ಗುಬ್ಬಿ ಸಂತತಿ ಉಳಿಸಲು ಪಕ್ಷಿಗಳಿಗೆ 3 ಎಕರೆ ಜೋಳದ ಹೊಲ ಮೀಸಲಿಟ್ಟ ದಾವಣಗೆರೆಯ ವ್ಯಕ್ತಿ

ಮಾರಕ ಕೊರೋನಾದಿಂದಾಗಿ ಮನುಷ್ಯರಿಗಷ್ಟೇ ಅಲ್ಲದೇ, ಪ್ರಾಣಿ-ಪಕ್ಷಿಗಳಿಗೂ ಸಂಕಷ್ಟಗಳು ಎದುರಾಗಿವೆ. ಎಷ್ಟೋ ಕಡೆ ಬೀದಿನಾಯಿಗಳು ಆಹಾರವಿಲ್ಲದೇ ನರಳುತ್ತಿವೆ. ಇಂತಹ ಸಂದರ್ಭದಲ್ಲಿ ದಾವಣೆಗೆಯಲ್ಲಿ ವ್ಯಕ್ತಿಯೊಬ್ಬರು ತಮ್ಮ ಹೊಲದಲ್ಲಿ ಜೋಳ ಬೆಳೆದು ಪಕ್ಷಿಗಳಿಗೋಸ್ಕರ ಮೀಸಲಿಟ್ಟಿದ್ದಾರೆ.

ಸುಮಾರು 3 ಎಕರೆ ಹೊಲದಲ್ಲಿ ಜೋಳ ಬೆಳೆದಿರುವ ಚಂದ್ರಶೇಖರ್ ಸಂಕೋಳ, ಗುಬ್ಬಿ ಸಂತತಿ ಉಳಿಸುವ ಧ್ಯೇಯ ಹೊಂದಿದ್ದಾರೆ. ಆ ಮೂಲಕ ಮಾನವೀಯತೆ ಮೆರೆಯುವ ಕೆಲಸ ಮಾಡುತ್ತಿದ್ದಾರೆ. ಅಲ್ಲದೇ ತಮ್ಮ ಕುಟುಂಬ ಸದಸ್ಯರೊಂದಿಗೆ ಪ್ರತಿದಿನ ಪಕ್ಷಿಗಳ ಚಿಲಿಪಿಲಿ ಶಬ್ದವನ್ನು ಕೇಳುತ್ತಾ ತೋಟದ ಕೆಲಸದಲ್ಲಿ ನಿರತರಾಗಿದ್ದಾರೆ.

ಎಲ್ಲೆಂದರಲ್ಲಿ ಕೂತಿರುವ ಗುಬ್ಬಿಗಳು ಹಾಗೂ ಗಿಣಿಗಳು, ಸ್ವಚ್ಚಂದವಾಗಿ ಯಾರ ಭಯವಿಲ್ಲದೆ ಜೋಳ ತಿನ್ನುತ್ತಿರುವ ವಿವಿಧ ರೀತಿಯ ಗುಬ್ಬಿಗಳು. ಇದು ದಾವಣಗೆರೆಯ ಚಂದ್ರಶೇಖರ್ ಅವರ ಜೋಳದ ತೋಟದಲ್ಲಿ ಕಂಡು ಬಂದ ದೃಶ್ಯ. ಒಂದೊನಾಂದು ಕಾಲದಲ್ಲಿ ಗುಬ್ಬಿಗಳೆಂದರೆ ಎಲ್ಲಿ ನೋಡಿದರೂ ಕಾಣುತ್ತಿದ್ದವು. ಆದರೆ ಇತ್ತೀಚೆಗೆ ಗುಬ್ಬಿಗಳ ಸಂತತಿ ಕಡಿಮೆಯಾಗುತ್ತಿದೆ. ಹೀಗಾಗಿ ಗುಬ್ಬಿ ಸಂತತಿ ಉಳಿಸಲು ಪಣ ತೊಟ್ಟಿರುವ ಚಂದ್ರಶೇಖರ್ ತಮ್ಮ ಜೋಳದ ತೋಟವನ್ನೇ ಮೀಸಲಿಟ್ಟಿದ್ದಾರೆ.

ಕೊರೊನಾ ವೈರಸ್ ಬಂದಾಗಿನಿಂದ ಕೆಲವರಿಗೋಸ್ಕರ ಹಲವರು ಒಂದಲ್ಲ ಒಂದು ರೀತಿ ಸಹಾಯ ಮಾಡುತ್ತಿದ್ದಾರೆ, ಆದರೆ ಮೂಕ ಪ್ರಾಣಿಗಳಿಗೆ ಬಗ್ಗೆ ಯಾರೂ ತಲೆಕೆಡಿಸಿಕೊಂಡಿದ್ದಿಲ್ಲ. ದಾವಣಗೆರೆಯ ಚಂದ್ರಶೇಖರ್ ಎಂಬುವವರು ಮಾಧ್ಯಮದಲ್ಲಿ ಬಂದ ವರದಿಗಳಿಂದ ಎಚ್ಚೆತ್ತು ಪಕ್ಷಿಗಳಿಗೆ ಆಹಾರಕ್ಕಾಗಿ ಏನಾದರೂ ಮಾಡಬೇಕೆಂದು ನಿರ್ಧರಿಸಿದ್ದಾರೆ.

ಹೀಗಾಗಿ ತಮ್ಮ ಮೂರು ಎಕರೆ ಅಡಿಕೆ ತೋಟದಲ್ಲಿ ಊಟ ಮಾಡುವ ಜೋಳ ಬೆಳೆಯಲು ತೀರ್ಮಾನಿಸಿದ್ದಾರೆ. ಅದೇ ರೀತಿ ಇದೀಗ ಜೋಳ ಉತ್ತಮ ಫಸಲು ಬಂದಿದ್ದು, ಇದನ್ನ ಮಾರಾಟ ಮಾಡಿದ್ದರೆ ಸುಮಾರು 1 ಲಕ್ಷದವರೆಗೆ ಆದಾಯ ಗಳಿಸಬಹುದಾಗಿತ್ತು.

ಆದರೆ ಇದು ನಮಗೆ ಬೇಡ ಎಂದು ಪಕ್ಷಿಗಳಿಗೋಸ್ಕರ ಜೋಳವನ್ನ ಕಟಾವು ಮಾಡದೆ ಹಾಗೇ ಬಿಟ್ಟಿದ್ದಾರೆ. ಪಕ್ಷಿಗಳು ಬಂದರೆ ಅವುಗಳಿಗೆ ತೊಂದರೆ ಮಾಡದೆ ಹಾಗೇ ಬಿಟ್ಟಿದ್ದಾರೆ, ಇದರ ಪರಿಣಾಮ ಇದೀಗ ಸಾವಿರಾರು ವಿವಿಧ ಜಾತಿಯ ಗುಬ್ಬಿಗಳು ಹಾಗೂ ಗಿಣಿಗಳು ಹೊಲಕ್ಕೆ ಬಂದು ಜೋಳವನ್ನು ತಿನ್ನುತ್ತಿವೆ.

ಅಲ್ಲದೇ ಅವುಗಳ ಚಿಲಿಪಿಲಿ ಶಬ್ದಗಳಿಂದ ಅವರು ರೋಮಾಂಚನಗೊಂಡಿದ್ದಾರೆ, ಪ್ರತಿದಿನ ಕುಟುಂಬ ಸಮೇತರಾಗಿ ತೋಟಕ್ಕೆ ಬಂದು ಪಕ್ಷಿಗಳ ಶಬ್ದವನ್ನ ಆಲಿಸುತ್ತಿದ್ದಾರೆ. ಕೋವಿಡ್ ಸಂದರ್ಭದಲ್ಲಿ ಯಾಕೆ ಈ ರೀತಿ ಐಡಿಯಾ ಬಂತು ಎಂದು ಚಂದ್ರಶೇಖರ್ ಸಂಕೋಳ ನ್ಯೂಸ್ 18 ಕನ್ನಡದ ಜೊತೆ ಮನದಾಳದ ಮಾತನ್ನ ಬಿಚ್ಚಿಟ್ಟಿದ್ದಾರೆ.

ದಾವಣಗೆರೆ ತಾಲ್ಲೂಕಿನ ಶಾಮನೂರು ಬಳಿಯ ಚಂದ್ರಶೇಖರ್ ತಮ್ಮ ಜಮೀನಿನಲ್ಲಿ ಪಕ್ಷಿಗಳಿಗೋಸ್ಕರ ಜೋಳದ ಬೆಳೆಯನ್ನ ಮೀಸಲಿಟ್ಟಿದ್ದಾರೆ, ದಿನೇ ದಿನ ಸಾವಿರಾರು ಗುಬ್ಬಚ್ಚಿಗಳು ಹಾಗೂ ಗಿಣಿಗಳು ಇಲ್ಲಿಗೆ ಬಂದು ಜೋಳವನ್ನ ತಿಂದು ಇಲ್ಲಿಯೇ ಗೂಡು ಕಟ್ಟಿಕೊಂಡಿವೆ. ಗುಬ್ಬಿಗಳಲ್ಲಿ ಹಲವು ಪ್ರಭೇದಗಳಿವೆ, ಅದರಲ್ಲಿ ಗೀಜಗಳು, ಚುಕ್ಕೆ ಮುನಿಯಾ, ಕಪ್ಪು ತಲೆ ಮುನಿಯಾ, ಮಿಂಚುಳ್ಳಿ, ಸಿಲ್ವರ್ ಫಿಂಚ್ ಹಾಗೂ ಇನ್ನಿತರೆ ತರೇವಾರಿ ಪಕ್ಷಿಗಳು ಇಲ್ಲಿಗೆ ಬಂದು ತಮ್ಮ ಇಷ್ಟವಾದ ಜೋಳವನ್ನ ತಿಂದು ಸಂಭ್ರಮಿಸುತ್ತಿವೆ.

ಗುಬ್ಬಿಗಳ ಸಂತತಿ ನಶಿಸುತ್ತಿರುವ ವೇಳೆ ಚಂದ್ರಶೇಖರ್ ಮಾಡಿರುವ ಈ ವ್ಯವಸ್ಥೆಯಿಂದ ಗುಬ್ಬಚ್ಚಿಗಳ ಸಂತತಿ ಉಳಿಯುತ್ತಿದೆ. ಈ ಮೂಲಕ ಚಂದ್ರಶೇಖರ್​ ತಮ್ಮ ಅಲ್ಪ ಕಾಣಿಕೆ ನೀಡಿದ್ದಾರೆ. ಚಂದ್ರಶೇಖರ್ ಪತ್ನಿ ಮಮತಾ ತಮ್ಮ ಗಂಡ ಪಕ್ಷಿಗಳಿಗೋಸ್ಕರ ಹೊಲದಲ್ಲಿ ಜೋಳವನ್ನ ಯಾಕೆ ಬೆಳೆದಿದ್ದಾರೆ ಎಂದು ನಮ್ಮ ಜೊತೆ ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ.

ಒಟ್ಟಾರೆ ಗುಬ್ಬಿಗಳ ಪ್ರಭೇದಗಳು ಇತ್ತೀಚೆಗೆ ಮಾಯವಾಗುತ್ತಿರುವ ಹಿನ್ನೆಲೆ ಈ ಒಂದು ರೀತಿಯ ಸಹಾಯದಿಂದ ಗುಬ್ಬಚ್ಚಿಗಳ ಬಗ್ಗೆ ಮುಂದಿನ ತಲೆಮಾರಿನ ಜನರಿಗೆ ಇದೊಂದು ಒಳ್ಳೆ ಉದಾಹರಣೆಯಾಗಿದೆ. ಕೋವಿಡ್ ಸಂದರ್ಭದಲ್ಲಿ ಅನೇಕರು ಹಲವು ರೀತಿಯಲ್ಲಿ ಸಹಾಯ ಮಾಡುತ್ತಿದ್ದಾರೆ, ಆದರೆ ದಾವಣಗೆರೆಯ ಚಂದ್ರಶೇಖರ್ ಮಾಡಿರುವ ಕಾರ್ಯ ಹಲವರಿಗೆ ಮಾದರಿಯಾಗಿದೆ.