ್ಕೆ ತಾಜಾ ಉದಾಹರಣೆ ಎಂಬಂತೆ ಹಾಸನ ಜಿಲ್ಲೆಯ ಮಹಿಳೆಯೊಬ್ಬರು ವಿಶ್ವಸಂಸ್ಥೆ ಕರ್ತವ್ಯಕ್ಕೆ ಆಯ್ಕೆಯಾಗಿದ್ದಾರೆ.

ಈಕೆಯ ಹೆಸರು ಪ್ರೀತಿ. ಹಾಸನ ಜಿಲ್ಲೆ ಅರಕಲಗೂಡು ತಾಲ್ಲೂಕಿನ ಮಾದಾಪುರ ಗ್ರಾಮದ ದಿವಂಗತ ಬಸಪ್ಪ ಮತ್ತು ಜಯಮ್ಮ ದಂಪತಿಯ ಮೂರು ಮಕ್ಕಳಲ್ಲಿ ಈಕೆ ಕೊನೆಯ ಪುತ್ರಿ.

ಡಿಸೆಂಬರ್ 26, 1992 ರಂದು ಜನಿಸಿದ ಪ್ರೀತಿ ಅವರು ಪ್ರಾಥಮಿಕ ಶಿಕ್ಷಣ ಓದುವಾಗಲೇ ಕ್ರೀಡೆಯಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿದ್ದರು. ಬಿಎ ಓದುತ್ತಿರುವುವಾಗಲೇ ಪ್ರೀತಿಗೆ ಮದುವೆ ಮಾಡಲು ಮನೆಯವರು ನಿರ್ಧರಿಸಿದ್ದರು. ಆದರೆ ಪ್ರೀತಿಗೆ ವಿದ್ಯಾಭ್ಯಾಸ ಪೂರ್ಣಗೊಳಿಸಿ ಸರ್ಕಾರಿ ನೌಕರಿಗೆ ಸೇರಬೇಕೆಂಬ ಮಹದಾಸೆ ಇಟ್ಟುಕೊಂಡಿದ್ದರು.

ಆದರೆ ಪದವಿ ಓದುವಾಗಲೇ 2014 ರ ಮಾರ್ಚ್ 27 ರಂದುಹೊಳೆನರಸೀಪುರ ತಾಲೂಕು ಬೆಟ್ಟದ ಸಾತೇನಹಳ್ಳಿ ಗ್ರಾಮದ ಷಣ್ಮುಖ ಅವರೊಂದಿಗೆ ಪ್ರೀತಿ ಮದುವೆ ಆಯಿತು.

ಪ್ರೀತಿ, ನಂತರ ಬಿಎಡ್ ಕೋರ್ಸ್ಗೆ ಸೇರಿದ ಆರು ತಿಂಗಳಲ್ಲಿಯೇ ಭಾರತೀಯ ಸೇನೆಗೆ ಆಯ್ಕೆಯಾದರು. ಕುಟುಂಬಸ್ಥರ ಒಪ್ಪಿಗೆ ಪಡೆದು ಭಾರತೀಯ ಸೇನೆಯ ಅಸ್ಸಾಂ ರೈಫಲ್ ಬೆಟಾಲಿಯನ್-9 ಕ್ಕೆ ಸೇರ್ಪಡೆಗೊಂಡರು.

ಅಸ್ಸಾಂನಲ್ಲಿ ಕರ್ತವ್ಯದ್ದಲ್ಲಿದ್ದಾಗ ನಾಗಾಲ್ಯಾಂಡ್ನಲ್ಲಿ ವಾಸವಿದ್ದರು. ಎಂಟು ವರ್ಷಗಳ ಕಾಲ ಸೇನೆಯಲ್ಲಿ ಸೇವೆ ಸಲ್ಲಿಸಿರುವ ಪ್ರೀತಿ ಅವರು ವಿಶ್ವ ಸಂಸ್ಥೆಯಲ್ಲಿ ಕರ್ತವ್ಯ ನಿರ್ವಹಿಸಲು ನಡೆಸುವ ರೈಫಲ್ ಶೂಟಿಂಗ್ ಆಯ್ಕೆ ಪರೀಕ್ಷೆಯಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿ ನಮ್ಮ ರಾಜ್ಯದಿಂದ ಆಯ್ಕೆಯಾಗಿರುವ ಏಕೈಕ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ವಿಶ್ವಸಂಸ್ಥೆ ಶಾಂತಿಸೇನಾ ಪಡೆ ಪರೀಕ್ಷೆಗೆ ಹಾಜರಾಗಿ 2020ರಲ್ಲಿ ಪ್ರೀತಿ ಆಯ್ಕೆಯಾಗಿ ದೆಹಲಿಗೆ ತರಬೇತಿಗೆಂದು ತೆರಳಿದರು. ಆಗ ಪತಿ ಷಣ್ಮುಖ ಹಾಗೂ ಮಕ್ಕಳು ಊರಿಗೆ ವಾಪಸ್ಸಾಗಿದ್ದರು.

ಎಂ.ಬಿ. ಪ್ರೀತಿ ಅವರ ಪತಿ ಷಣ್ಮುಖ ಕೃಷಿಕರು. ಹೆಂಡತಿ ಸೇನೆಗೆ ಸೇರಲು ಬಯಸಿದಾಗ ಏನೋ ಆತಂಕ. ಸಂಬಂಧಿಕರು, ಗ್ರಾಮಸ್ಥರು ಮಾತುಗಳಿಂದ ಕುಟುಕುತ್ತಿದ್ದರು. ಎಲ್ಲವನ್ನೂ ಬದಿಗೊತ್ತಿ ಪತ್ನಿಯ ಬೆಂಬಲಕ್ಕೆ ನಿಂತರು. ಇದೀಗ ವಿಶ್ವ ಸಂಸ್ಥೆಯಲ್ಲಿ ಕೆಲಸ ಮಾಡಲು ಅವಕಾಶ ಸಿಕ್ಕಿರುವುದಕ್ಕೆ ಹೆಮ್ಮೆ ಪಡುತ್ತಿದ್ದಾರೆ.

ಪ್ರೀತಿ ಷಣ್ಮುಗ ದಂಪತಿಗಳಿಗೆ ಮೂರು ವರ್ಷದ ಜೀವನ್, ಎರಡು ವರ್ಷದ ಸಿಂಚನಾ ಎಂಬ ಮಕ್ಕಳಿದ್ದಾರೆ. ಪತ್ನಿಗೆ ಆಗಾಗ್ಗೆ ವಿಡಿಯೋ ಕಾಲ್ ಮಾಡಿ ಮಕ್ಕಳನ್ನು ತೋರಿಸಿ ಮಾತನಾಡುತ್ತಿದ್ದಾರೆ. ಒಟ್ಟಾರೆ ಸೈನಿಕ ಮಹಿಳೆಯ ಸಾಧನೆಯನ್ನು ಹಾಸನ ಜಿಲ್ಲೆಯ ಜನ ಕೊಂಡಾಡುತ್ತಿದ್ದಾರೆ.