Cyber Fraud: ಫಾಸ್ಟ್​ಟ್ಯಾಗ್​ ರೀಚಾರ್ಜ್​​ ಮಾಡಲು ಹೋಗಿ 99 ಸಾವಿರ ರೂಪಾಯಿ ಕಳೆದುಕೊಂಡ ವ್ಯಕ್ತಿ; ನೀವು ಈ ತಪ್ಪು ಮಾಡೋಕೆ ಹೋಗ್ಬೇಡಿ!

ಉಡುಪಿ: ಆನ್‌ಲೈನ್‌ನಲ್ಲಿ ಫಾಸ್ಟ್ ಟ್ಯಾಗ್ ರೀಚಾರ್ಜ್ ಮಾಡಲು ಯತ್ನಿಸುತ್ತಿದ್ದ ವ್ಯಕ್ತಿಯೊಬ್ಬ ಸೈಬರ್ ಕ್ರಿಮಿನಲ್‌ಗಳ ಕೈಗೆ ಸಿಕ್ಕಿ ಬರೋಬ್ಬರಿ 99,997 ರೂಪಾಯಿ ಕಳೆದುಕೊಂಡಿದ್ದಾರೆ. ಉಡುಪಿಯ ಬ್ರಹ್ಮಾವರ ನಿವಾಸಿ ಫ್ರಾನ್ಸಿಸ್ ಪಿಯುಸ್ ಪುಟಾರ್ಡೋ ಹಣ ಕಳೆದುಕೊಂಡ ವ್ಯಕ್ತಿಯಾಗಿದ್ದಾರೆ. (ಸಾಂದರ್ಭಿಕ ಚಿತ್ರ)

ಫ್ರಾನ್ಸಿಸ್ ಪಿಯುಸ್ ಪುಟಾರ್ಡೋ ಮಂಗಳೂರಿಗೆ ತೆರಳುವ ವೇಳೆ ಹೆಜಮಾಡಿ ಟೋಲ್ ಬಳಿ ರೀಚಾರ್ಜ್ ಮಾಡಲು ಮುಂದಾಗಿದ್ದರು. ಇದಕ್ಕಾಗಿ ಗೂಗಲ್​​ನಲ್ಲಿ ಸರ್ಚ್​ ಮಾಡಿ ಪೇಟಿಎಂ ಫಾಸ್ಟ್​ಟ್ಯಾಗ್​ ಅಪ್ಲಿಕೇಶನ್ ನಿಂದ ಹೆಲ್ಪ್​​ಲೈನ್​​ ನಂಬರ್​ ಪಡೆದುಕೊಂಡು ಸೆಂಟರ್​​ಗೆ ಕರೆ ಮಾಡಿದ್ದಾರೆ.

ಗೂಗಲ್​​ನಲ್ಲಿ ಹೆಲ್ಪ್ ಸಪೋರ್ಟ್ ಸೆಂಟರ್ ಮೊಬೈಲ್ ಸಂಖ್ಯೆ +91 8249255475 ಗೆ ಫ್ರಾನ್ಸಿಸ್ ಪಿಯುಸ್ ಕರೆ ಮಾಡಿದ್ದರು. ಈ ವೇಳೆ ಕರೆ ಸ್ವೀಕರಿಸಿ ಮಾತನಾಡಿದ್ದ ವ್ಯಕ್ತಿ, ತಾನು ಪೇಟಿಎಂ ಫಾಸ್ಟ್​ಟ್ಯಾಗ್​ ವೆಬ್ ಸೈಟ್ ಅಧಿಕಾರಿ ಎಂದು ನಂಬಿಸಿ ಪಿಯುಸ್ ಅವರಿಂದ ಓಟಿಪಿ ಪಡೆದುಕೊಂಡಿದ್ದಾರೆ. (ಸಾಂದರ್ಭಿಕ ಚಿತ್ರ)

ವಂಚಕರಿಗೆ ಓಟಿಪಿ ಸಿಕ್ಕಿದ್ದೆ ತಡ ಫ್ರಾನ್ಸಿಸ್ ಪಿಯುಸ್ ಪುಟಾರ್ಡೋ ಖಾತೆಯಿಂದ 99,997 ರೂಪಾಯಿಯನ್ನು ಡ್ರಾ ಮಾಡಿಕೊಂಡಿದ್ದಾರೆ. ಹೆಚ್ಚಿನ ಮೊತ್ತದಲ್ಲಿ ಹಣ ಖರೀದಿಯಾದ ವೇಳೆ ಪಿಯುಸ್​ ಅವರಿಗೆ ವಂಚನೆ ಆಗಿರುವುದು ಅರಿವಿಗೆ ಬಂದಿದೆ. ಕೂಡಲೇ ಉಡುಪಿಯ ಸೆನ್ ಪೊಲೀಸ್ ಠಾಣೆಗೆ ತೆರಳಿ ವಂಚನೆ ಬಗ್ಗೆ ದೂರು ದಾಖಲಿಸಿದ್ದಾರೆ. (ಸಾಂದರ್ಭಿಕ ಚಿತ್ರ)

ಜನವರಿ 29ರಂದು ಘಟನೆ ನಡೆದಿದ್ದು, ಐದು ಬಾರಿ ಹಂತ ಹಂತವಾಗಿ ವಂಚಕರು ಬರೋಬ್ಬರಿ 99 ಸಾವಿರ ರೂಪಾಯಿ ಹಣವನ್ನು ಡ್ರಾ ಮಾಡಿಕೊಂಡಿದ್ದಾರೆ. ಮೊದಲು 49,000 ಬಳಿಕ 19,999 ರೂಪಾಯಿ, 19,998 ರೂಪಾಯಿ, 9,999 ರೂಪಾಯಿ, ಅಂತಿಮವಾಗಿ 1,000 ರೂಪಾಯಿಯನ್ನು ಡ್ರಾ ಮಾಡಿಕೊಳ್ಳಲಾಗಿತ್ತು. (ಸಾಂದರ್ಭಿಕ ಚಿತ್ರ)

ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಪೊಲೀಸರು, ಪಿಯುಸ್ ಕರೆ ಮಾಡಿದ ನಂಬರ್ ಫೇಕ್​ ಹೆಲ್ಪ್​ಲೈನ್​ ನಂಬರ್ ಆಗಿದೆ. ಇಂಟರ್​​ನೆಟ್​ನಲ್ಲಿ ಸರ್ಚ್​​ ಮಾಡುವ ಸಂದರ್ಭದಲ್ಲಿ ಅವರಿಗೆ ನಂಬರ್ ಸಿಕ್ಕಿದೆ. ಆ ಬಳಿಕ ಅವರು ಹೇಳಿದ್ದ ಆ್ಯಪ್​ ಅನ್ನು ವ್ಯಕ್ತಿ ತಮ್ಮ ಮೊಬೈಲ್​​ನಲ್ಲಿ ಡೌನ್​​ಲೋಡ್​ ಮಾಡಿಕೊಂಡಿದ್ದಾರೆ. ನಾವು ಈಗ ಹಣ ಯಾವ ಖಾತೆಗೆ ವರ್ಗಾವಣೆ ಆಗಿದೆ ಎಂಬ ಬಗ್ಗೆ ತನಿಖೆ ಮಾಡ್ತಿದ್ದೇವೆ. ಸದ್ಯ ಐಟಿ ಆ್ಯಕ್ಟ್ ಸೆಕ್ಷನ್ 66 (ಸಿ), 66 (ಡಿ) ಪ್ರಕರಣ ದಾಖಲಿಸಿಕೊಂಡಿದ್ದೇವೆ ಎಂದು ತಿಳಿಸಿದ್ದಾರೆ. (ಸಾಂದರ್ಭಿಕ ಚಿತ್ರ)

ಫಾಸ್ಟ್​ಟ್ಯಾಗ್​ ರಿಚಾರ್ಜ್​, 5ಜಿ ಸಿಮ್​ ಅಪ್​ಡೇಟ್​ ಹೆಸರಿನಲ್ಲಿ ಹಲವರು ವಂಚನೆಗೆ ಒಳಗಾಗುತ್ತಿದ್ದು, ಗೂಗಲ್​ನಲ್ಲಿ ಸಿಗುವ ಸಹಾಯವಾಣಿ ನಂಬರ್​ಗಳನ್ನು ನಂಬಬೇಡಿ, ಯಾರಿಗೂ ಓಟಿಪಿ ಸಂಖ್ಯೆಯನ್ನು ಶೇರ್​ ಮಾಡಬೇಡಿ ಹಾಗೂ ಗೊತ್ತಿಲ್ಲದ ಆ್ಯಪ್​​ಗಳು, ಲಿಂಕ್​​ಗಳನ್ನು ನಿಮ್ಮ ಮೊಬೈಲ್​ನಲ್ಲಿ ಇನ್​​ಸ್ಟಾಲ್​ ಮಾಡಲು ಹೋಗಬೇಡಿ ಎಂದು ತಜ್ಞರು ನಿರಂತರವಾಗಿ ಜನರಿಗೆ ಜಾಗೃತಿ ಮೂಡಿಸುವ ಕಾರ್ಯ ಮಾಡುತ್ತಿದ್ದಾರೆ. ಆದರೆ ವಂಚಕರು ನಿತ್ಯ ಆಪ್​ಡೇಟ್ ಆಗುತ್ತಿದ್ದು, ಒಂದಿಲ್ಲೊಂದು ಮಾರ್ಗವನ್ನು ಹುಡುಕಿಕೊಂಡು ಜನರಿಗೆ ವಂಚನೆ ಮಾಡುತ್ತಿದ್ದಾರೆ. (ಸಾಂದರ್ಭಿಕ ಚಿತ್ರ)