ಬೆಂಗಳೂರಿನಲ್ಲಿ ಕೊರೋನಾ ವಿರುದ್ಧದ ಹೋರಾಟ ಹೇಗೆ? ಬಿಬಿಎಂಪಿ ಆಯುಕ್ತರಿಂದ ಸಲಹೆ-ಸೂಚನೆ

ಬಿಬಿಎಂಪಿ ಆಯುಕ್ತ ಮಂಜುನಾಥ್ ಪ್ರಸಾದ್ ಅವರು ಬೂತ್ ಮಟ್ಟದ ಸಮಿತಿಗಳು ಹಾಗೂ ಜನಪ್ರತಿನಿಧಿಗಳ ಜೊತೆ ಸಭೆ ನಡೆಸಿದರು. ಕೊರೋನಾ ಸಂಬಂಧಿತ ಕಾರ್ಯಗಳಿಗೆ ಚುರುಕು ಮುಟ್ಟಿಸಿದರು.

ಇರುವ ಸಂಪನ್ಮೂಲಗಳನ್ನ ಸರಿಯಾಗಿ ಬಳಕೆ ಮಾಡಲು ಅಗತ್ಯ ತಂಡ ಕಟ್ಟಬೇಕು. ಸ್ವಯಂ ಸೇವಕರು ಮತ್ತು ಸ್ಥಳೀಯವಾಗಿ ಲಭ್ಯ ಇರುವ ಸರ್ಕಾರಿ ನೌಕರರನ್ನು ಬಳಕೆ ಮಾಡಬೇಕು ಎಂದು ಬಿಬಿಎಂಪಿ ಆಯುಕ್ತರು ಸಲಹೆ ನೀಡಿದರು.

ಮನೆಮನೆಗೆ ತೆರಳಿ ಅಲ್ಲಿರುವ ಹಿರಿಯರು, ಮಕ್ಕಳು, ಆರೋಗ್ಯ ಸೂಕ್ಷ್ಮ ಇರುವವರು, ಐಎಲ್ಐ, SARI ಮುಂತಾದ ಪ್ರಕರಣಗಳನ್ನ ಗುರುತು ಮಾಡಬೇಕು ಎಂದು ಮಂಜುನಾಥ ಪ್ರಸಾದ್ ತಿಳಿಸಿದರು.

ಸೋಂಕಿತರ ಪ್ರೈಮರಿ ಮತ್ತು ಸೆಕೆಂಡರಿ ಕಾಂಟ್ಯಾಕ್ಟ್ಗಳನ್ನ ಟ್ರೇಸ್ ಮಾಡುವುದು. ಹೋಮ್ ಐಸೋಲೇಶನ್​ನಲ್ಲಿ ಇರುವವರ ಮೇಲೆ ನಿಗಾ ಇಡಬೇಕು ಎಂದರು.

ಹೋಮ್ ಐಸೋಲೇನ್​ನಲ್ಲಿರುವವರ ಮನೆಗಳಿಗೆ ಖುದ್ದು ಭೇಟಿ ಮಾಡುವ ಬದಲು ದೂರವಾಣಿ ಮೂಲಕವೇ ನಿಯಮಿತ ವಿಚಾರಣೆ ನಡೆಸಬೇಕು ಎಂದು ಬಿಬಿಎಂಪಿ ಅಯುಕ್ತರು ನಡೆಸಿದ ಸಭೆಯಲ್ಲಿ ತಿಳಿಸಲಾಯಿತು.

ಕಂಟೈನ್ಮೆಂಟ್ ಜೋನ್ಗಳ ನಿರ್ವಹಣೆಯಲ್ಲಿ ಅಗತ್ಯ ಕ್ರಮ ಕೈಗೊಳ್ಳಬೇಕು. ಈ ಜೋನ್ಗಳಲ್ಲಿ ಇರುವ ಕುಟುಂಬಗಳಲ್ಲಿ ಉಚಿತ ದಿನಸಿಯ ಅಗತ್ಯ ಇರುವವರನ್ನು ಗುರುತಿಸುವ ಕೆಲಸ ಆಗಬೇಕು.

ಹಾಗೆಯೇ, ಅಗತ್ಯವಸ್ತುಗಳಿಗೆ ಹಣಪಾವತಿಸಲು ಶಕ್ತರಿರುವವರ ಪಟ್ಟಿಯನ್ನೂ ಮಾಡಬೇಕು. ಅವರೆಲ್ಲರಿಗೂ ಅಗತ್ಯ ಸೌಕರ್ಯ ಮಾಡಿಕೊಡಬೇಕು ಎಂದು ಬಿಬಿಎಂಪಿ ಕಮಿಷನರ್ ಸೂಚನೆ ನೀಡಿದರು.

ಕಂಟೇನ್ಮೆಂಟ್ ಜೋನ್​ನಲ್ಲಿ ಇರುವ ಜನರ ಪೈಕಿ ಪ್ರತಿ ದಿನ ಹೊರಗೆ ಹೋಗಲೇಬೇಕಾದವರು, ಆರೋಗ್ಯ ಸಿಬ್ಬಂದಿ, ಪೊಲೀಸ್, ಸ್ವಚ್ಛತಾ ಸಿಬ್ಬಂದಿ ಮೊದಲಾದವರ ಪಟ್ಟಿ ಮಾಡಿ ಅವರ ಪ್ರತಿದಿನದ ಓಡಾಟಕ್ಕೆ ಪರವಾನಗಿ ಪತ್ರ ನೀಡಬೇಕು ಎಂದು ಮಂಜುನಾಥ್ ಪ್ರಸಾದ್ ಹೇಳಿದರು.