ಹಗ್ಗ ಹಿಡಿದು ಹಳ್ಳ ದಾಟುವ ಜನರು; ಕೊಪ್ಪಳದ ಈ ಗ್ರಾಮದ ಪರಿಸ್ಥಿತಿ ಶೋಚನೀಯ

ಗದಗ ಜಿಲ್ಲೆಯ ಗಜೇಂದ್ರಗಡ ಭಾಗ, ಮುಧೋಳ, ಕರಮುಡಿ ಸೇರಿ ವಿವಿಧೆಡೆ ಪ್ರದೇಶದಿಂದ ಹರಿಯುವ ಹಳ್ಳ ನದಿಯ ಪ್ರಮಾಣದಲ್ಲಿ ಹರಿಯುತ್ತಿದೆ. ಯಲಬುರ್ಗಾ ತಾಲೂಕಿನಲ್ಲಿ ಸೋಮವಾರ ಮಧ್ಯಾಹ್ನದಿಂದ ಭಾರಿ ಮಳೆ ಸುರಿಯಿತು. ಮಳೆಯಿಂದಾಗಿ ಹಳ್ಳಕೊಳ್ಳಗಳು ಭರ್ತಿಯಾಗಿ ತುಂಬಿ ಹರಿದವು, ಇದೇ ಸಮಯದಲ್ಲಿ ಬಂಡಿಹಾಳ ಬಳಿಯ ಹಳ್ಳವು ಸಹ ತುಂಬಿ ಹರಿದಿದೆ. ಹಳ್ಳಕ್ಕೆ ಇದ್ದ ಸಣ್ಣ ಸೇತುವೆ ಮುಳಗಡೆಯಾಗಿದೆ.

ಈ ಮಧ್ಯೆ ಮುಂಜಾನೆ ಬಂಡಿಹಾಳದ ರೈತರು ಹಳ್ಳ ದಾಟಿ ಹೊಲದಲ್ಲಿ ದುಡಿಯಲು ಹೋಗಿದ್ದರು. ಹೊಲದಲ್ಲಿ ದುಡಿಯುತ್ತಿರುವಾಗಲೇ ಮಧ್ಯಾಹ್ನದಿಂದ ಭರ್ಜರಿ ಮಳೆ ಸುರಿದಿದೆ. ಎತ್ತು, ಬಂಡಿ ದನಕರುಗಳೊಂದಿಗೆ ಹೊಲದಲ್ಲಿದ್ದವರು ಮಳೆ ಕಡಿಮೆಯಾಗುತ್ತದೆ ಎಂದು ಕಾಯ್ದಿದ್ದಾರೆ.

ಸಂಜೆಯಾದರೂ ಮಳೆ ಇತ್ತು. ಮದ್ಯಾಹ್ನದಿಂದ ಮಳೆ ಸುರಿದಿದ್ದರಿಂದ ಹಳ್ಳ ತುಂಬಿತ್ತು. ಈ ದಡದಿಂದ ತಮ್ಮ ಗ್ರಾಮದತ್ತ ಇರುವ ದಡ ಸೇರಲು ಆಗದಂಥ ಸ್ಥಿತಿ. ರಾತ್ರಿಯೊಳಗೆ ಮನೆ ಸೇರುವ ತವಕ. ಹೊಲದಲ್ಲಿಯೇ ಮಳೆಯಲ್ಲಿ ಇರಲು ಅನುಕೂಲವಿಲ್ಲ.

ಈ ಕಾರಣಕ್ಕೆ ಹಳ್ಳದ ದಡದಲ್ಲಿ ಕೆಲವು ಯುವಕರು ಧೈರ್ಯದಿಂದ ಒಂದು ಹಗ್ಗ ಹಿಡಿದು ಗ್ರಾಮದತ್ತ ಇರುವ ದಡ ಸೇರಿದರು.

ನಂತರ ಇದೇ ಹಗ್ಗವನ್ನು ಹಿಡಿದುಕೊಂಡು ನೂರಾರು ಜನರು ಹಳ್ಳ ದಾಟಿ ತಮ್ಮ ತಮ್ಮ ಮನೆ ಸೇರಿದ್ದಾರೆ.

ನಡುಮಟ್ಟದ ಹಳ್ಳದ ನೀರು, ರಭಸವಾಗಿ ಹರಿಯುತ್ತಿರುವಾಗ ಹಳ್ಳ ಅಪಾಯ ತರುವ ಸಾಧ್ಯತೆ ಇತ್ತು. ಆದರೂ ಗಟ್ಟಿ ಮನಸ್ಸು ಮಾಡಿ ಎಲ್ಲರು ಹಳ್ಳ ದಾಟಿದ್ದಾರೆ. ಇದರಲ್ಲಿ ಬಹಳಷ್ಟು ಜನ ಕೂಲಿಕಾರರು, ಇನ್ನೂ ಮಹಿಳೆಯರು ವೃದ್ದರಿದ್ದರು. ಅವರೆಲ್ಲರೂ ನಿತ್ಯ ಕೆಲಸಕ್ಕೆ ಹೋಗುವಂತೆ ಹೊಲಕ್ಕೆ ಹೋಗಿದ್ದರು. ಆದರೆ ಸಂಜೆ ವೇಳೆಗೆ ಮನೆಗೆ ಮರಳುವಾಗ ಹಳ್ಳದಲ್ಲಿ ಭಾರಿ ಪ್ರವಾಹ ಉಂಟಾಗಿತ್ತು.

ಒಂದು ಕಡೆ ಹೊಲಕ್ಕೆ ಹೋದವರಲ್ಲಿ ಒಬ್ಬೊಬ್ಬರಾಗಿ ಹಳ್ಳದ ದಡಕ್ಕೆ ಬಂದು ಸೇರಿದರು. ಇನ್ನೊಂದು ಕಡೆ ತಮ್ಮ ಸಂಬಂಧಿಗಳು ಹೊಲದಿಂದ ಹಳ್ಳ ಹೇಗೆ ದಾಟಿ ಬರುತ್ರಾರೆ ಎಂಬ ಚಿಂತೆಯಲ್ಲಿದ್ದರು.

ಎರಡು ಕಡೆಯೂ ಆತಂಕ. ಹಳ್ಳದ ನೀರು ಇಳಿಕೆಯಾದರೆ ಹಳ್ಳ ದಾಟಬಹುದು ಎಂದು ಸುಮಾರು ಹೊತ್ತು ಕಾಯ್ದಿದ್ದಾರೆ. ಆದರೆ ಸಂಜೆಯಾದರೂ ಹಳ್ಳದಲ್ಲಿ ನೀರು ಇಳಿಯಲಿಲ್ಲ. ಇಲ್ಲಿಯೇ ಇದ್ದರೆ ಇಡೀ ರಾತ್ರಿ ಇಲ್ಲಿಯೇ ಕಳೆಯಬೇಕಾಗುತ್ತದೆ ಎನ್ನುವ ಸ್ಥಿತಿಯಲ್ಲಿ ಅವರಿಗೆ ಹಗ್ಗ ಸಹಾಯಕ್ಕೆ ಬಂದಿದೆ.

ಇವತ್ತು ಹೇಗೊ ದಾಟಿದ್ದೇವೆ, ಮುಂದೆ ಹೊಲಕ್ಕೆ ಹೋದಾಗ ಮತ್ತೆ ಹಳ್ಳ ಬಂದರೆ ಎಂಬ ಆತಂಕದಲ್ಲಿದ್ದಾರೆ ಗ್ರಾಮಸ್ಥರು.

ಈ ಹಳ್ಳ ಪ್ರತಿ ವರ್ಷ ತುಂಬಿ ಹರಿಯುತ್ತಿದೆ, ಮಳೆ ಜೋರಾದಾಗ ಹಳ್ಳ ದಾಟುವುದು ಕಷ್ಟವಾಗಿದೆ. ಈ ಮಧ್ಯೆ ಕಳೆದ ವರ್ಷ ಕರಮುಡಿಯಲ್ಲಿ ಹಳ್ಳ ದಾಟಲು ಹೋಗಿ ಇಬ್ಬರು ನೀರು ಪಾಲಾಗಿದ್ದರು. ಈ ಹಳ್ಳಕ್ಕೆ ಸೇತುವೆಗಳನ್ನು ನಿರ್ಮಿಸಿ ಸರ್ವ ಋತು ಸೇತುವೆ ನಿರ್ಮಿಸಬೇಕೆಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.