ಮಹಿಳೆಯರ ಹಬ್ಬ ನಾಗರ ಪಂಚಮಿ ವೇಳೆ ಶಕ್ತಿ ಪ್ರದರ್ಶನ ; ಸಾಹಸ ಕ್ರೀಡೆಯಲ್ಲಿ ಸಿಂಧಗಿ ಯುವಕರ ವಿನೂತನ ಸಾಧನೆ

ನಾಗರ ಪಂಚಮಿ ಬಂತೆಂದರೆ ಸಾಕು ಮಹಿಳೆಯರು, ಪುರುಷರು, ಮಕ್ಕಳು ಹಾಗೂ ಹಿರಿಯರಿಗೂ ಸಂತಸ ತರುವ ಹಬ್ಬ. ಅದರಲ್ಲೂ ಉತ್ತರ ಕರ್ನಾಟಕದಲ್ಲಿ ಈ ಹಬ್ಬಕ್ಕೆ ಎಲ್ಲಿಲ್ಲದ ಮಹತ್ವ. ತರಹೇವಾರಿ ಖಾದ್ಯಗಳನ್ನು ತಯಾರಿಸಿ ಸಿಹಿ, ಖಾರದ ಸಮ್ಮಿಳಿತ ಆಹಾರ ಸೇವನೆ ಈ ನಾಗರ ಪಂಚಮಿಯ ವಿಶೇಷ.

ಈ ಹಬ್ಬದಂದ ಮಹಿಳೆಯರು ತಮ್ಮ ತವರು ಮನೆಗೆ ಮರಳಿ ನಾಗದೇವತೆಯ ಪೂಜೆ ಸಲ್ಲಿಸುವುದು ಸಂಪ್ರದಾಯವಿದೆ. ಅದರ ಜೊತೆಗೆ ಮನೆಗೆ ಮಗಳ ಆಗಮನ ಹಿರಿಯರಲ್ಲಿ ಸಂತಸ ತಂದರೆ ತರಹೇವಾರಿ ತಿಂಡಿಗಳು ಮಕ್ಕಳ ಮನಸೂರೆಗೊಳ್ಳುತ್ತವೆ. ಇದರ ಜೊತೆಯಲ್ಲಿಯೇ ಬಸವನಾಡು ವಿಜಯಪುರ ಜಿಲ್ಲೆಯಲ್ಲಿ ನಾಗರ ಪಂಚಮಿ ಅಂಗವಾಗಿ ನಡೆಯುವ ಶಕ್ತಿ ಪ್ರದರ್ಶನದ ಸಾಹಸ ಕ್ರೀಡೆಗಳು ಪುರುಷರಿಗೆ ಹೇಳಿ ಮಾಡಿಸಿದಂತಿವೆ.

ವಿಜಯಪುರ ಜಿಲ್ಲೆಯಲ್ಲಿ ಇಂಥದ್ದೆ ಕ್ರೀಡೆಗಳು ಈಗ ಗಮನ ಸೆಳೆದಿವೆ. ಸಿಂದಗಿ ತಾಲೂಕಿನ ಕೊಕಟನೂರ ಗ್ರಾಮದ 16 ವರ್ಷದ ಯುವಕರಾದ ಆಕಾಶ ಕೆಂಚಪ್ಪ ತಳವಾರ ಮತ್ತು ಪ್ರಶಾಂತ ಮಾಳಪ್ಪ ಸಾತಿಹಾಳ ವಿನೂತನ ಸಾಧನೆ ಮಾಡಿದ್ದಾರೆ.

ಎತ್ತಿನ ಗಾಡಿಯ ನೊಗಕ್ಕೆ ಎತ್ತುಗಳ ಬದಲು ಸ್ವಂತ ಹೆಗಲು ಕೊಟ್ಟು 4 ಕಿ. ಮೀ. ಎಳೆಯುವ ಮೂಲಕ ಭಲೆ ಜೋಡಿ ಎನಿಸಿಕೊಂಡಿದ್ದಾರೆ. ಇವರು ಎಳೆದ ಎತ್ತಿನ ಗಾಡಿಯಲ್ಲಿ ತಲಾ ಸುಮಾರು 130 ಕೆಜಿ ತೂಕದ ಜೋಳದ ಚೀಲಗಳನ್ನು ಹೇರಲಾಗಿತ್ತು.  ಅಲ್ಲದೇ, ಆ ಚೀಲಗಳ ಮೇಲೆ ವ್ಯಕ್ತಿಯೊಬ್ಬನನ್ನು ಕೂಡಿಸಿಕೊಂಡು ಸುಮಾರು 1300 ಕೆಜಿ ಗಾಡಿಯನ್ನು ಎಳೆದು ಗಮನ ಸೆಳೆದಿದ್ದಾರೆ.

ಮಣ್ಣಿನ ಮಕ್ಕಳ ಈ ಸಾಧನೆ ಗ್ರಾಮಸ್ಥರಲ್ಲೂ ಸಂತಸ ಮೂಡಿಸಿದ್ದು, ಇವರ ಜೊತೆ ಫೋಟೋ ಕ್ಲಿಕ್ಕಿಸಿಕೊಂಡು ಸಂಭ್ರಮಿಸಿದ್ದಾರೆ.

ಇವರು ಎತ್ತಿನ ಗಾಡಿಯ ನೊಗಕ್ಕೆ ಹೆಗಲು ಕೊಟ್ಟು ಎಳೆಯುತ್ತಿದ್ದರೆ ಇವರ ಮುಂದೆ ಹಲಗೆ ಬಾರಿಸುತ್ತ, ಕುಣಿದು ಕುಪ್ಪಳಿಸುತ್ತ, ಇವರ ಮೇಲೆ ಚುರುಮುರಿ ಹಾರಿಸುವ ಮೂಲಕ ಈ ಯುವಕರಿಗೆ ಹುರುಪು ತುಂಬಿ ಹುರಿದುಂಬಿಸಿದ್ದಾರೆ.

ಯುವಕರು ಎತ್ತಿನ ಗಾಡಿಯನ್ನು ಎಳೆಯುತ್ತಿದ್ದರೆ, ಉಳಿದ ಜನರು ಈ ಯುವಕರಲ್ಲಿ ತಮ್ಮನ್ನು ತಾವೇ ಕಂಡುಕೊಂಡು ಸಂತಸಪಟ್ಟಿದ್ದು ಈ ಭಾಗದಲ್ಲಿ ಗ್ರಾಮೀಣ ಕ್ರೀಡೆಗಳ ಕಡೆ ಜನರಿಗಿರುವ ಆಸಕ್ತಿ ಮತ್ತು ಇವರು ಈ ಕ್ರೀಡೆಗಳಿಗೆ ಇವರು ತೋರುತ್ತಿರುವ ಪ್ರೀತಿಗೆ ಸಾಕ್ಷಿಯಾಗಿದೆ.

ಮತ್ತೋಂದೆಡೆ ಇದೇ ಸಿಂದಗಿ ತಾಲೂಕಿನ ಹಂದಿಗನೂರ ಗ್ರಾಮದಲ್ಲಿ ಸಾರಿಗೆ ಇಲಾಖೆ ನೌಕರನೊಬ್ಬ ಕೂಡ ವಿಶೇಷ ಸಾಧನೆ ಮಾಡಿದ್ದಾನೆ.  48 ನಿಮಿಷಗಳಲ್ಲಿ 5 ಕೀ.ಮೀ ಆಟೋವನ್ನು ಎಳೆದು ಪಂಚಮಿಯ ಬೆಟ್ ಗೆದ್ದು ಸಾಹಸ ಮೆರೆದಿದ್ದಾನೆ.

ಅಮೋಘಸಿದ್ಧ ನಾಯ್ಕೋಡಿ ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರು ಡಿವಿಜನ್ ನಲ್ಲಿ ಸಾರಿಗೆ ನಿರ್ವಾಹಕನಾಗಿದ್ದು.  ಪಂಚಮಿ ಹಿನ್ನೆಲೆಯಲ್ಲಿ ಇವರು ವಿಜಯಪುರ ಜಿಲ್ಲೆಯ ಸಿಂದಗಿ ತಾಲೂಕಿನ ಹಂದಿಗನೂರ ಗ್ರಾಮಕ್ಕೆ ಆಗಮಿಸಿದ್ದರು.

ನಾಗರ ಪಂಚಮಿಯ ಅಂಗವಾಗಿ ಈತನ ಸ್ನೇಹಿತರು ಚಾಲೆಂಜ್ ಇಟ್ಟಿದ್ದರು. ಸೊಂಟಕ್ಕೆ ಹಗ್ಗ ಕಟ್ಟಿಕೊಂಡು ಆ ಹಗ್ಗದ ಮೂಲಕ ಒಂದು ಗಂಟೆಯಲ್ಲಿ ಆಟೋವನ್ನು ಐದು ಕಿ. ಮೀ  ಎಳೆಯಬೇಕು ಎಂಬ ಷರತ್ತು ಇತ್ತು. ಈ ಶರತ್ತನ್ನು ಅಮೋಘಸಿದ್ಧ ನಾಯ್ಕೋಡಿ ಕೇವಲ 45 ನಿಮಿಷಗಳಲ್ಲಿ ಪೂರೈಸುವ ಮೂಲಕ ಭಲೇ ಕಿಲಾಡಿ ಎನಿಸಿಕೊಂಡಿದ್ದಾರೆ.

ನಾಗರ ಪಂಚಮಿ ಹಬ್ಬ ತರಹೇವಾರಿ ಫಲಹಾರ ಮತ್ತು ತಿಂಡಿಗಳನ್ನು ತಯಾರಿಸುವುದಕ್ಕಷ್ಟೆ ಹೆಸರುವಾಸಿಯಾಗಿಲ್ಲ.  ಬದಲಾಗಿ ಯುವಕರು ಕೂಡ ನಾನಾ ರೀತಿಯ ವಿಶಿಷ್ಠ ಸಾಧನೆಗೂ ಅವಕಾಶ ಕಲ್ಪಿಸುವುದು ಬಸವನಾಡಿನ ವಿಶೇಷವಾಗಿದೆ.