Husband-Wife: ಮೊಬೈಲ್​​ ಫೋನ್​​​ ಸೀಕ್ರೆಟ್​​ ಲಾಕ್​​ ಓಪನ್​ ಮಾಡಲಿಲ್ಲ ಅಂತ ಗಂಡನ ವಿರುದ್ಧ ಪತ್ನಿ ದೂರು; FIR ದಾಖಲಿಸಿದ ಪೊಲೀಸ್​

ಹೈದರಾಬಾದ್​: ಗಂಡ-ಹೆಂಡತಿ ನಡುವೆ ಏರ್ಪಟ ವಿಚಿತ್ರ ಸಮಸ್ಯೆಯೊಂದು ಪೊಲೀಸರಿಗೆ ತಲೆನೋವು ತಂದಿರುವ ಘಟನೆ ಆಂಧ್ರ ಪ್ರದೇಶದ ಕೃಷ್ಣಾ ಜಿಲ್ಲೆಯಲ್ಲಿ ನಡೆದಿದೆ.

ಸರ್ಕಾರಿ ಕೆಲಸದಲ್ಲಿರುವ ಪತಿ-ಪತ್ನಿ ಇಬ್ಬರು ಒಬ್ಬರ ವಿರುದ್ಧ ಒಬ್ಬರು ಪೊಲೀಸ್ ಠಾಣೆಗೆ ಬಂದು ದೂರು ನೀಡಿದ್ದಾರೆ.

ಈ ನಡುವೆ ಬೇರ್ಪಡುತ್ತಿದ್ದ ದಂಪತಿಯನ್ನು ಒಂದು ಮಾಡಲು ಕೌನ್ಸಿಲ್​​​ಗೆ ಕರೆದಿದ್ದ ವೇಳೆ ಗಂಡ-ಹೆಂಡತಿ ಹೇಳಿದ ವಿಚಾರಗಳು ಪೊಲೀಸರಿಗೆ ತಲೆನೋವು ತಂದಿತ್ತಂತೆ. ಕೊನೆಗೆ ಪತ್ನಿ ಕೊಟ್ಟ ದೂರಿನ ಮೇರೆಗೆ ಪೊಲೀಸರು ಪತಿಯ ವಿರುದ್ಧ ದೂರು ದಾಖಲು ಮಾಡಿದ್ದಾರೆ.

ಇನ್ನು, ಸರ್ಕಾರಿ ಉದ್ಯೋಗದಲ್ಲಿರುವ ದಂಪತಿ ನಡುವೆ ಜಗಳ ಎದುರಾಗಲು ಕಾರಣ ಏನು ಅಂತ ತಿಳಿದಿದರೆ ಎಲ್ಲರು ಶಾಕ್​ ಆಗ್ತೀರಾ. ಹೌದು, ಮೊಬೈಲ್ ಬಳಕೆ ಮಾಡುವುದರಿಂದ ಆರೋಗ್ಯ ಸಮಸ್ಯೆಗಳು ಹೆಚ್ಚಾಗುತ್ತದೆ ಅನ್ನೋದಕ್ಕಿಂತ ಕುಟುಂಬಗಳಲ್ಲಿ ಜಗಳ ಬರಲು ಕಾರಣವಾಗುತ್ತಿದೆ ಎಂದು ಹೇಳಬಹುದು. ಈ ಪ್ರಕರಣದಲ್ಲೂ ದಂಪತಿಯ ನಡುವಿನ ಜಗಳಕ್ಕೆ ಮೊಬೈಲ್ ಫೋನ್​ ಕಾರಣವಾಗಿದೆ.

ತನ್ನ ಪತಿ ಮೊಬೈಲ್​ಗೆ ಸೀಕ್ರೆಟ್ ಲಾಕ್​ ಇಟ್ಟಿದ್ದಾರೆ, ನನ್ನ ಮೇಲೆ ಅನುಮಾನಪಟ್ಟು ಕಿರುಕುಳ ನೀಡ್ತಿದ್ದಾನೆ ಎಂದು ಪತ್ನಿ, ಪತಿಯ ವಿರುದ್ಧ ಪೊಲೀಸರಿಗೆ ನೀಡಿದ ದೂರಿನಲ್ಲಿ ಆರೋಪಿಸಿದ್ದಾರೆ. ಅಲ್ಲದೇ ಮೊಬೈಲ್ ಸೀಕ್ರೆಟ್​ ಲಾಕ್​ ನನಗೆ ತಿಳಿಸಿಬೇಕು ಎಂದು ಪಟ್ಟು ಹಿಡಿದಿದ್ದಾರೆ.

ಸಾಕಷ್ಟು ಓದಿಕೊಂಡು ಸರ್ಕಾರಿ ಉದ್ಯೋಗದಲ್ಲಿರುವ ದಂಪತಿ ಇಂತಹ ಕಾರಣದಿಂದ ಜಗಳ ಮಾಡಿಕೊಂಡು ಪೊಲೀಸ್​ ಠಾಣೆ ಮೆಟ್ಟಿಲೇರಿರುವುದು ಕಂಡ ಪೊಲೀಸರು ಇಬ್ಬರಿಗೂ ಪ್ರತ್ಯೇಕವಾಗಿ ಕೌನ್ಸಿಲಿಂಗ್​ ನಡೆಸಿದ್ದಾರೆ. ಆದರೆ ಪತಿ ತನ್ನ ಮೊಬೈಲ್​ ಸೀಕ್ರೆಟ್ ಪತ್ನಿಗೆ ಹೇಳಲು ನಿರಾಕರಿಸಿದ್ದು, ಪತ್ನಿ ಕೂಡ ತನ್ನ ಮೊಬೈಲ್​ಅನ್ನು ಪತಿಗೆ ನೀಡಲು ನಿರಾಕರಿಸಿದ್ದಾರೆ.

ಕೃಷ್ಣಾ ಜಿಲ್ಲೆಯ ಇಬ್ರಾಹಿಂ ಪಟ್ಟಣದ ಪೊಲೀಸ್ ಠಾಣೆಯಲ್ಲಿ ಕೆಲ ದಿನಗಳ ಹಿಂದೆ ಘಟನೆ ನಡೆದಿದ್ದು, ಇನ್ನು ಏನು ಮಾಡಲಾಗದೆ ಪೊಲೀಸರು ಮಹಿಳೆ ನೀಡಿದ ದೂರಿನ ಮೇರೆಗೆ ಪತಿ ವಿರುದ್ಧ ಎಫ್​ಐಆರ್ ದಾಖಲು ಮಾಡಿದ್ದಾರೆ.