Crime News: ನೇಪಾಳಿ ಗ್ಯಾಂಗ್ ಕೆಲಸಕ್ಕೆ ಸೇರಿಸಿಕೊಳ್ಳೋ ಮುನ್ನ ಹುಷಾರ್; ನಿದ್ದೆ ಮಾತ್ರ ಹಾಕಿ, ₹70 ಲಕ್ಷ!, 1100 ಗ್ರಾಂ ಚಿನ್ನಾಭರಣ ದೋಚಿ ಎಸ್ಕೇಪ್!‌

ಬೆಂಗಳೂರು: ಇವರು ನೋಡಲು ಅಮಾಯಕರಂತೆ ಕಾಣಿಸುವ ಮಹಿಳೆಯರು. ಏನೂ ಗೊತ್ತಿಲ್ಲ ಅನ್ನೋ ರೀತಿ ಮಾತನಾಡಿ ಮನೆ ಕೆಲಸಕ್ಕೆ ಸೇರಿಕೊಳ್ಳುತ್ತಾರೆ. ಆಮೇಲೆ ಸ್ವಲ್ಪ ಯಾಮಾರಿದರೆ ಮುಗಿತು. ನಿಮ್ಮ ಮನೆಯನ್ನ ಗುಡಿಸಿ ಗುಂಡಾಂತರ ಮಾಡ್ತಾರೆ.

ಬೆಂಗಳೂರಲ್ಲಿ ಇತ್ತೀಚೆಗೆ ಮನೆಗಳ್ಳತನ ಆಗಿದೆ ಎಂದರೆ ಅದು ನೇಪಾಳಿ ಗ್ಯಾಂಗ್ ಕೆಲಸ ಅನ್ನೋ ರೀತಿ ಆಗಿದೆ. ಈ ಹಿಂದೆ ಸೆಕ್ಯೂರಿಟಿ ಗಾರ್ಡ್​ಗಳಾಗಿ ಕೆಲಸ ಮಾಡುತ್ತಿದ್ದ ನೇಪಾಳಿಗಳು ಇದೀಗ ಮನೆ ಕೆಲಸಕ್ಕೆ ಸೇರಿಕೊಂಡು ಕಳ್ಳತನ ಮಾಡುವ ಕಾಯಕ ಶುರು ಮಾಡಿದ್ದಾರೆ.

ಜೆ.ಪಿ ನಗರದ ಬಿಲ್ಡರ್ ಮನೆಯಲ್ಲಿದ್ದ ಲಕ್ಷ ಲಕ್ಷ ರೂಪಾಯಿ ನಗದು ಹಾಗೂ ಕೆ.ಜಿ ಬಂಗಾರ ಕದ್ದು ಎಸ್ಕೇಪ್ ಆಗಿದ್ದರು. ಭಾರತದ ಬಾರ್ಡರ್ ದಾಟುವ ಮುನ್ನವೇ ಪೊಲೀಸರು ಗೋರಖ್ ಶಾಹಿ ಗ್ಯಾಂಗ್ ಬಂಧಿಸಿದ್ದಾರೆ.

ಈ ಗ್ಯಾಂಗ್​ನ ಪ್ರಮುಖ ಆರೋಪಿ ಗೋರಕ್ ಶಾಹಿ ಅಲಿಯಾಸ್ ಗೋರಕ್ ಬಹದ್ದೂರ್ (50), ಬೆಂಗಳೂರಿನ ಪ್ರತಿಷ್ಠಿತ ಮನೆಗಳಲ್ಲಿ ತನ್ನ ಕಡೆಯವರನ್ನು ಕೆಲಸಕ್ಕೆ ಸೇರಿಸುವುದನ್ನೇ ಕಾಯಕ ಮಾಡಿಕೊಂಡಿದ್ದ. ದೊಡ್ಡ ದೊಡ್ಡ ಬಂಗಲೆಗಳಲ್ಲಿ ತನ್ನ ಕಡೆಯವರು ಕೆಲಸಕ್ಕೆ ಸೇರಿದ ಬಳಿಕ ಅವರಿಂದಲೇ ಮನೆ ಕಳವು ಮಾಡಿಸುವುದು ಈತನ ಕೃತ್ಯವಾಗಿತ್ತು.

ಅದೇ ರೀತಿ ಜೆ.ಪಿ.ನಗರದ ಕಿರಣ್ ಎಂಬುವರ ಮನೆಗೆ ಸುನೀಲ್, ಲಕ್ಷ್ಮಿ ಹಾಗೂ ನೇತ್ರಾ ಎಂಬುವನ್ನು ಕೆಲಸಕ್ಕೆ ಸೇರಿಸಿದ್ದ. ಕೆಲಸಕ್ಕೆ ಸೇರಿದ್ದ ಲಕ್ಷ್ಮಿ ಸೇಜುವಲ್ (33) ಹಾಗೂ ನೇತ್ರಾ ಶಾಹಿ (43), ಸುನಿಲ್​ ಮೊದಲಿಗೆ ಮಾಲೀಕರ ವಿಶ್ವಾಸ ಗಳಿಸಿದ್ದರು. ಈ ಮಧ್ಯೆ ಕಿರಣ್​ ತಂದೆ ತಾಯಿ ತಿರುಪತಿಗೆ ಹೋಗಿದ್ದರು. ಇದೇ ಸಮಯ ನೋಡಿ ಕಿರಣ್​ಗೆ ಊಟದಲ್ಲಿ ನಿದ್ದೆ ಬರುವಂತ ಔಷಧಿ ಬೆರೆಸಿ ಪ್ರಜ್ಞೆ ತಪ್ಪಿಸಿದ್ದರು.

ನಿದ್ರೆ ಮಾತ್ರ ಕೆಲಸ ಶುರು ಮಾಡುತ್ತಿದ್ದಂತೆ ಖದೀಮರು ಕೂಡ ಕೆಲಸ ಶುರು ಮಾಡಿದ್ದರು. ಎಪ್ಪತ್ತು ಲಕ್ಷಕ್ಕೂ ಅಧಿಕ ನಗದು ಹಾಗೂ ಒಂದು 1,100 ಗ್ರಾಂ ಚಿನ್ನಾಭರಣ ದೋಚಿ ಎಸ್ಕೇಪ್‌ ಆಗಿದ್ದರು. ನಿದ್ರೆಯಿಂದ ಎಚ್ಚರ ಆದ ಬಳಿಕ ಕಳ್ಳತನ ಆಗಿದ್ದು ಗೊತ್ತಾಗಿ, ಜೆ.ಪಿ.ನಗರ ಠಾಣೆಯಲ್ಲಿ ಕೇಸ್ ದಾಖಲಿಸಿದ್ದರು. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡ ಇನ್ಸ್​ಪೆಕ್ಟರ್ ಕೃತ್ಯ ನಡೆದ 24 ಗಂಟೆಯೊಳಗೆ ಬಂಗಾರ ಹಾಗೂ ಕ್ಯಾಶ್​ ಜೊತೆಗೆ ಭಾರತ ಬಿಟ್ಟು ಎಸ್ಕೇಪ್ ಆಗ್ತಿದ್ದ ನೇಪಾಳಿ ಗ್ಯಾಂಗ್​ ಸಿಬ್ಬಂದಿಗಳಾದ ಸುನೀಲ್ ಸಾಹಿ, ನೇತ್ರಾ ಶಾಹಿ, ಲಕ್ಷ್ಮಿ ಸೇಜುವಲ್ (33), ಅಂಜಲಿ, ಪ್ರಶಾಂತ್ ಶಾಹಿ (21), ಅಭೇಶ್ ಶಾಹಿ, ಗೋರಖ್ ಶಾಹಿ ಎಂಬುವರನ್ನ ಬಂಧಿಸಿದ್ದಾರೆ.

ಬಂಧಿತ ಆರೋಪಿಗಳಿಂದ 77 ಲಕ್ಷ ನಗದು ಹಾಗೂ 1127 ಗ್ರಾಂ ಚಿನ್ನಾಭರಣ ಹಾಗೂ ಎರಡು ಪಿಸ್ತೂಲ್ ಗಳನ್ನ ವಶಪಡಿಸಿಕೊಳ್ಳಲಾಗಿದೆ. ಜೆ.ಪಿ.ನಗರ ಪೊಲೀಸರು ಉಳಿದ ಮತ್ತೊಬ್ಬ ಆರೋಪಿ ಬಂಧನಕ್ಕಾಗಿ ಬಲೆ ಬೀಸಿದ್ದಾರೆ. ಜಯನಗರ ಠಾಣಾ ವ್ಯಾಪ್ತಿಯಲ್ಲಿ ಒಬೇದುಲ್ಲಾ ಎಂಬುವರ ಮನೆಯಲ್ಲಿ ನೇಪಾಳಿ ದಂಪತಿ ವಿವಿಧ ಬ್ರ್ಯಾಂಡ್‌ನ 18 ವಾಚ್​ಗಳು, ತಲಾ‌ ಒಂದೊಂದು ಟ್ಯಾಬ್ ಹಾಗೂ ಮೊಬೈಲ್, ಚಿನ್ನಾಭರಣ ದೋಚಿದ್ದವರು ಬಂಧನವಾಗಿದ್ದಾರೆ. ಒಟ್ಟು ಮೂರು ಪ್ರಕರಣಗಳಲ್ಲಿ ಎರಡು ಕೋಟಿ ಮೌಲ್ಯದ ಚಿನ್ನಾಭರಣ, ನಗದು, ಪಿಸ್ತೂಲ್, ವಿದೇಶಿ‌ ಕರೆನ್ಸಿ ವಶಪಡಿಸಿಕೊಂಡಿದ್ದಾರೆ‌‌.