Bengaluru: ಪ್ರೇಯಸಿ ಜೊತೆ ಶೋಕಿ ಜೀವನಕ್ಕಾಗಿ ಬೈಕ್​, ಮೊಬೈಲ್​ ಕಳವು; ಖಾಕಿ ಅತಿಥಿಯಾದ ಕಿಲಾಡಿ ಜೋಡಿ!

ಬೆಂಗಳೂರು: ಇವರಿಬ್ಬರು ಜೋಡಿ ಹಕ್ಕಿಗಳು. ಬೇರೆ ಬೇರೆ ಏರಿಯಾದವರಾದರೂ ಪರಿಚಯ ಆಗಿ ಲವ್ ಆಗಿತ್ತು. ಆದರೆ ಈ ಜೋಡಿ ಹಕ್ಕಿಗೆ ಸುತ್ತಾಟ, ಮೋಜು ಮಸ್ತಿ ಅಂದರೆ ಪುಲ್ ಖುಷಿ.

ಈ ಫೋಟೋದಲ್ಲಿರುವ ಈ ಜೋಡಿ ನೋಡಲು ಅಮಾಯಕರ ರೀತಿ ಕಾಣಿಸುತ್ತಾರೆ. ಏನೂ ಗೊತ್ತೆ ಇಲ್ಲ, ಅನ್ನೋ ರೀತಿ ಪೋಸ್​ ಕೊಡುತ್ತಿದ್ದಾರೆ. ಇವರಿಬ್ಬರು ಅಮರ ಪ್ರೇಮಿಗಳು. ಹೌದು, ಶೋಕಿ ಮಾಡಲು ಇವರು ಆಯ್ಕೆ ಮಾಡಿಕೊಂಡಿದ್ದು ಕಳ್ಳತನ. ಕಂಡವರ ಬೈಕ್ ಮತ್ತು ಮೊಬೈಲ್ ಕಳ್ಳತನ ಮಾಡುತ್ತಿದ್ದ ಈ ಕಿಲಾಡಿ ಜೋಡಿ ಈಗ ಮಲ್ಲೇಶ್ವರಂ ಪೊಲೀಸರ ಅತಿಥಿಗಳಾಗಿದ್ದಾರೆ.

ಬಂಧಿತ ಆರೋಪಿಗಳ ಹೆಸರು ಮುರುಗಾ, ಡ್ರಗ್ ಅಡಿಕ್ಟ್ ಆಗಿದ್ದ ಆರೋಪಿ ಬೈಕ್ ಕಳ್ಳತನ ಮಾಡುವುದರಲ್ಲಿ ಎತ್ತಿದ ಕೈ. ಈ ಹಿಂದೆ ಜೈಲಿಗೆ ಹೋಗಿ ಬಂದಿದ್ದರೂ ಕಳ್ಳತನ ಮಾತ್ರ ಬಿಟ್ಟಿರಲಿಲ್ಲ.

ಮುರುಗನಿಗೆ ಜೋಡಿ ಆಗಿದ್ದು ಆತನ ಫ್ರೆಂಡ್ ತಂಗಿ. ಫ್ರೆಂಡ್ ತಂಗಿಯನ್ನೇ ಪರಿಚಯ ಮಾಡಿಕೊಂಡಿದ್ದ ಆರೋಪಿ ಮುರುಗಾ, ಆಕೆಗೂ ತನ್ನ ಚಾಲಾಕಿ ಬುದ್ಧಿ ಕಲಿಸಿದ್ದ. ಡ್ರಗ್,‌ ಗಾಂಜಾ ಅಭ್ಯಾಸ ಮಾಡಿಕೊಂಡಿದ್ದ ಆರೋಪಿಗಳು ಮೋಜು ಮತ್ತು ಮಾದಕ ಲೈಫ್​ಗೆ ಅಡಿಕ್ಟ್​ ಆಗಿದ್ದರು.

ಇತ್ತೀಚಿಗೆ ಮಲ್ಲೇಶ್ವರಂ ಠಾಣಾ ವ್ಯಾಪ್ತಿಯಲ್ಲಿ ವ್ಯಕ್ತಿಯೊಬ್ಬರಿಂದ ಫೋನ್​ ಮಾಡಲು ಅಂತಾ ಮೊಬೈಲ್​ ಈಸ್ಕೊಂಡು ಎಸ್ಕೇಪ್​ ಆಗಿದ್ದರು. ಈ ಕೇಸನ್ನು ಬೆನ್ನಟ್ಟಿದ್ದ ಪೊಲೀಸರು, ಇಬ್ಬರನ್ನ ಅರೆಸ್ಟ್ ಮಾಡಿ ವಿಚಾರಣೆ ಮಾಡಿದಾಗ ಅಸಲಿ ಸತ್ಯ ಹೊರ ಬಿದ್ದಿದೆ. ಬೈಕ್ ಕಳ್ಳತನಕ್ಕೆ ಇಳಿತಿದ್ದ ಪ್ರೇಮಿಗಳು, ಬೈಕ್​ಗಳನ್ನ ಕದ್ದು ಅವುಗಳನ್ನ ಅಲ್ಪ ಸ್ವಲ್ಪ ಹಣಕ್ಕೆ ಮಾರಾಟ ಮಾಡಿ, ಡ್ರಗ್ಸ್​, ಗಾಂಜಾ ಖರೀದಿಸಿ ಮಜಾ ಮಾಡುತ್ತಿದ್ದರು.

ಇಬ್ಬರು ಸಾರ್ವಜನಿಕರ ಬಳಿ ಫೋನ್ ಮಾಡುತ್ತೇವೆ ಅಂತ ಮೊಬೈಲ್​ ತೆಗೆದುಕೊಂಡು ಮಾತನಾಡುವಂತೆ ನಾಟಕ ಮಾಡಿ ಎಸ್ಕೇಪ್​ ಆಗುತ್ತಿದ್ದರು. ಅಲ್ಲದೇ ಮನೆ ಎದುರು ನಿಲ್ಲಿಸುತ್ತಿದ್ದ ಬೈಕ್​ಗಳನ್ನು ಕಳ್ಳತನ ಮಾಡುತ್ತಿದ್ದರು ಎಂದು ಉತ್ತರ ವಿಭಾಗ ಡಿಸಿಪಿ ಶಿವಪ್ರಕಾಶ್ ದೇವರಾಜ್ ಮಾಹಿತಿ ನೀಡಿದ್ದಾರೆ.

ಸದ್ಯ ಇಬ್ಬರನ್ನೂ ಬಂಧಿಸಿರುವ ಮಲ್ಲೇಶ್ವರಂ ಪೊಲೀಸರು, ಮೂರು ಬೈಕ್​ಗಳು ಮತ್ತು ಮೊಬೈಲ್ ಫೋನ್ ಗಳನ್ನು ಜಪ್ತಿ ಮಾಡಿದ್ದಾರೆ. ಪೊಲೀಸರು ಹೆಚ್ಚಿನ ತನಿಖೆ ನಡೆಸ್ತಿದ್ದಾರೆ.