ಕೋಲಾರದ ಟೊಮೆಟೋ ಬೆಳೆಗಾರರಿಗೆ ಸಂಕಷ್ಟ ತಂದಿಟ್ಟ ಮುಂಬೈ ಮಹಾಮಳೆ

ಟೊಮೆಟೊ ವಹಿವಾಟಿನಲ್ಲಿ ಏಷ್ಯಾದಲ್ಲಿಯೇ ಎರಡನೇ ಅತಿದೊಡ್ಡ ಮಾರುಕಟ್ಟೆ ಎಂಬ ಖ್ಯಾತಿ ಕೋಲಾರದ ಎಪಿಎಂಸಿಯದ್ದು. ಕೋಲಾರ ಜಿಲ್ಲೆಯಲ್ಲಿ ಬೆಳೆದ ಟೊಮೆಟೊವನ್ನು ಮಹಾರಾಷ್ಟ್ರ, ಗುಜರಾತ್, ರಾಜಸ್ಥಾನ, ಆಂದ್ರ ಪ್ರದೇಶ, ಪಂಜಾಬ್, ತಮಿಳುನಾಡು, ಹರಿಯಾಣ ಸೇರಿದಂತೆ ದೇಶದ ಮೂಲೆಮೂಲೆಗೆ ಸರಬರಾಜು ಆಗುತ್ತಿದೆ. ಆದರೀಗ ಮಹಾರಾಷ್ಟ್ರ ಸೇರಿದಂತೆ ಉತ್ತರ ಭಾರತದ ಕೆಲ ರಾಜ್ಯಗಳಲ್ಲಿ ಮಳೆ ಸೃಷ್ಟಿಸುತ್ತಿರುವ ಅನಾಹುತ, ಪ್ರವಾಹದ ಅತಿವೃಷ್ಠಿಯ ಬಿಸಿ ಕೋಲಾರ ಜಿಲ್ಲೆಯ ಟೊಮೆಟೊ ಬೆಳೆಗಾರರಿಗೂ ತಾಕಿದೆ.

ಮಹಾರಾಷ್ಟಕ್ಕೆ ಸಂಪರ್ಕಿಸುವ ರಸ್ತೆಗಳು ಕೊಚ್ಚಿಹೋಗಿದ್ದು, ಬೃಹತ್ ವಾಹನಗಳು ಸಂಚಾರ ಮಾಡಲಾಗದೆ ಕೋಲಾರದ ಮಾರುಕಟ್ಟೆಯಿಂದ ಟೊಮೆಟೊ ರವಾನಿಸುವ ಕಾರ್ಯಕ್ಕೂ ಅಡಚಣೆಯಾಗಿದೆ.

ಕಳೆದ ವಾರ 15 ಕೆಜಿಯ ಒಂದು ಬಾಕ್ಸ್​ನ ಸೀಡ್ಸ್ ಟೊಮ್ಯಾಟೊ 300 ರಿಂದ 400 ರೂ ಬೆಲೆ ಇತ್ತು. ಆದರೆ ದಿಢೀರನೇ ಬೆಲೆ ಕುಸಿತಗೊಂಡಿದ್ದು, ಈಗ 15 ಕೆಜಿ ಟೊಮ್ಯಾಟೋ ಬಾಕ್ಸ್ ಗರಿಷ್ಠ 190 ರೂಗೆ ಇಳಿದಿದೆ. ಇನ್ನು ನಾಟಿ ಟೊಮೆಟೊಗೆ ಬೇಡಿಕೆ ಹೆಚ್ಚಿರುವ ಕಾರಣ 450 ರೂ ವರೆಗು ಒಂದು ಬಾಕ್ಸ್​ಗೆ ಬೆಲೆಯಿದೆ.

ಬೇಡಿಕೆ ಕೊರತೆ ಕಾರಣ ಕೋಲಾರ ಮಾರುಕಟ್ಟೆಯಿಂದ ಹೊರರಾಜ್ಯಗಳಿಗೆ ತೆರಳುವ ಟೊಮೆಟೊ ಪ್ರಮಾಣ ಇಳಿಕೆಯಾಗಿ ಬೆಲೆ ಕುಸಿತಕ್ಕೆ ಕಾರಣವಾಗಿದೆ. ಮುಂಬೈನಲ್ಲಿ ಮಳೆ ಹಿನ್ನೆಲೆಯಲ್ಲಿ ಮಾರುಕಟ್ಟೆಗೆ ಬಂದಿದ್ದ ನೂರಾರು ಲಾರಿಗಳು ನಿಂತಲ್ಲೇ ನಿಂತಿದೆ. ಆದರೂ ಕೆಲ ಲಾರಿಗಳು ತೆರಳಿದ್ದು, ನಿರೀಕ್ಷಿತ ಪ್ರಮಾಣದಲ್ಲಿ ರವಾನೆಯಾಗುತ್ತಿಲ್ಲ.

ಕೋಲಾರದಲ್ಲೂ ಮೋಡಕವಿದ ವಾತಾವರಣ, ಜಿಟಿಜಿಟಿ ಮಳೆ ಕಾರಣ, ಟೊಮೆಟೊ ಹಣ್ಣಿನ ಗುಣಮಟ್ಟ ಇಳಿಕೆಯಾಗಿದೆ. ಜಿಟಿ ಜಿಟಿ ಮಳೆಯಿಂದಾಗಿ ಗಿಡದಲ್ಲೇ ಟೊಮೆಟೊ ಹಣ್ಣಿನ ಮೇಲೆ ಮಚ್ಚೆ ಉಂಟಾಗಿ ಕೊಳ್ಳೋರಿಲ್ಲದಂತಾಗಿದೆ. ಹೀಗಾಗಿ ಸೀಡ್ಸ್ ಟೊಮೆಟೊ ಬೆಲೆ ಇಳಿಕೆಗೆ ಇದೊಂದು ಕಾರಣವಾಗಿದೆ.

ಒಟ್ಟಿನಲ್ಲಿ, ಉತ್ತರ ಭಾರತದ ಮಳೆ ಪ್ರವಾಹವು ಬರದನಾಡು ಕೋಲಾರ ಜಿಲ್ಲೆಯ ರೈತರ ಮೇಲೂ ಪರಿಣಾಮ ಬೀರಿದ್ದು ಭರ್ಜರಿ ಲಾಭದ ನಿರೀಕ್ಷೆಯಲ್ಲಿದ್ದ ಟೊಮೆಟೊ ಬೆಳೆಗಾರರು ಕಂಗಾಲಾಗಿದ್ದಾರೆ.

ಮತ್ತೊಂದೆಡೆ ಜಿಲ್ಲೆಯಲ್ಲಿ ಮೋಡಕವಿದ ವಾತಾವರಣ, ಜಿಟಿ ಜಿಟಿ ಮಳೆ ಟೊಮೆಟೊ ಬೆಳೆಗೆ ಪ್ರತಿಕೂಲ ವಾತಾವರಣ ನಿರ್ಮಿಸಿದ್ದು, ಟೊಮೆಟೊ ಹಣ್ಣಿನ ಗುಣಮಟ್ಟ ಇಳಿಕೆಗೂ ಕಾರಣವಾಗಿದೆ.

ಟೊಮೆಟೊ ಸೀಸನ್ ಆರಂಭದಿಂದಲು ಭರ್ಜರಿ ಲಾಭ ಗಳಿಸಿದ್ದ ರೈತರು, ಇದೀಗ ಇರುವ ಅಲ್ಪ ಸ್ವಲ್ಪ ಫಸಲಿಗೆ ನಿರೀಕ್ಷೆ ಮಾಡಿದಷ್ಟು ಬೆಲೆ ಸಿಗದೆ ನಿರಾಸೆಯಾಗಿದ್ದಾರೆ.