Photos - ಮಡಿಕೇರಿಯಲ್ಲಿ ದಸರಾ; ಸ್ಥಳೀಯರನ್ನ ರಂಜಿಸಿದ ದಶಮಂಟಪಗಳು

ಪ್ರತೀ ವರ್ಷ ಮಡಿಕೇರಿ ದಸರಾ ವೀಕ್ಷಿಸಿ ಎಂಜಾಯ್ ಮಾಡಲು ಲಕ್ಷಾಂತರ ಜನರ ಜಂಗುಳಿ ಇರುತಿತ್ತು. ಆದರೆ ಈ ಬಾರಿ ಕೊಡಗಿನಲ್ಲಿ ಕೊರೋನಾ ಮಹಾಮಾರಿ ಹೆಚ್ಚು ಹರಡುತ್ತಿದ್ದರಿಂದ ಹೊರ ಜಿಲ್ಲೆಯಿಂದ ಬರುವವರಿಗೆ ನಿರ್ಬಂಧ ವಿಧಿಸಲಾಗಿತ್ತು.

ಸ್ಥಳೀಯರೂ ಹೆಚ್ಚು ಸಂಖ್ಯೆಯಲ್ಲಿ ಭಾಗವಹಿಸದಂತೆ ಸೂಚಿಸಲಾಗಿತ್ತು. ಹೀಗಾಗಿ ಒಂದು ಮಂಟಪದ ಜೊತೆಗೆ ಕೇವಲ 50 ಜನರು ಮಾತ್ರವೇ ಭಾಗವಹಿಸಲು ಅವಕಾಶ ನೀಡಿದ್ದರಿಂದ ಮಂಟಪಗಳ ಮೆರವಣಿಗೆ ಸಾಗುವ ಬೀದಿಗಳಲ್ಲಿ ಜನರ ಜಂಗುಳಿ ಇರಲಿಲ್ಲ.

ಜಿಲ್ಲಾಡಳಿತ ಕೂಡ ಆದಷ್ಟು ಬೇಗ ಮಂಟಪಗಳ ಮೆರವಣಿಗೆ ಮುಗಿಸುವಂತೆ ಸೂಚನೆ ನೀಡಿದ್ದರಿಂದ ಅ. 26ರಂದು ಬೆಳಗ್ಗೆ ಒಂಭತ್ತುವರೆ ಎನ್ನುವಷ್ಟರಲ್ಲೇ ಮೆರವಣಿಗೆ ಹೊರಟವು.

ಪ್ರತೀ ವರ್ಷ ಸ್ವಯಂ ಚಲನವಲನಗಳ ಮೂಲಕ ಲಕ್ಷಾಂತರ ಜನರನ್ನು ಮೂಕ ವಿಸ್ಮಿತರನ್ನಾಗಿಸುತಿದ್ದ ಪೌರಾಣಿಕ ಪಾತ್ರಗಳು ದೇವಲೋಕವನ್ನೇ ಧರೆಗೆ ಇಳಿಸುತಿದ್ದವು. ಆ ಮೂಲಕ ಇಡೀ ಮಡಿಕೇರಿ ದೇವತೆಗಳು ರಾಕ್ಷಸರ ಯುದ್ಧಭೂಮಿಯಾಗಿ ಪರಿವರ್ತನೆ ಆಗಿರುತಿತ್ತು.

ಆದರೆ ಈ ಬಾರಿ ಅದ್ಯಾವುದೂ ಇರಲಿಲ್ಲ. ಸ್ತಬ್ಧ ಚಿತ್ರಗಳಂತೆ ಮಾಡಿದ್ದ ದಶ ಮಂಟಪಗಳು ಒಂದೊಂದು ದೇವರ ಆಕೃತಿಯನ್ನು ಪ್ರತಿಷ್ಠಾಪಿಸಿ ವಿದ್ಯುತ್ ದೀಪಗಳಿಂದ ಅಲಂಕರಿಸಿದ್ದವು. ಆ ಮೂಲಕ ಸ್ಥಳೀಯ ನೋಡುಗರ ಕಣ್ಮನ ಸೆಳೆಯುತ್ತಿದ್ದವು.

ಕಳೆದ ವರ್ಷಗಳಿಗೆ ಹೋಲಿಕೆ ಮಾಡಿದರೆ ಮಡಿಕೇರಿಯ ದಸರಾ ಆಚರಣೆಗಳು ಸಿಂಪಲ್ಲಾಗಿಯೇ ಇದ್ದವು.

ಸರಳವಾಗಿಯೇ ಇದ್ದ ಮಂಟಪಗಳಿಗೆ ಬೆಳಕಿನ ಚಿತ್ತಾರದಿಂದ ಸಿಂಗಾರ ಮಾಡಲಾಗಿತ್ತು. ಒಂದು ಮಂಟಪದ ಜೊತೆ 50 ಜನರು ಭಾಗವಹಿಸಲು ಅವಕಾಶ ನೀಡಲಾಗಿತ್ತು.

ಆದರೂ ಹೆಚ್ಚಿನ ಸಂಖ್ಯೆಯಲ್ಲೇ ಭಾಗವಹಿಸಿದ್ದ ಸ್ಥಳೀಯರು ಕೊಡವ ಓಲಗಕ್ಕೆ ಹೆಜ್ಜೆಹಾಕಿ ಕುಣಿದು ಕುಪ್ಪಳಿಸಿದರು.