Rape- ನಗ್ನ ವಿಡಿಯೋ ಮಾಡಿ ಅಪ್ರಾಪ್ತೆಗೆ ಬ್ಲ್ಯಾಕ್​ಮೇಲ್; ಚಿಕ್ಕಮಗಳೂರಲ್ಲಿ ನಿರಂತರ ಅತ್ಯಾಚಾರ

ನಯವಂಚಕನೊಬ್ಬ ತನ್ನದೇ ಹಳ್ಳಿಯ ಅಪ್ರಾಪ್ತ ವಯಸ್ಸಿನ ಬಾಲಕಿ ಬಟ್ಟೆ ಬದಲಿಸುವ ದೃಶ್ಯವನ್ನ ವಿಡಿಯೋ ಮಾಡ್ಕೊಂಡು ಆಕೆಗೆ ಅದನ್ನು ತೋರಿಸಿ, ನಾನು ಕರೆದಾಗ ಬರಬೇಕು ಎಂದು ಅಪ್ರಾಪ್ತೆಗೆ ಬೆದರಿಸಿ ಅತ್ಯಾಚಾರ ಮಾಡಿರುವ ಘಟನೆ ಚಿಕ್ಕಮಗಳೂರು ಜಿಲ್ಲೆ ಕಡೂರು ತಾಲೂಕಿನ ಸಖರಾಯಪಟ್ಟಣ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

ನಾನು ಕರೆದಾಗ ಬರಬೇಕು. ಇಲ್ಲ ಅಂದ್ರೆ ಫೇಸ್ಬುಕ್, ವಾಟ್ಸಾಪ್ನಲ್ಲಿ ವಿಡಿಯೋ ಹಾಕಿ ನಿನ್ನ ಮರ್ಯಾದೆ ಕಳೆಯುತ್ತೇನೆ ಎಂದು ಹೆದರಿಸಿ ಅಪ್ರಾಪ್ತೆಯ ಮೇಲೆ ಎರಡು ತಿಂಗಳಿನಿಂದ ಅತ್ಯಾಚಾರ ಎಸಗಿದ್ದಾನೆ.

ಅನಿಲ್ ನಾಯ್ಕ ಅತ್ಯಾಚಾರ ಎಸಗಿರೋ ಆರೋಪಿ. ಅನಿಲ್ನ ಈ ಹೀನ ಕೃತ್ಯಕ್ಕೆ ಗ್ರಾಮದ ಕಾರ್ತಿಕ್ ಎಂಬಾತನೂ ಸಪೋರ್ಟ್ ಮಾಡಿದ್ರೆ, ಬಾಲಾಜಿ ಹಾಗೂ ಅಖಿಲೇಶ್ ಇಬ್ಬರೂ ಆಕೆಗೆ ರಸ್ತೆಯಲ್ಲಿ ಓಡಾಡುವಾಗ ರೇಗಿಸುತ್ತಿದ್ದರೆನ್ನಲಾಗಿದೆ.

ಆದ್ರೆ, ಮೊನ್ನೆ ಗ್ರಾಮದಲ್ಲಿ ಗಣಪತಿ ವಿಸರ್ಜನೆ ವೇಳೆ ಊರಿನ ಯುವಕರ ಬಾಯಲ್ಲಿ ಆ ಅಪ್ರಾಪ್ತೆಯ ವಿಡಿಯೋದು ಸುದ್ದಿಯಾಗಿದೆ. ವಿಷಯ ತಿಳಿದವರು ಹುಡುಗಿಯ ಚಿಕ್ಕಪ್ಪನಿಗೆ ಇದನ್ನು ಮುಟ್ಟಿಸಿದ್ದಾರೆ. ಬಾಲಕಿಯನ್ನ ಕರೆದು ಕೇಳಿದಾಗ ನಡೆದದ್ದೆಲ್ಲವನ್ನೂ ವಿವರಿಸಿದ್ದಾಳೆ.

ಮನೆಯವರು ದೂರು ನೀಡುತ್ತಿದ್ದಂತೆ ಪೊಲೀಸರು ಒಟ್ಟು ನಾಲ್ವರಲ್ಲಿ ಅನಿಲ್ ನಾಯ್ಕ, ಬಾಲಾಜಿ ನಾಯ್ಕ ಎಂಬ ಇಬ್ಬರನ್ನ ಬಂಧಿಸಿ ಕೇಸ್ ದಾಖಲಿಸಿದ್ದಾರೆ. ಇನ್ನು ಇದೇ ಗ್ರಾಮದ ಕಾರ್ತಿಕ್ ಎಂಬಾತ ಅತ್ಯಾಚಾರಕ್ಕೆ ತನ್ನ ಮನೆಯನ್ನೇ ನೀಡಿದ್ದಾನೆ. ಎರಡೂವರೆ ತಿಂಗಳು ಆ ಅಪ್ರಾಪ್ತೆಯನ್ನ ಕಾರ್ತಿಕ್ ಮನೆಯಲ್ಲೇ ಅತ್ಯಾಚಾರ ಮಾಡಲಾಗಿದೆ. ಹಾಗಾಗಿ, ಅಂದು ಮನೆ ನೀಡಿದೋನು ಇಂದು ಜೈಲಲ್ಲಿ ಅನಿಲ್ ಜೊತೆ ಸೆಲ್ ಶೇರ್ ಮಾಡಿಕೊಳ್ಳಲು ರೆಡಿ ಇದ್ದಾನೆ.

ಅನಿಲ್ ಅಪ್ರಾಪ್ತೆ ಮೇಲೆ ಅತ್ಯಾಚಾರಗೈಯುವುದನ್ನೂ ರೆಕಾರ್ಡ್ ಮಾಡಿಕೊಂಡಿದ್ದನಂತೆ. ಬಾಲಕಿ ಬಟ್ಟೆ ಬದಲಿಸುವ ವಿಡಿಯೋವನ್ನ ನೋಡಿದ್ದ ಅದೇ ಗ್ರಾಮದ ಬಾಲಾಜಿ ಹಾಗೂ ಅಖಿಲೇಶ್ ಎಂಬ ಮತ್ತಿಬ್ಬರು ಆಕೆ ರಸ್ತೆಯಲ್ಲಿ ಓಡಾಡುವಾಗ ನಿನ್ನ ವಿಡಿಯೋ ನೋಡಿದ್ದೇನೆ, ವಿಡಿಯೋ ಸೂಪರ್ ಅಂತ ರೇಗಿಸುತ್ತಿದ್ದರು.

ವಿಷಯ ತಿಳಿದು ಕೇಸ್ ಆಗುತ್ತಿದ್ದಂತೆ ರೆಕಾರ್ಡ್ ಮಾಡ್ಕೊಂಡೋನು, ಮನೆ ಕೊಟ್ಟೋನು, ರಸ್ತೆಯಲ್ಲಿ ಕೀಟಲೆ ಮಾಡುತ್ತಿದ್ದವರು ಎಲ್ಲರ ಮೇಲೂ ಕೇಸ್ ದಾಖಲಾಗಿದೆ.

ಒಟ್ಟಾರೆ, ಒಂದೇ ಹಳ್ಳಿ. ಹೆಚ್ಚೆಂದರೆ ಅಕ್ಕ-ಪಕ್ಕದ ಬೀದಿಯವರು. ಕಣ್ಮುಂದೆ ಬೆಳೆದ ಹುಡುಗಿಯನ್ನ ಪ್ರೀತಿ-ವಿಶ್ವಾಸ ಸಂಬಂಧದ ಅರಿವೇ ಇಲ್ಲದಂತೆ ಬೆದರಿಸಿ ಬೇಕಾದಂತೆಲ್ಲಾ ಬಳಸಿಕೊಳ್ಳೋ ಇಂತಹ ನಯವಂಚಕರಿಗೆ ಯಾವ ಶಿಕ್ಷೆಯೂ ಕಡಿಮೆ ಅನಿಸುತ್ತೆ.

ಹೆತ್ತವರು ಕೆಲಸ ಮಾಡುವ ಜಾಗದಲ್ಲಿ, ರಸ್ತೆಯಲ್ಲಿ ಓಡಾಡುವಾಗ, ಶಾಲಾ-ಕಾಲೇಜಿಗೆ ಹೋಗಿ ಬರುವಾಗ ಹುಷಾರು ಅನ್ನುತ್ತಿದ್ದರು. ಆದರೀಗ, ಹಳ್ಳಿಯಲ್ಲಿ, ಮನೆಯ ಅಕ್ಕಪಕ್ಕದಲ್ಲೂ ಹೀಗೆ ಅಂದ್ರೆ ಹೆಣ್ಮಕ್ಕಳು ಬದುಕೋದಾದರೂ ಹೇಗೆಂಬ ಪ್ರಶ್ನೆ ಮೂಡಿದೆ. ಈ ಮಧ್ಯೆ ಊರಿನ ಜನ ಈ ನಯವಂಚಕರಿಗೆ ಸಮಾಜಕ್ಕೆ ಮಾದರಿಯಾಗುವಂತಹಾ ಶಿಕ್ಷೆ ನೀಡಬೇಕೆಂದು ಆಗ್ರಹಿಸಿದ್ದಾರೆ.