Madikeri Dasara 2021: ವಿಜೃಂಭಣೆಯಿಂದ ಜರುಗಿದ ಮಡಿಕೇರಿ ದಸರಾ; ಅದ್ಭುತ ಜನೋತ್ಸವದ ಒಂದು ಝಲಕ್ ಇಲ್ಲಿದೆ

ಕೊಡಗು(ಅ.16): ಕೋವಿಡ್(COVID-19) ಹಿನ್ನಲೆಯಲ್ಲಿ ಸಾಕಷ್ಟು ನಿರ್ಬಂಧಗಳ ಹಾಕಿ ಸರಳ ರೀತಿಯಾಗಿ ಆಚರಣೆಗೆ ಅವಕಾಶ ನೀಡಿದ್ದ ಮಡಿಕೇರಿ ದಸರಾ(Madikeri Dasara) ಸಾವಿರಾರು ಪ್ರವಾಸಿಗರೊಂದಿಗೆ ಅದ್ಧೂರಿಯಾಗಿಯೇ ನಡೆದಿದೆ. ಶುಕ್ರವಾರ ರಾತ್ರಿಯಿಡೀ ನಡೆದ ಮೈನವಿರೇಳಿಸೋ ದಶಮಂಟಪಗಳ ಶೋಭಾಯಾತ್ರೆ(Shobhayatre) ಜನರ ಮನಸೂರೆಗೊಂಡಿತು.

ಡಿಜೆ ಸೌಂಡ್ ಜೊತೆಗೆ ಬಣ್ಣದ ಓಕುಳಿ, ವಿವಿಧ ಪೌರಾಣಿಕ ಕಥೆಗಳು, ರಾಕ್ಷಸರ ನರ್ತನಗಳು ಜನರನ್ನು ಆ ಕ್ಷಣಕ್ಕೆ ದೇವಲೋಕಕ್ಕೆ ಕರೆದೊಯ್ದಿದ್ದವು ಎಂದರೆ ತಪ್ಪಲ್ಲ. ದುಷ್ಟರ ಸಂಹಾರದ ಸಂಕೇತ ನವರಾತ್ರಿಯ ಅಂಗವಾಗಿ ನಡೆದ ದಶಮಂಟಪಗಳ ಶೋಭಾಯಾತ್ರೆ ದೇವಾನುದೇವತೆಗಳ ಪವಾಡಕ್ಕೆ ಸಾಕ್ಷಿಯಾದರೆ, ಸಹಸ್ರಾರು ಭಕ್ತರು ಭಾವಪರವಶತೆಯಲ್ಲಿ ಮಿಂದೆದ್ದರು.

ನಗರದ ಪ್ರಮುಖ ಬೀದಿಗಳಲ್ಲಿ ಪ್ರದರ್ಶನಗೊಂಡ  ಆಂಜನೇಯ ದರ್ಶನ, ಆದಿ ಶಕ್ತಿಯಿಂದ ಶುಂಭ ನೀಶುಂಭರ ಸಂಹಾರ, ಗಣಪತಿಯಿಂದ ಗಜಾಸುರನವಧೆ, ಚಂಡ ಮುಂಡರ ವಧೆ ಸೇರಿದಂತೆ ಹಲವು ಪೌರಾಣಿಕ ಕಥಾವಸ್ತುವನ್ನು ಆಧರಿಸಿದ ನೃತ್ಯ ಪ್ರದರ್ಶನಗಳನ್ನು, ಯುದ್ಧದ ದೃಶ್ಯಗಳನ್ನು ಮಂಟಪಗಳು ಸಾದರಪಡಿಸಿದವು. ಶುಕ್ರವಾರ ರಾತ್ರಿ 11 ಗಂಟೆಗೆ ಶುರುವಾದ ದಶಮಂಟಪಗಳ ಶೋಭಾಯಾತ್ರೆ ಬೆಳಿಗ್ಗೆ 5 ಗಂಟೆವರೆಗೂ ನಡೆಯಿತು.

ರಾಜ್ಯದ ವಿವಿಧೆಡೆಗಳಿಂದ ಆಗಮಿಸಿದ್ದ ಸಹಸ್ರಾರು ಪ್ರವಾಸಿಗರು ಮೆರವಣಿಗೆ ನೋಡಲು ಮುಗಿಬಿದ್ದರು. ಒಟ್ಟಿನಲ್ಲಿ ವಿಶ್ವವಿಖ್ಯಾತ ಮೈಸೂರು ದಸರಾಕ್ಕೆ ಹೆಚ್ಚಿನ ಸಂಖ್ಯೆಯ ವೀಕ್ಷಕರಿಗೆ ಭಾಗವಹಿಸಲು ಅವಕಾಶ ಇಲ್ಲದಿದ್ದರಿಂದ ಬಹುತೇಕ ಜನರು ಮಡಿಕೇರಿಯ ದಸರಾ ಕಣ್ತುಂಬಿಕೊಳ್ಳಲು ಮುಗಿಬಿದ್ದಿದ್ದರು.

ಐತಿಹಾಸಿಕ ಜನೋತ್ಸವವಾಗಿ ನಡೆಯುವ ಮಡಿಕೇರಿ ದಸರಾ ಕೋವಿಡ್ ಕಾರಣದಿಂದ ಕಳೆದ ವರ್ಷ ಕೇವಲ ಸಾಂಪ್ರದಾಯಿಕ ಮಂಟಪಗಳ ಸ್ಥಾಪನೆಗೆ ಅಷ್ಟೇ ಸೀಮಿತವಾಗಿತ್ತು. ಈ ಬಾರಿ ಕೋವಿಡ್ ಸ್ವಲ್ಪ ಕಡಿಮೆ ಆಗಿರುವುದರಿಂದ ಅದ್ಧೂರಿ ಅಲ್ಲದಿದ್ದರೂ ತಕ್ಕಮಟ್ಟಿಗೆ ದಸರಾ ಆಚರಣೆಗೆ ಅವಕಾಶ ಮಾಡಿಕೊಡಲಾಗಿತ್ತು.

ಮಡಿಕೇರಿ ನಗರದ 10 ದೇವಾಲಯಗಳಿಂದ ಹೊರಡುವ 10 ಮಂಟಪಗಳ ಜೊತೆಗೂ ತಲಾ ಕೇವಲ 100 ಜನರು ಮೀರದಂತೆ ಇದ್ದು ಮಂಟಪಗಳ ಶೋಭಾಯಾತ್ರೆ ನಡೆಸುವಂತೆ ಅವಕಾಶ ನೀಡಲಾಗಿತ್ತು.

ಆದರೆ ಇದನ್ನೇ ಬಳಸಿಕೊಂಡ ಹೊರ ಜಿಲ್ಲೆಯ ಕನಿಷ್ಠ 20 ಸಾವಿರಕ್ಕೂ ಹೆಚ್ಚು ಪ್ರವಾಸಿಗರು ಮಡಿಕೇರಿಗೆ ಲಗ್ಗೆ ಇಟ್ಟಿದ್ರು. ರಾತ್ರಿ 11 ಗಂಟೆಗೆ ಆಯಾ ದೇವಾಲಯಗಳ ಬಳಿಯಿಂದ ಹೊರಟ ಪ್ರತೀ ಮಂಟಪಗಳ ಮೆರವಣಿಗೆಯೊಂದಿಗೆ ಕನಿಷ್ಠ ಸಾವಿರ ಜನರಿದ್ರು. ಮಡಿಕೇರಿಯ ಪ್ರತೀ ಬೀದಿ ಬೀದಿಗಳಲ್ಲಿ ಜನರ ದಂಡೇ ಹರಿದು ಬರುತ್ತಿತ್ತು.

ಮಾಸ್ಕ್ ಹಾಕುವುದನ್ನು ಕೊಡಗು ಜಿಲ್ಲಾಡಳಿತ  ಕಡ್ಡಾಯಗೊಳಿಸಿತ್ತು. ಆದರೂ ಬಹುತೇಕರು ಮಾಸ್ಕ್ ಹಾಕಿಯೇ ಇರಲಿಲ್ಲ. ಅಲ್ಲಲ್ಲಿಯೇ ನಿಂತಿದ್ದ ಪೊಲೀಸರು ಲಾಠಿ ರುಚಿ ತೋರಿಸಿ ಮಾಸ್ಕ್ ಹಾಕಿಸಬೇಕಾಯಿತು.

ಏನೇ ಆಗಲಿ ಸರಳ ಆಚರಣೆ ಎಂದಿದ್ದ ಮಡಿಕೇರಿ ದಸರಾ ಈ ಬಾರಿ ಜನೋತ್ಸವವಾಗಿಯೇ ಆಚರಣೆಯಾಗಿದೆ ಎಂಬ ಸಂತಸವನ್ನು ದಸರ ಸಮಿತಿ ಅಧ್ಯಕ್ಷ ರಮೇಶ್ ವ್ಯಕ್ತಪಡಿಸಿದ್ದಾರೆ. ಒಂದು ವೇಳೆ ಇದರಿಂದ ಕೊಡಗು ಜಿಲ್ಲೆಯಲ್ಲಿ ಒಂದಷ್ಟು ಕೋವಿಡ್ ಪ್ರಕರಣಗಳ ಸಂಖ್ಯೆ ಹೆಚ್ಚಳವಾದ್ರೂ ಅಚ್ಚರಿಯೇನು ಇಲ್ಲ.