Ram Mandir : ರಾಮ ಮಂದಿರಕ್ಕೆ ಶಿಲಾನ್ಯಾಸ - ರಾಮನ ಭಂಟ ಹನುಮಂತನಿಗೂ ವಿಶೇಷ ಪೂಜೆ -  ಅಂಜನಾದ್ರಿ ಬೆಟ್ಟದಲ್ಲಿ ಸಂಭ್ರಮ

ಅಯೋಧ್ಯೆ ಅಂದ್ರೆ ರಾಮನ ನೆನಪಾಗುತ್ತದೆ. ಉತ್ತರಕ್ಕೆ ಅಯೋಧ್ಯೆ ಮಹತ್ವ ಪಡೆದುಕೊಂಡ್ರೆ, ದಕ್ಷಣದಲ್ಲಿ ಅಂಜನಾದ್ರಿ ಬೆಟ್ಟ ಮಹತ್ವ ಪಡೆದುಕೊಂಡಿದೆ. ಕೊಪ್ಪಳ ಜಿಲ್ಲೆಯ ಅಂಜನಾದ್ರಿ ಬೆಟ್ಟ ರಾಮನ ಭಂಟ ಹನುಮನ ತವರು ಎಂದೇ ಪ್ರತೀತಿ ಪಡೆದಿದೆ.

ಗಂಗಾವತಿ ತಾಲೂಕಿನ ತುಂಗಭದ್ರ ನದಿಗೆ ಹೊಂದಿಕೊಂಡಿರುವ ಅಂಜನಾದ್ರಿ ಬೆಟ್ಟದಲ್ಲಿ ಇಂದು ಸಂಭ್ರಮ ಮನೆಮಾಡಿದೆ. ಅದಕ್ಕೆ ಮುಖ್ಯ ಕಾರಣ ಅಯೋಧ್ಯೆಯಲ್ಲಿ ರಾಮ ಮಂದಿರಕ್ಕೆ ಭೂಮಿ ಪೂಜೆ ನಡೆದಿರೋದು. ರಾಮ ಮಂದಿರ ಶಿಲಾನ್ಯಾಸ ಹಿನ್ನೆಲೆಯಲ್ಲಿ ಅಂಜನಾದ್ರಿ ಬೆಟ್ಟದಲ್ಲಿಯೂ ವಿಶೇಷ ಪೂಜೆಗಳು ನೆರವೇರಿದವು.

ಅಯೋಧ್ಯೆಯಲ್ಲಿ ರಾಮ ಮಂದಿರಕ್ಕೆ ಭೂಮಿ ಪೂಜೆ ಹಿನ್ನೆಲೆಯಲ್ಲಿ ಕೊಪ್ಪಳದ ಅಂಜನಾದ್ರಿ ಬೆಟ್ಟದಲ್ಲಿ ಸಂಭ್ರಮದ ವಾತಾವರಣ ಮನೆಮಾಡಿದೆ. ರಾಮನ ಭಂಟ ಹನುಮಂತ ಜನಿಸಿದ ಸ್ಥಳವೆಂದೇ ಪ್ರತೀತಿ ಪಡೆದಿರೋ ಅಂಜನಾದ್ರಿ ಬೆಟ್ಟ ತನ್ನದೇ ಆದ ಮಹತ್ವ ಪಡೆದುಕೊಂಡಿದೆ.

ಗಂಗಾವತಿ ತಾಲೂಕಿನಲ್ಲಿ ತುಂಗಭದ್ರಾ ನದಿಗೆ ಹೊಂದಿಕೊಂಡಿರೊ ಅಂಜನಾದ್ರಿ ಬೆಟ್ಟದ ಮೇಲೆ ಹನುಮಾನ ಮಂದಿರವಿದೆ. ಕೊರೋನಾ ಹಿನ್ನೆಲೆಯಲ್ಲಿ ಸಾರ್ವಜನಿಕರ ದರ್ಶನ ಬಂದ್ ಆಗಿದ್ದ ದೇವಸ್ಥಾನ ಇಂದಿನಿಂದ ಪುನರಾರಂಭಗೊಂಡಿದೆ.

ಹನುಮನ ಜನ್ಮಸ್ಥಳದ ದರ್ಶನಕ್ಕೆ ಜಿಲ್ಲಾಡಳಿತ ಅವಕಾಶ ಮಾಡಿಕೊಟ್ಟಿದೆ. ರಾಮ ಮಂದಿರ ಭೂಮಿ ಪೂಜೆ ದಿನದಂದೇ ದರ್ಶನಕ್ಕೆ ಅವಕಾಶ ಮಾಡಿಕೊಟ್ಟಿರೋದಕ್ಕೆ ಭಕ್ತರ ಹರ್ಷ ವ್ಯಕ್ತಪಡಿಸಿದ್ದಾರೆ.

ರಾಮ ಮಂದಿರಕ್ಕೆ ಭೂಮಿ ಪೂಜೆ ಹಿನ್ನೆಲೆ ಹೋಮ, ಹವನ ಅಯೋಧ್ಯೆಯಲ್ಲಿ ಪೂಜೆ ಮುಗಿಯುವವರೆಗೂ ನಿರಂತರ ರಾಮಾಯಣ ಪಠಣ ಆಯೋಜಿಸಲಾಗಿತ್ತು. ಬೆಟ್ಟದಲ್ಲಿ ಧ್ವಜಗಳನ್ನು ಕಟ್ಟುವ ಮೂಲಕ  ಭಕ್ತರು ಸಂಭ್ರಮಿಸಿದರು.

ಅಂಜನಾದ್ರಿ ಬೆಟ್ಟದಲ್ಲಿ ಹೋಮ-ಹವನ ನಡೆಸಲಾಯಿತು. ಯುವ ಬ್ರಿಗೇಡ್ ನೇತೃತ್ವದಲ್ಲಿ ಹೋಮ ಮಾಡಲಾಯಿತು. ಖ್ಯಾತ ವಾಗ್ಮಿ ಚಕ್ರವರ್ತಿ ಸೂಲಿಬೆಲೆ, ವಿಜಯನಗರ ಸಾಮ್ರಾಜ್ಯದ ವಂಶಸ್ಥ ಕೃಷ್ಣದೇವ ಮತ್ತಿತರರು ಯಜ್ಞದಲ್ಲಿ ಭಾಗಿಯಾಗಿದ್ದರು. ಎರಡು ತಾಸುಗಳ ಕಾಲ ಹೋಮ-ಹವನ ಸಾಂಗವಾಗಿ ನೆರವೇರಿತು. ಶ್ರೀರಾಮ ಮಂದಿರ ನಿರ್ಮಾಣ ಸಾಂಗವಾಗಿ ನೆರವೇರಲಿ. ಯಾವುದೇ ವಿಘ್ನಗಳು ಬಾರದಿರಲಿ ಎಂದು ಪ್ರಾರ್ಥಿಸಲಾಯಿತು.

ಅತ್ತ ಅಯೋಧ್ಯೆಯಲ್ಲಿ ರಾಮ ಮಂದಿರಕ್ಕೆ ಶಿಲನ್ಯಾಸ ನಡೆಯುತ್ತಿದ್ದ ವೇಳೆಯಲ್ಲಿಯೇ ಅಂಜನಾದ್ರಿ ಬೆಟ್ಟದಲ್ಲಿ ರಾಮ ತಾರಕ ಪಠಣ ನಡೆಯಿತು. ಚಕ್ರವರ್ತಿ ಸೂಲಿಬೆಲೆ ನೇತೃತ್ವದಲ್ಲಿ ರಾಮ ಜಪ ಮಾಡಲಾಯಿತು. ರಾಮ ರಾಮ ಜಯ ಜಯ ರಾಮ, ಜಯ ಶ್ರೀರಾಮ ಎಂದು ನಿರಂತರವಾಗಿ ಪಠಣ ಮಾಡಲಾಯಿತು. ಯುವ ಬ್ರಿಗೆಡ್ ಕಾರ್ಯಕರ್ತರು, ಮತ್ತಿತರರು ಭಾಗಿಯಾಗಿ ರಾಮ ತಾರಕ ಪಠಣ ಮಾಡಿದರು.

ರಾಮ ಮಂದಿರ ನಿರ್ಮಾಣಕ್ಕಾಗಿ ಶ್ರಮಿಸಿದ ಕರ ಸೇವಕರನ್ನು ಅಂಜನಾದ್ರಿ ಬೆಟ್ಟದಲ್ಲಿ ಸನ್ಮಾನಿಸಲಾಯಿತು. ಚಕ್ರವರ್ತಿ ಸೂಲಿಬೆಲೆ ಕರ ಸೇವಕರನ್ನು ಸನ್ಮಾನಿಸಿ ಗೌರವಿಸಿದರು. ಸ್ಮರಣಿಕೆಗಳನ್ನು ನೀಡಿ ಸತ್ಕರಿಸಿದರು.

ಈ ವೇಳೆ ನ್ಯೂಸ್ 18 ಜೊತೆ ಮಾತನಾಡಿದ ಚಕ್ರವರ್ತಿ ಸೂಲಿಬೆಲೆ, ರಾಮನ ಭಂಟ ಹನುಮ ಅಎನ್ನುವ ಕಾರಣಕ್ಕೆ ಅಂಜನಾದ್ರಿ ಬೆಟ್ಟದಲ್ಲಿ ಸಂಭ್ರಮ ಮನೆಮಾಡಿದೆ. ರಾಮ ಜನ್ಮಭೂಮಿ ಅಯೋಧ್ಯೆಯಷ್ಟೆ ಮಹತ್ವದ ಕ್ಷೇತ್ರ ಅಂಜನಾದ್ರಿ ಬೆಟ್ಟವಾಗಿದೆ. ರಾಮನ ಭಂಟ ಹನುಮಂತ ಜನಸಿದ ಸ್ಥಳ ಇದಾಗಿದೆ. ಸೂರ್ಯನನ್ನು ನುಂಗಿದಾಗ ಹನುಮನನ್ನು ಛದ್ರಗೊಳಿಸಿದ ಪ್ರದೇಶ ಇದಾಗಿದೆ.

ತನ್ನ ಪುತ್ರನನ್ನೇ ಛಿದ್ರಗೊಳಿಸಿದನೆಂದು ಸಿಟ್ಟಾಗಿ ವಾಯುದೇವ ಇಲ್ಲಿಯೇ ಅಡಗಿ ಕುಳಿತಿದ್ದ. ಜಗತ್ತಿಗೆ ಉಸಿರು ನೀಡೋ ದೇವರು ಗುಪ್ತವಾಗಿ ಕುಳಿತ ಪ್ರದೇಶವೂ ಹೌದು. ಹೀಗಾಗಿ ಇಲ್ಲಿ ಹಲವಾರು ಕಾರ್ಯಕ್ರಮ ಆಯೋಜನೆ ಮಾಡಿದ್ದೇವೆ.  ಅಯೋಧ್ಯೆಯ ಜೊತೆಗೆ ಇಲ್ಲಿಯೂ ಸಂಭ್ರಮ ಇರಲೆಂದು ಹೋಮ- ಹವನ ಆಯೋಜನೆ ಮಾಡಿದ್ದೆವು.

ಶಿಲನ್ಯಾಸದ ವೇಳೆ ರಾಮ ತಾರಕ ಪಠಣವನ್ನೂ ಮಾಡಿದ್ದೇವೆ. ಗಾಳಪಟವನ್ನೂ ಹಾರಿಸಿ, ಹನುಮ ನಾಡಿನ ಸಂದೇಶ  ಅಯೋಧ್ಯೆಗೆ ಮುಟ್ಟಲೆಂದು ಪ್ರಾರ್ಥಿಸಿದ್ಧೇವೆ. ಈ ಕ್ಷೇತ್ರವನ್ನು ಮುಂದಿನ ದಿನಗಳಲ್ಲಿ ಮತ್ತಷ್ಟು ಅಭಿವೃದ್ಧಗೊಳಿಸಬೇಕೆಂದು ಸರ್ಕಾರಕ್ಕೆ ಸೂಲಿಬೆಲೆ ಮನವಿ ಮಾಡಿದರು.

ಇದೇ ವೇಳೆ ಮಾತನಾಡಿದ ವಿಜಯನಗರ ಸಾಮ್ರಾಜ್ಯದ ವಂಶಸ್ಥ ಕೃಷ್ಣದೇವರಾಯ ಮಾತನಾಡಿ, ಹನುಮ ಜನಿಸಿದ ಅಂಜನಾದ್ರಿ ಬೆಟ್ಟಕ್ಕೆ ವಿದೇಶಿಗರೂ ಬರುತ್ತಾರೆ. ಹಂಪಿಗೆ ಬರೋ ಪ್ರವಾಸಿಗರು ಇಲ್ಲಿಯೂ ಬರುತ್ತಾರೆ. ಹೀಗಾಗಿ ಈ ಕ್ಷೇತ್ರವನ್ನು ಪ್ರವಾಸಿ ತಾಣವಾಗಿ ಅಭಿವೃದ್ಧಿಗೊಳಿಸಬೇಕೆಂದು ಮನವಿ ಮಾಡಿದರು.