Gambling: ಆನ್​​ಲೈನ್​​ ಜೂಜಾಟದಲ್ಲಿ ₹17 ಲಕ್ಷ ಕಳೆದುಕೊಂಡ; ಕೆಲಸ ಮಾಡ್ತಿದ್ದ ಬ್ಯಾಂಕ್​​ನಲ್ಲೇ ₹34 ಲಕ್ಷ ಎಗರಿಸಿ ಸಿಕ್ಕಿಬಿದ್ದ!

ಶಿಕ್ಷಣ ಸಾಲದ ಪ್ರೀಮಿಯಂ ಕಟ್ಟಲು ಬ್ಯಾಂಕ್​​ವೊಂದರ 137 ಗ್ರಾಹಕರು ಪಾವತಿ ಮಾಡಿದ್ದ ಸುಮಾರು 34.10 ಲಕ್ಷ ರೂಪಾಯಿಗಳನ್ನು ಬ್ಯಾಂಕ್​​ನ ಅಸಿಸ್ಟೆಂಟ್​ ಮ್ಯಾನೇಜರ್ ದುರುಪಯೋಗಪಡಿಸಿಕೊಂಡಿರುವ ಘಟನೆ ತಮಿಳುನಾಡಿ ವೆಲ್ಲೂರು ಜಿಲ್ಲೆಯಲ್ಲಿ ನಡೆದಿದೆ.

ಎಸ್‌ಬಿಐ ಬ್ಯಾಂಕ್​​ನ ಚಿಲ್ಲರೆ ಆಸ್ತಿಗಳು ಮತ್ತು ಸಣ್ಣ ಮತ್ತು ಮಧ್ಯಮ ಉದ್ಯಮಗಳ ನಗರ ಕ್ರೆಡಿಟ್ ಸೆಲ್​​ನಲ್ಲಿ (ಆರ್‌ಎಎಸ್‌ಎಂಇಸಿಸಿ) ಸಹಾಯಕ ವ್ಯವಸ್ಥಾಪಕನಾಗಿ ಕೆಲಸ ಮಾಡುತ್ತಿದ್ದ ಯೋಗೇಶ್ವರ ಪಾಂಡ್ಯನ್ ಬಂಧಿತ ಆರೋಪಿಯಾಗಿದ್ದಾನೆ.

ವೆಲ್ಲೂರಿನ ಗಾಂಧಿನಗರ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಶಾಖೆಯ ಸಹಾಯಕ ವ್ಯವಸ್ಥಾಪಕ, ಗ್ರಾಹಕರ 137 ಖಾತೆಗಳಿಂದ 34 ಲಕ್ಷ ರೂಪಾಯಿಗಳನ್ನು ಡ್ರಾ ಮಾಡಿಕೊಂಡಿದ್ದಾನೆ. ಈ ಹಣವನ್ನು ತಾನು ಆನ್​ಲೈನ್​​ ಜೂಜಾಟದಲ್ಲಿ ಕಳೆದುಕೊಂಡಿದ್ದ 17 ಲಕ್ಷ ರೂಪಾಯಿಗಳನ್ನು ಮತ್ತೆ ಗೆಲ್ಲಲು ಬಳಸಿಕೊಂಡಿದ್ದ ಎಂಬ ಮಾಹಿತಿ ಲಭ್ಯವಾಗಿದೆ.

ಬ್ಯಾಂಕ್​​ನ ಗ್ರಾಹಕರೊಬ್ಬರು ತಾವು ತೆಗೆದುಕೊಂಡಿದ್ದ ಶೈಕ್ಷಣಿಕ ಸಾಲದ ಕಂತಿನ ಹಣವನ್ನು ಬ್ಯಾಂಕ್​​ ಖಾತೆಗೆ ಪಾವತಿ ಮಾಡಿದ್ದರು. ಆದರೆ ಕಂತಿನ ಹಣ ಕಟ್ಟಿಲ್ಲ ಎಂದು ಸಂದೇಶ ಮೊಬೈಲ್​​ಗೆ ಬಂದ ಸಂದರ್ಭದಲ್ಲಿ ಬ್ಯಾಂಕ್​​ ಮ್ಯಾನೇಜರ್​ಗೆ ದೂರು ನೀಡಿದ್ದಾರೆ. ಈ ವೇಳೆ ಪರಿಶೀಲನೆ ನಡೆಸಿದ ವೇಳೆ ಸಹಾಯಕ ವ್ಯವಸ್ಥಾಪಕನಾಗಿದ್ದ ಪಾಂಡ್ಯನ್ ಕೈಚಳಕ ಬೆಳಕಿಗೆ ಬಂದಿದೆ.

ಆರೋಪಿ ಪಾಂಡ್ಯನ್​ ಬ್ಯಾಂಕ್​​ನ ಬರೋಬ್ಬರಿ 137 ಗ್ರಾಹಕರ ಖಾತೆಯಿಂದ 34 ಲಕ್ಷ ರೂಪಾಯಿಗೂ ಹೆಚ್ಚಿನ ಹಣವನ್ನು ಅಕ್ರಮವಾಗಿ ನಕಲಿ ಬ್ಯಾಂಕ್​ ಖಾತೆಗೆ ವರ್ಗಾವಣೆ ಮಾಡಿಕೊಂಡಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಬ್ಯಾಂಕ್ ಮ್ಯಾನೇಜರ್​ ನೀಡಿದ ದೂರಿನ ಮೇರೆಗೆ ಅಸಿಸ್ಟೆಂಟ್​ ಮ್ಯಾನೇಜರ್ ಪಾಂಡ್ಯನ್​​ನನ್ನು ಪೊಲೀಸರು ಬಂಧಿಸಿ ಜೈಲಿಗೆ ಕಳುಹಿಸಿದ್ದಾರೆ.

ಸದ್ಯ ಆರೋಪಿಯನ್ನು ಕೆಲಸದಿಂದ ವಜಾ ಮಾಡಲಾಗಿದ್ದು, ಪೊಲೀಸರು ಕಂಬಿ ಎಣಿಸಿವಂತೆ ಮಾಡಿದ್ದಾರೆ. 2018ರಿಂದ ಈ ಬ್ಯಾಂಕ್​​ನಲ್ಲಿ ಕೆಲಸ ಮಾಡುತ್ತಿದ್ದ ಆರೋಪಿ ಶಿಕ್ಷಣ ಸಾಲದ ವಿಮಾ ಪ್ರೀಮಿಯಂಗೆ ಗ್ರಾಹಕರು ಪಾವತಿಸಿದ ಹಣವನ್ನೇ ಟಾರ್ಗೆಟ್​ ಮಾಡಿ ನಕಲಿ ಖಾತೆಗೆ ವರ್ಗಾವಣೆ ಮಾಡಿಕೊಂಡು ವಂಚಿಸುತ್ತಿದ್ದನಂತೆ.

ಆರೋಪಿ ಪಾಂಡ್ಯನ್​ ತನ್ನ ಇಡೀ ಸಂಬಳವನ್ನು ಆನ್​​ಲೈನ್​ ಜೂಜಾಟದಲ್ಲಿ ಕಳೆಯುತ್ತಿದ್ದನಂತೆ. ಇದರಿಂದ ಸಂಕಷ್ಟಕ್ಕೆ ಸಿಲುಕಿದ್ದ ಕುಟುಂಬವನ್ನು ಶಾಲಾ ಶಿಕ್ಷಕಿಯಾಗಿರುವ ಆತನ ಪತ್ನಿ ತನ್ನ ಸಂಬಳದಲ್ಲಿ ನಿರ್ವಹಣೆ ಮಾಡುತ್ತಿದ್ದರಂತೆ. ತಾನು ಜೂಜಾಟದಲ್ಲಿ ಕಳೆದುಕೊಂಡಿದ್ದ ಹಣವನ್ನು ಮತ್ತೆ ಗೆಲ್ಲಲು ಬ್ಯಾಂಕ್​​ ಗ್ರಾಹಕರ ಖಾತೆಯಿಂದ ಹಣವನ್ನು ಅಕ್ರಮವಾಗಿ ಡ್ರಾ ಮಾಡಿಕೊಳ್ಳುತ್ತಿದ್ದನಂತೆ. ಈ ಹಣವನ್ನು ಸಹ ಆತ ಜೂಜಾಟದಲ್ಲಿ ಕಳೆದುಕೊಂಡಿದ್ದಾನೆ.