Cyber Safe: ಒಂದೇ ಒಂದು ಕ್ಲಿಕ್​, ಲಕ್ಷ ಲಕ್ಷ ಕಳೆದುಕೊಂಡ ಬಹುಭಾಷಾ ನಟಿ ನಗ್ಮಾ! ಅಸಲಿಗೆ ಆಗಿದ್ದೇನು?

ಇತ್ತೀಚೆಗೆ ಸೈಬರ್​ ಖದೀಮರು ಹೊಸ ಹೊಸ ಮಾರ್ಗಗಳ ಮೂಲಕ ವಂಚನೆ ಮಾಡುತ್ತಿದ್ದಾರೆ. ಸೈಬರ್​ ಕಳ್ಳರ ಬಲೆಗೆ ಕೇವಲ ಸಾಮಾನ್ಯ ಜನರು ಮಾತ್ರವಲ್ಲದೇ ಸ್ಟಾರ್​ ನಟರು, ನಟಿಯರು, ಗಣ್ಯರು ಕೂಡ ಬೀಳುತ್ತಿದ್ದಾರೆ.

ಸದ್ಯ ಈ ಜಾಲಕ್ಕೆ ಹಿರಿಯ ನಟಿ, ರಾಜಕಾರಣಿ ನಗ್ಮಾ ಕೂಡ ಸಿಲುಕಿಕೊಂಡು ಹಣ ಕಳೆದುಕೊಂಡಿದ್ದಾರೆ. ತಮ್ಮ ಮೊಬೈಲ್​ಗೆ ಬಂದ ಲಿಂಕ್​​ವೊಂದನ್ನು ಕ್ಲಿಕ್​ ಮಾಡಿ ಲಕ್ಷ ಲಕ್ಷ ರೂಪಾಯಿ ಕಳೆದುಕೊಂಡಿದ್ದಾರೆ.

ಫೆಬ್ರವರಿ 28 ರಂದು ನಗ್ಮಾ ಅವರ ಮೊಬೈಲ್​​ಗೆ ಬ್ಯಾಂಕ್ ಸಿಬ್ಬಂದಿ ಕಳುಹಿಸಿದಂತೆ ಮೆಸೇಜ್​ ಒಂದು ಬಂದಿದೆ. ಅದರಲ್ಲಿದ್ದ ಒಂದು ಲಿಂಕ್​​ ಓಪನ್​ ಮಾಡುತ್ತಿದ್ದಂತೆ ಆಕೆಯ ಮೊಬೈಲ್​​ಗೆ ಕರೆ ಒಂದು ಬಂದಿದೆ. ತನ್ನನ್ನು ಬ್ಯಾಂಕ್​​ ಅಧಿಕಾರಿ ಎಂದು ಪರಿಚಯ ಮಾಡಿಕೊಂಡ ಆತ ಕೆವೈಸಿ ಆಪ್​​ಡೇಟ್​​ ಮಾಡಬೇಕು ಎಂದು ಹೇಳಿದ್ದಾನೆ.

ಆದರೆ ನಟಿ ಆತನಿಗೆ ಬ್ಯಾಂಕ್​ ಮಾಹಿತಿ ನೀಡಿದ್ದರು ಕೂಡ ಬ್ಯಾಂಕ್​​ ಖಾತೆಗೆ ಲಾಗ್​​ಇನ್ ಆಗಿ ಬೆನಿಫಿಷಿಯರಿ ಅಕೌಂಟ್​ ಕ್ರಿಯೇಟ್​ ಮಾಡಿಕೊಂಡು ಸುಮಾರು ಒಂದು ಲಕ್ಷ ರೂಪಾಯಿ ಹಣವನ್ನು ಟ್ರಾನ್ಸ್​​ಫರ್​ ಮಾಡಿಕೊಂಡಿದ್ದಾನೆ.

ಇನ್ನು, ಆರೋಪಿ ಲಾಗಿನ್​ ಆಗಲು ಪ್ರಯತ್ನಿಸಿದ ವೇಳೆ ಸುಮಾರು 20 ಓಟಿಪಿಗಳು ಮೊಬೈಲ್​ ನಂಬರ್​ಗೆ ಬಂದಿದೆ ಎಂದು ತಿಳಿಸಿದ್ದಾರೆ. ದೊಡ್ಡ ಮೊತ್ತ ಕಳೆದುಕೊಳ್ಳದೆ ಸಣ್ಣ ಮೊತ್ತದೊಂದಿಗೆ ವಂಚನೆಯಿಂದ ಹೊರ ಬಂದಿದ್ದೇನೆ ಎಂದು ನಟಿ ಹೇಳಿದ್ದಾರೆ.

ನಟಿ ನಗ್ಮಾ ಮಾತ್ರವಲ್ಲದೇ ಇದೇ ಬ್ಯಾಂಕ್​​ನಲ್ಲಿ ಖಾತೆ ಹೊಂದಿದ್ದ 80 ಮಂದಿಯ ಗ್ರಾಹಕರ ಖಾತೆಯಿಂದಲೂ ಇದೇ ರೀತಿ ಹಣ ಕದ್ದಿರುವುದು ಬೆಳಕಿಗೆ ಬಂದಿದೆ. ಹಣ ಕಳೆದುಕೊಂಡ ಗ್ರಾಹಕರು ಸದ್ಯ ಸೈಬರ್ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

ಪ್ರಕರಣದ ಬೆನ್ನಲ್ಲೇ ಮುಂಬೈ ಪೊಲೀಸರು ಸಾರ್ವಜನಿಕರಿಗೆ ಎಚ್ಚರಿಕೆಯ ಸಂದೇಶ ನೀಡಿದ್ದು, ಇಂತಹ ಜಾಲಕ್ಕೆ ಸಿಲುಕದಂತೆ ವಾರ್ನ್​ ಮಾಡಿದ್ದಾರೆ. ಸೈಬರ್​ ವಂಚಕರು ಬ್ಯಾಂಕ್ ಅಧಿಕಾರಿಗಳಂತೆ ನಟಿಸುತ್ತಾರೆ, ಕೆವೈಸಿ ಅಪ್​ಡೇಟ್​​ ಮಾಡಿ ಅಂತ ಹೇಳಿ ವಂಚನೆ ಮಾಡ್ತಾರೆ. ನಿಮ್ಮ ಬ್ಯಾಂಕ್​ ಖಾತೆಯನ್ನು ಆನ್​ಲೈನ್​ ಮೂಲಕ ಲಾಗ್​​ಇನ್​ ಆಗಲು ಲಿಂಕ್​​ಗಳನ್ನ ಕಳುಹಿಸುತ್ತಾರೆ. ಯಾವುದೇ ಲಿಂಕ್​​ಗಳನ್ನು ಕ್ಲಿಕ್​ ಮಾಡುವ ಒಮ್ಮೆ ಯೋಚನೆ ಮಾಡಿ ಅಂತ ಹೇಳಿದ್ದಾರೆ.

ಅಂದಹಾಗೆ, ನಗ್ಮಾ ಅವರು 2004 ರಲ್ಲಿ ಕಾಂಗ್ರೆಸ್​ ಪಕ್ಷ ಸೇರ್ಪಡೆಯಾಗುವ ಮೂಲಕ ರಾಜಕೀಯಕ್ಕೆ ಕಾಲಿಟ್ಟಿದ್ದರು. 2014ರಲ್ಲಿ ಮೀರತ್ ಲೋಕಸಭಾ ಕ್ಷೇತ್ರದಿಂದ ಚುನಾವಣೆಗೆ ಸ್ಪರ್ಧೆ ಮಾಡಿ ಜಯಗಳಿಸಿದ್ದಾರೆ. 2015 ರಲ್ಲಿ ಅಖಿಲ ಭಾರತ ಮಹಿಳಾ ಕಾಂಗ್ರೆಸ್‌ನ ಪ್ರಧಾನ ಕಾರ್ಯದರ್ಶಿಯಾಗಿ ನೇಮಕಗೊಂಡಿದ್ದರು.