ಆಧುನಿಕ ಶ್ರವಣಕುಮಾರ; ಅಪ್ಪ ಕೊಡಿಸಿದ ಹಳೇ ಸ್ಕೂಟರ್​ನಲ್ಲಿ ಅಮ್ಮನ ಜೊತೆ ದೇಶ ಸುತ್ತಿದ ಮಂಡ್ಯದ ಕೃಷ್ಣಕುಮಾರ

ತ್ರೇತಾಯುಗದಲ್ಲಿ ತಂದೆ ತಾಯಿ ಸೇವೆಗೈದ ಶ್ರವಣಕುಮಾರ ಹೆಸರು ನಿಮಗೆಲ್ಲ ಗೊತ್ತೆ ಇದೆ. ಆತ ತನ್ನ ವಯಸ್ಸಾದ ಹಾಗೂ ಅಂಧ ತಂದೆ ತಾಯಿಯನ್ನು ಎರಡು ತಕ್ಕಡಿಯಲ್ಲಿ ಕೂಡಿಸಿಕೊಂಡು ದೇಶದ ವಿವಿಧ ತೀರ್ಥಕ್ಷೇತ್ರಗಳನ್ನು ತೋರಿಸಿದ್ದ. ಇಂದು ಅದೇ ರೀತಿಯಲ್ಲಿ ಸಕ್ಕ ರೆನಾಡು ಮಂಡ್ಯದ ವ್ಯಕ್ತಿಯೊಬ್ಬರು ತನ್ನ ಬಳಿ ಇದ್ದ ಹಳೆಯ ಸ್ಕೂಟರ್​ನಲ್ಲಿ ತನ್ನ ವಯಸ್ಸಾದ ತಾಯಿಗೆ ಇಡೀ ದೇಶವನ್ನೇ ತೋರಿಸಿಕೊಂಡು ಬಂದಿದ್ದಾರೆ.

ಹೀಗೆ ತನ್ನ ಹಳೆಯ ಸ್ಕೂಟರ್ ಸ್ಟಾರ್ಟ್ ಮಾಡ್ತಾ ಇರುವ ಈ ವ್ಯಕ್ತಿಯ ಹೆಸರು ಕೃಷ್ಣಕುಮಾರ್. ಇವರು ಮಂಡ್ಯದ ಶ್ರೀರಂಗಪಟ್ಟಣದ ನಿವಾಸಿ. ತನ್ನ ವೃದ್ದ ತಾಯಿ ತೀರ್ಥಯಾತ್ರೆಯ ಆಸೆಯನ್ನು ಮಾತೃ ಸಂಕಲ್ಪ ಹೆಸರನಲ್ಲಿ ಪ್ರತಿಜ್ಞೆ ಮಾಡಿ ತಾಯಿಗೆ ತನ್ನ ಬಳಿ ಇದ್ದ ಹಳೆಯ ಸ್ಕೂಟರ್ನಲ್ಲಿ ಇಡೀ ದೇಶದ ತೀರ್ಥ ಕ್ಷೇತ್ರ ಸುತ್ತಿಸಿ ಮಾಡರ್ನ್ ಶ್ರವಣ ಕುಮಾರ ಎನಿಸಿಕೊಂಡಿದ್ದಾರೆ.

70 ವರ್ಷದವರೆಗೂ ಯಾವುದೇ ಸ್ಥಳಕ್ಕೂ ಹೋಗದೆ ಮನೆಯಲ್ಲಿಯೇ ಇದ್ದ ತನ್ನ ತಾಯಿಯ ತೀರ್ಥಯಾತ್ರೆಯ ಆಸೆಯನ್ನು ಕೇಳಿ ಇಡೀ ದೇಶದ ತೀರ್ಥ ಸ್ಥಳಗಳು ಸೇರಿದಂತೆ ಪಕ್ಕದ ಬೂತಾನ್, ಬರ್ಮಾ ಹಾಗೂ ನೇಪಾಳಕ್ಕೂ ಕರೆದೊಯ್ದು ತೀರ್ಥ ಕ್ಷೇತ್ರದ ದರ್ಶನ ಮಾಡಿಸಿಕೊಂಡು ಬಂದಿದ್ದಾರೆ.

ತನ್ನ ತಾಯಿಗೆ ಇಡೀ ದೇಶದ ತೀರ್ಥಕ್ಷೇತ್ರದ ದರ್ಶನ ಮಾಡಿಸಿದ್ದು ತನ್ನ ತಂದೆ ಕೊಡಿಸಿದ ಈ ಹಳೆಯ ಬಜಾಜ್ ಚೇತಕ್ ಸ್ಕೂಟರ್​ನಲ್ಲಿ.

ಸತತ ನಾಲ್ಕು ವರ್ಷಗಳ ಕಾಲ ಬರೋಬ್ಬರಿ ಸುಮಾರು 56,000 ಕಿ.ಮೀ. ಗಳನ್ನು ಇವರು ಈ ಹಳೆಯ ಚೇತಕ್ ಸ್ಕೂಟರ್​ನಲ್ಲೇ ಹೋಗಿದ್ದಾರೆ. ಕಾಶ್ಮೀರದಿಂದ ಕನ್ಯಾಕುಮಾರಿವರೆಗೂ ಇದೇ ಸ್ಕೂಟರ್ನಲ್ಲಿ ತೀರ್ಥಯಾತ್ರೆ ಮಾಡಿದ್ದಾರೆ.

ಅಚ್ಚರಿ ಎಂದ್ರೆ ಇವರ ಈ ಹಳೆಯ ಸ್ಕೂಟರ್ ಎಲ್ಲಿಯೂ ಒಮ್ಮೆಯೂ ಕೂಡ ಕೈ ಕೊಟ್ಟಿಲ್ಲವಂತೆ.

ಈ ಹಳೆಯ ಸ್ಕೂಟರ್​ನಲ್ಲಿಯೇ ತೀರ್ಥ ಯಾತ್ರೆ ಮಾಡುವುದರ ಹಿಂದೆ ಕೂಡ ಒಂದು ಭಾವನಾತ್ಮಕ ಸಂಬಂಧವಿದೆ.

ಈ ಸ್ಕೂಟರನ್ನು ಅವರ ತಂದೆ ಕೊಡಿಸಿದ್ದು. ಈಗ ಅವರು ಕಾಲವಾಗಿ ಜೊತೆಯಲ್ಲಿಲ್ಲದ ಕಾರಣಕ್ಕೆ ಈ ಹಳೆಯ ಸ್ಕೂಟರ್ ಅನ್ನೇ ತಂದೆಯೆಂದುಕೊಂಡು ಕುಟುಂಬಸಮೇತರಾಗಿ ತೀರ್ಥಯಾತ್ರೆ ಮಾಡಿ ಬಂದಿದ್ದಾರೆ.

ಮಗ ತನ್ನ ಕಡೆಯ ಆಸೆ ಈಡೇರಿಸಿದ್ದಕ್ಕೆ ತಾಯಿಗೆ ಎಲ್ಲಿಲ್ಲದ ಸಂತಸವಾದ್ರೆ, ಮಗನಿಗೆ ತಾಯಿಯ ಆಸೆ ಈಡೇರಿಸಿದ ಧನ್ಯತಾ ಭಾವ ಇದೆ.

ಒಟ್ಟಾರೆ ತೇತ್ರಾಯುಗದಲ್ಲಿ ಆ ಶ್ರವಣ ಕುಮಾರ ತನ್ನ ಹೆಗಲ ಮೇಲೆ ತಕ್ಕಡಿ ಹೊತ್ತು ತನ್ನ ವೃದ್ದ ಮತ್ತು ಅಂಧ ತಂದೆ ತಾಯಿಗೆ ತೀರ್ಥ ಕ್ಷೇತ್ರ ದರ್ಶನ ಮಾಡಿಸಿದ್ದ. ಇಂದು ಅದೇ ರೀತಿ ಯಾಗಿ ಮಂಡ್ಯದ ವ್ಯಕ್ತಿ ಹಳೆಯ ಸ್ಕೂಟರ್ನಲ್ಲಿ ಇಡೀ ದೇಶ ಸುತ್ತಿಸಿ ತಾಯಿಯ ಆಸೇ ನೆರವೇರಿಸುವ ಮೂಲಕ ಕಲಿಗಾಲದ ಮಾಡರ್ನ್ ಶ್ರವಣಕುಮಾರ ಎನಿಸಿಕೊಂಡಿರೋದು ಅತಿಶಯೋಕ್ತಿ ಅಲ್ಲ.

ಕೃಷ್ಣಕುಮಾರ್ ತಮ್ಮ ತಂದೆಯ ಹಳೆಯ ಸ್ಕೂಟರ್​ನಲ್ಲಿ ತಾಯಿಗೆ ತೀರ್ಥಯಾತ್ರೆಯಲ್ಲಿ

ತೀರ್ಥಯಾತ್ರೆ ಮಾಡಿ ಬಂದ ಕೃಷ್ಣಕುಮಾರ್ ಮತ್ತವರ ತಾಯಿಗೆ ಶ್ರೀರಂಗಪಟ್ಟಣದ ಸ್ಥಳೀಯರಿಂದ ಸನ್ಮಾನ

ಕೃಷ್ಣಕುಮಾರ್ ತಮ್ಮ ತಾಯಿಯ ಜೊತೆ ಸ್ಕೂಟರ್​ನಲ್ಲಿ