Dharwad Rain - ಧಾರವಾಡ ಜಿಲ್ಲೆಯಲ್ಲಿ ವರುಣನ ಆರ್ಭಟ ; ಪ್ರವಾಹದಲ್ಲಿಯೇ ದನಕರುಗಳ ಜೊತೆ ಹಳ್ಳ ದಾಟುತ್ತಿರುವ ಜನ

ಧಾರವಾಡ ಜಿಲ್ಲೆ ಕುಂದಗೋಳ ತಾಲ್ಲೂಕಿನಲ್ಲಿ ಧಾರಾಕಾರ ಮಳೆಯಾಗುತ್ತಿದ್ದು ಹಳ್ಳಕೊಳ್ಳಗಳು ತುಂಬಿ ಹರಿಯುತ್ತಿವೆ. ಪ್ರವಾಹದ ರಭಸಕ್ಕೆ ಗ್ರಾಮೀಣ ರಸ್ತೆಗಳು‌ ಕೊಚ್ಚಿ ಹೋಗಿವೆ. ಭೀಕರ ಪ್ರವಾಹದಲ್ಲಿಯೇ ರೈತರು ತಮ್ಮ ದನಕರುಗಳ ಜೊತೆಗೆ ಹಳ್ಳ ದಾಟಿದ್ದಾರೆ.

ರಭಸವಾಗಿ ಹರಿಯುವ ಹಳ್ಳವನ್ನು ಪ್ರಾಣದ ಭಯದಲ್ಲೇ ದಾಟಿದ್ದಾರೆ‌. ಮನೆ ತಲುಪಲು ಹರಸಾಹಸ ಪಡುತ್ತಿದ್ದಾರೆ. ನೆರೆಯಲ್ಲಿಯೇ ಹೊಲದಿಂದ ಮನೆಗೆ ತೆರಳಲು ಅನ್ನದಾತರ ಪರದಾಡುತ್ತಿದ್ದಾರೆ. ಗುಡೇನಕಟ್ಟಿ -ಮುಳ್ಳೊಳಿ- ಎರೇನಾರಾಯಣಪುರ ಸಂಪರ್ಕ ಕಡಿತಗೊಂಡಿದೆ. ನರಚನಹಳ್ಳದ ಪ್ರವಾಹಕ್ಕೆ‌‌ ಗ್ರಾಮೀಣ ಭಾಗದ ಜನಜೀವನ ಸಂಪೂರ್ಣ ಅಸ್ತವ್ಯಸ್ತವಾಗಿದೆ.

ಮಳೆಗಾಲ ಆರಂಭವಾದರೆ ನರಚನಹಳ್ಳ ಉಕ್ಕಿ ಹರಿಯುತ್ತೆ. ಈ ವೇಳೆ ಗ್ರಾಮೀಣ ರಸ್ತೆಗಳು, ಹೊಲಕ್ಕೆ ತೆರಳುವ ಮಾರ್ಗಗಳು ಬಂದ್ ಆಗುತ್ತವೆ. ಪ್ರವಾಹದ ತೀವ್ರತೆ ಹೆಚ್ಚಿದರೆ ರೈತರು ಹೊಲಗಳಲ್ಲಿಯೇ ರಾತ್ರಿ ಕಳೆಯಬೇಕಾಗುತ್ತೆ. ಪ್ರವಾಹ ತಗ್ಗುವವರೆಗೆ ಇದ್ದಲ್ಲಿ ಕಾಯುತ್ತಿರಬೇಕಾಗುತ್ತೆ. ಮನೆಯಲ್ಲಿದ್ದವರು ಹೊಲಕ್ಕೆ ಮತ್ತು ಹೊಲದಲ್ಲಿ ಇದ್ದವರು ಮನೆಗೆ ಹೋಗುವಂತಿಲ್ಲ. ಕುಂದಗೋಳ ತಾಲ್ಲೂಕಿನ ಹಲವು ಗ್ರಾಮಗಳು ಸಂಪರ್ಕ ಕಳೆದುಕೊಳ್ಳುತ್ತವೆ.

ಅನಾರೋಗ್ಯ ಪೀಡಿತರು ಚಿಕಿತ್ಸೆಗೆಂದು ಆಸ್ಪತ್ರೆಗಳಿಗೆ ಹೋಗಲು ಆಗಲ್ಲಾ. ಶಾಲಾ ಕಾಲೇಜುಗಳು ತೆರೆದರೂ ವಿದ್ಯಾರ್ಥಿಗಳಿಗೆ ಹೋಗಲು ಆಗಲ್ಲಾ. ಪ್ರತಿನಿತ್ಯ ಜೀವ ಭಯದಲ್ಲೇ ಹಳ್ಳವನ್ನು ನಡೆದು ದಾಟಬೇಕು. ಹೆಂಗಸರು, ಮಕ್ಕಳು, ವೃದ್ಧರು, ಅನಾರೋಗ್ಯ ಪೀಡಿತರು ಸಾಕಷ್ಟು ಸಂಕಷ್ಟಗಳನ್ನು ಎದುರಿಸುತ್ತಿದ್ದಾರೆ.

ಈ ಹಳ್ಳಕ್ಕೆ ಕಿರು ಸೇತುವೆ ನಿರ್ಮಿಸುವಂತೆ ಸ್ಥಳೀಯರ ಆಗ್ರಹಿಸುತ್ತಲೇ ಬಂದಿದ್ದಾರೆ. ಆದರೆ ಧಾರವಾಡ ಜಿಲ್ಲೆ ಕುಂದಗೋಳ ತಾಲ್ಲೂಕಿನ ಗುಡೇನಕಟ್ಟಿ ಗ್ರಾಮಸ್ಥರ ದಶಕದ ಬೇಡಿಕೆಗೆ ಜನ ಪ್ರತಿನಿಧಿಗಳಾಗಲಿ, ಅಧಿಕಾರಿಗಳಾಗಲಿ ಕಿವಿಗೊಟ್ಟಿಲ್ಲ. ಇನ್ನೊಂದೆಡೆ ನೆರೆ ಹಾವಳಿಗೆ ರೈತರು ಬೆಳೆದ ಬೆಳಗಳು ನಾಶವಾಗುತ್ತಿವೆ. ಶೇಂಗಾ, ಹೆಸರು ಬೆಳೆಗಳು ಮಳೆ‌ ನೀರಲ್ಲಿ ಕೊಚ್ಚಿ ಹೋಗಿ ಅನ್ನದಾತರಿಗೆ ಮತ್ತಷ್ಟು ಸಂಕಷ್ಟ ಎದುರಾಗಿದೆ.

ಕಷ್ಟಪಟ್ಟು ಬೆಳೆದಿದ್ದ ಬೆಳೆ ನೀರಲ್ಲಿ ಹೋಮವಾಗುತ್ತಿರುವುದು ಅನ್ನದಾತರು ಕಣ್ಣೀರಲ್ಲಿ ಕೈತೊಳೆಯುವಂತೆ ಮಾಡಿದೆ. ಸಾಲಸೂಲ ಮಾಡಿ ಬೆಳೆದ ಬೆಳೆಗಳು ರೈತರ ಕಣ್ಣೆದುರೇ ನೀರಲ್ಲಿ ತೇಲಿ ಹೋಗುತ್ತಿವೆ. ಮಳೆಯ ಪ್ರಮಾಣ ಹೆಚ್ಚಾದರೆ ಹಳ್ಳದ ನೀರು ಹೊಲಗಳಿಗೆ ನುಗ್ಗಿ ಮತ್ತಷ್ಟು ಅವಾಂತರ ಸೃಷ್ಟಿಯಾಗುತ್ತಿದೆ.

ಹೀಗಾಗಿ ಅಲ್ಲಲ್ಲಿ ಚೆಕ್‌ ಡ್ಯಾಂ ನಿರ್ಮಿಸಿ ಪ್ರವಾಹದ ತೀವ್ರತೆ ತಗ್ಗಿಸಬೇಕು ಎಂದು ಕುಂದಗೋಳ ತಾಲ್ಲೂಕಿನ ಜನರು ಆಗ್ರಹಿಸುತ್ತಲೇ ಬಂದಿದ್ದಾರೆ. ಆದರೆ ರೈತರ ಮನವಿಗೆ ಸೂಕ್ತ ಸ್ಪಂಧನೆ ಸಿಕ್ಕಿಲ್ಲ.

ಸಿಡಿಲು ಬಡಿದು ರೈತ ಮಹಿಳೆ ಸಾವನ್ನಪ್ಪಿರುವ ಘಟನೆ, ಕುಂದಗೋಳ ತಾಲ್ಲೂಕಿನ ತರ್ಲಘಟ್ಟ ಗ್ರಾಮದಲ್ಲಿ ನಡೆದಿದೆ. 45 ವರ್ಷ ವಯಸ್ಸಿನ ಸಾವಮ್ಮ ಗಿಡಬಸಪ್ಪನವರ್ ಮೃತ ರೈತ ಮಹಿಳೆ.

ಹೊಲದ ಕೆಲಸ ಮುಗಿಸಿ ಮನೆಗೆ ಬರುತ್ತಿದ್ದಾಗ ಗುಡುಗು ಸಹಿತ ಧಾರಾಕಾರ ಮಳೆ ಸುರಿದಿದೆ. ಈ ವೇಳೆ ಸಿಡಿಲು ಅಪ್ಪಳಿಸಿ ಸಾವಮ್ಮ ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ. ಘಟನೆಯ ಕುರಿತು ಧಾರವಾಡ ಜಿಲ್ಲೆಯ ಕುಂದಗೋಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.