Dark Elite: ಹಾಲಿವುಡ್ ವೇಷ ಧರಿಸಿದ ಉಡುಪಿ ಕಲಾವಿದ, ಇವನ ರೂಪ ನೋಡಿದ್ರೇ ಮೈ ಜುಂ ಎನ್ನುತ್ತೆ!

ನೊಂದವರ ಪರ ಮಿಡಿಯುವ ಹೃದಯ ಈಗಿನ ಕಾಲದಲ್ಲಿ ಬಹಳ ವಿರಳ.. ಕೋಟಿ ಕೋಟಿ ಹಣವಿದ್ರೂ ಸಹಾಯ ಮಾಡಬೇಕೆನ್ನುವ ಮನಸ್ಸು ಇರೋರು ಈ ದುನಿಯಾದಲ್ಲಿ ಬೆರಳೆಣಿಕೆ ಮಂದಿಗೆ ಮಾತ್ರ. ಆದ್ರೆ ಮನೆಯಲ್ಲಿ ಆರ್ಥಿಕವಾಗಿ ಕಷ್ಟವಿದ್ರೂ ಬಣ್ಣ ಹಚ್ಚಿ ಲಕ್ಷಾಂತರ ಹಣವನ್ನ ನೊಂದವರಿಗೆ ನೀಡಿದ್ದಾನೆ ಈ ಯುವಕ.

ಈ ಫ್ಯಾಂಟಸಿ ರೂಪದಲ್ಲಿರುವ ಯುವಕನ ಹೆಸರು ರವಿ ಕಟಪಾಡಿ. ವಯಸ್ಸು 36.. ಉಡುಪಿ ಜಿಲ್ಲೆ ಕಾಪು ತಾಲೂಕಿನ ಕಟಪಾಡಿ ಗ್ರಾಮದ ನಿವಾಸಿ.. ಗಾರೆ ಕೆಲಸ ವೃತ್ತಿ ಮಾಡುವ ರವಿ ಕಟಪಾಡಿ ಫ್ಯಾಂಟಸಿ ವೇಷ ಹಾಕಿದ್ರೂ ಈತನ ರಿಯಲ್ ಲೈಫ್ ಟ್ರ್ಯಾಜಿಡಿ ಅಂತಾನೇ ಹೇಳ್ಬೋದೇನೋ.. ನೂರಾರು ಮನೆಯ ಕತ್ತಲಿಗೆ ಬೆಳಕಾಗುತ್ತಿರುವ ರವಿ ಕಟಪಾಡಿಯ ಜೀವನ ಇನ್ನೂ ಕಷ್ಟದಲ್ಲಿದೆ .

ಜೀವನದಲ್ಲಿ ಎಷ್ಟೇ ನೋವಿದ್ದರೂ ಪ್ರತೀ ವರ್ಷ ವೇಷ ಧರಿಸಿ ಸಂಗ್ರಹವಾದ ಹಣದಲ್ಲಿ ಹಲವು ಕುಟುಂಬಕ್ಕೆ ನೆರವಾದಲ್ಲಿ ಮಾತ್ರ ರವಿ ಮುಖದಲ್ಲಿ ನಗು ಕಾಣಬಹುದು.. ಇದು ರವಿ ಕಟಪಾಡಿಯ ಜೀವನ ವೈಶಿಷ್ಟ್ಯ. ಹೌದು, ಲಕ್ಷ ಲಕ್ಷ ಹಣ ಸಂಗ್ರಹವಾದರೂ ಚಿಕ್ಕಾಸನ್ನೂ ಸ್ವಂತ ಖರ್ಚಿಗೆ ಬಳಸಿಕೊಂಡಿಲ್ಲ. ಅಷ್ಟರ ಮಟ್ಟಿಗೆ ನಿಸ್ವಾರ್ಥ ಸೇವೆ ರವಿ ಕಟಪಾಡಿಯವರದ್ದು..

ಕಷ್ಟದಲ್ಲಿರುವವರ ಕೈಹಿಡಿಯಲು ಕೋಟಿ ಕೋಟಿ ಹಣ ಬೇಡ, ಬದಲಿಗೆ ಒಳ್ಳೆಯ ಮನಸಿದ್ದರೆ ಸಾಕು. ಇಂತಹ ಕೋಟಿಗೊಬ್ಬ ಮನಸ್ಸಿನ ಉಡುಪಿಯ ರವಿ ಕಟಪಾಡಿ ರಿಯಲ್ ಹೀರೋ ಆಗಿದ್ದಾರೆ. ಉಡುಪಿಯಲ್ಲಿ ನಡೆಯುವ ಕೃಷ್ಣಾಷ್ಟಮಿ ದಿನ ವಿಭಿನ್ನ ವೇಷ ಹಾಕಿ ಜನರಿಂದ ಸಂಗ್ರಹವಾದ ಹಣದಿಂದ ಅಂಗವೈಕಲ್ಯ ಇರುವ ಮಕ್ಕಳಿಗೆ, ಕಷ್ಟದಲ್ಲಿರುವ ಕುಟುಂಬಕ್ಕೆ ನೆರವಾಗುತ್ತಿದ್ದರು.

ಹೀಗೆ ಕಳೆದ ಏಳು ವರ್ಷದಿಂದ ಸತತ ಹಾಲಿವುಡ್ ನಲ್ಲಿ ಬರುವ ವಿಭಿನ್ನ ಪಾತ್ರದ ವೇಷ ಧರಿಸಿ ಈವರೆಗೆ 72 ಲಕ್ಷ ರೂಪಾಯಿ ಸಂಗ್ರಹ ಮಾಡಿ ದಾನ ಮಾಡಿದ್ದಾರೆ ರವಿ ಕಟಪಾಡಿ. ಈ ಬಾರಿ ಕೃಷ್ಣಾಷ್ಟಮಿ ದಿನ ಕೂಡ ಹಾಲಿವುಡ್ ಸಿನಿಮಾದ ಡಾರ್ಕ್ ಎಲೈಟ್ ವೇಷದಲ್ಲಿ ಪ್ರತ್ಯಕ್ಷ ಆಗಿದ್ದಾರೆ ರವಿ ಕಟಪಾಡಿ.

ಕೋಟಿ ರುಪಾಯಿ ಧನಸಹಾಯ ಮಾಡುವ ಪ್ಲಾನ್ ಮಾಡಿದ್ದಾರೆ ಕೂಡ..ಸಾಂಕ್ರಾಮಿಕ ಕೊರೋನಾ ನಡುವೆಯೇ ಶ್ರೀಕೃಷ್ಣ ಜನ್ಮಾಷ್ಟಮಿ ಮುಗಿದಿದೆ. ಅದ್ದೂರಿ ಅಷ್ಟಮಿ ಆಚರಣೆಗೆ ಉಡುಪಿ ಜಿಲ್ಲಾಡಳಿತ ಅವಕಾಶ ಕೊಟ್ಟಿಲ್ಲ. ಅಂತರರಾಷ್ಟ್ರೀಯ ಮಟ್ಟದ ವೆಬ್ಸೈಟ್ಗಳಲ್ಲಿ ಬಂದ ಹಣದಲ್ಲಿ ಒಂದು ರೂಪಾಯಿಯನ್ನು ರವಿ ಇಟ್ಟುಕೊಂಡಿಲ್ಲ. ಕಳೆದ ಬಾರಿ ಕೊರೋನ ಸಾಂಕ್ರಾಮಿಕ ವಿಪರೀತ ಇದ್ದ ಕಾರಣ ರವಿ ಜನಜಾಗೃತಿಗಾಗಿ ವೇಷ ಹಾಕಿದ್ದರು, ಧನಸಂಗ್ರಹ ಮಾಡಿರಲಿಲ್ಲ. ಈ ಬಾರಿ ಜಿಲ್ಲಾಡಳಿತ ರವಿ ಕಟಪಾಡಿ ಅವರಿಗೆ ಸ್ಪೆಷಲ್ ಪರ್ಮಿಷನ್ ಕೊಟ್ಟಿತ್ತು.

ಅಷ್ಟಮಿ ದಿನ ಸಾವಿರಾರು ಜನ ವೇಷ ಧರಿಸುತ್ತಾರೆ ಆದರೆ ಈ ಬಾರಿಯೂ ಅದಕ್ಕೆ ಚಾನ್ಸ್ ಇರಲಿಲ್ಲ. ಸಮಾಜಸೇವಕ ಉಡುಪಿಯ ರವಿ ಕಟಪಾಡಿಗೆ ಸ್ಪೆಷಲ್ ಅವಕಾಶ ಕೊಡಲಾಗಿತ್ತು. ಹಾಲಿವುಡ್ ಸಿನಿಮಾದ ಫ್ಯಾಂಟಸಿ ವೇಷ ಡಾರ್ಕ್ ಎಲೈಟ್ ಮೂಲಕ ಎರಡು ದಿನ ರವಿ ಓಡಾಡಿ ಅಷ್ಟಮಿಗೆ ಹೊಸಕಳೆ ತಂದಿದ್ದಾರೆ. ಅಪರೂಪದಲ್ಲಿ ಅಪರೂಪದ ವೇಷ ಹಾಕಿ ಜನರನ್ನು ಆಕರ್ಷಿಸಿದ್ದಾರೆ. ಎರಡು ದಿನ ಉಪವಾಸವಿದ್ದು ದೇವರ ಸೇವೆ ಎಂಬಂತೆ ಓಡಾಡಿದ್ದಾರೆ.

ಸೆಂಟ್ರಿಂಗ್ ಕೆಲಸ ಮಾಡುವ ರವಿ ಕಟಪಾಡಿ ಪ್ರತಿವರ್ಷ ಶ್ರೀಕೃಷ್ಣ ಜನ್ಮಾಷ್ಟಮಿಗೆ ವೇಷಧರಿಸಿ ಅನಾರೋಗ್ಯ ಪೀಡಿತ ಮಕ್ಕಳಿಗೆ ಸಹಾಯ ಮಾಡುತ್ತಾರೆ. ಕಳೆದ ಆರು ವರ್ಷದಲ್ಲಿ ಬರೋಬ್ಬರಿ 72 ಲಕ್ಷ ರೂಪಾಯಿಯನ್ನು ಸುಮಾರು 33 ಮಕ್ಕಳಿಗೆ ನೀಡಿದ್ದಾರೆ. ಕೌನ್ ಬನೇಗಾ ಕರೋಡ್ ಪತಿಯಲ್ಲಿ ತಾನು ಗೆದ್ದು ಬಂದ ಎಂಟು ಲಕ್ಷ ರೂಪಾಯಿಯನ್ನು ಪೂರ್ತಿಯಾಗಿ ಕಷ್ಟದಲ್ಲಿರುವವರಿಗೆ ಕೊಟ್ಟಿದ್ದಾರೆ.

ಎರಡು ದಿನಗಳ ಕಾಲ ಉಡುಪಿಯ ಆಸುಪಾಸು ಸಂಚರಿಸಿ ಧನ ಸಂಗ್ರಹ ಮಾಡಿದ್ದಾರೆ. ರವಿ ಕಟಪಾಡಿ ಈ ಬಾರಿ ಆರು ಮಕ್ಕಳಿಗೆ ಸಹಾಯ ಮಾಡುವ ನಿರ್ಧಾರ ಮಾಡಿದ್ದಾರೆ. ರವಿ ಕಟಪಾಡಿಯ ಜೀವನದ ಕಷ್ಟಗಳು, ಕಲಾಸಕ್ತಿ ಹಾಗೂ ಪಾರದರ್ಶಕವಾಗಿ ಸಹಾಯ ಮಾಡುವುದರಿಂದಲೇ ರವಿ ವಿಭಿನ್ನವಾಗಿದ್ದಾರೆ. ಹಾಗಾಗಿಯೇ ಜನ ಇವರು ಬಂದ ಕೂಡಲೇ ಕಣ್ಮುಚ್ಚಿ ಹಣ ನೀಡುತ್ತಾರೆ. ರವಿಗೆ ಕೊಟ್ಟ ಒಂದೊಂದು ರೂಪಾಯಿ ಕಷ್ಟದಲ್ಲಿರುವ ಕುಟುಂಬಗಳ ಕಂಬನಿ ಒರಿಸುತ್ತೆ ಅನ್ನೋದು ಸಹೃದಯಿಗಳ ವಿಶ್ವಾಸ. ರವಿಯ ಕಾರ್ಯ ಮತ್ತಷ್ಟು ಮಂದಿಗೆ ಪ್ರೇರೇಪಿಸುತ್ತಿರುವುದಂತು ಸತ್ಯ..