Whatsapp: ಇನ್ನು ಮುಂದೆ ಕೇವಲ ಒಂದೇ ಬಾರಿ ಫಾರ್ವಾರ್ಡ್; ಸುಳ್ಳು ಸುದ್ದಿ ತಡೆಯಲು ವಾಟ್ಸ್​ಆ್ಯಪ್​ ತಂದಿದೆ ಹೊಸ ಫೀಚರ್

ಜನಪ್ರಿಯ ಮೆಸೇಜಿಂಗ್​ ಆ್ಯಪ್ ವಾಟ್ಸ್ಆ್ಯಪ್ ಹೊಸ ಫೀಚರ್ ಅನ್ನು ಪರಿಚಯಿಸಿದೆ. ಮಹಾಮಾರಿ ಕೊರೋನಾ ವೈರಸ್ ಬಗ್ಗೆ ಗ್ರೂಪ್​​ಗಳಲ್ಲಿ ಹರಿದಾಡುತ್ತಿರುವ ಸುಳ್ಳು ಸುದ್ದಿಗಳಿಗೆ ಬ್ರೇಕ್ ಹಾಕಲು ವಾಟ್ಸ್ಆ್ಯಪ್  ಈ ನೂತನ ಫೀಚರ್​ ಅನ್ನು ಬಿಡುಗಡೆ ಮಾಡಿದೆ.

ಕೊರೋನಾ ಮಹಾಮಾರಿ ಜಗತ್ತಿನಾದ್ಯಂತ ಜನರ ಜೀವ ಹಿಂಡುತ್ತಿದೆ. ಭಾರತದಲ್ಲೂ ಸಾಕಷ್ಟು ಜನರ ಜೀವ ಬಲಿ ಪಡೆದುಕೊಂಡಿದೆ. ಮೂರು ಸಾವಿರಕ್ಕೂ ಅಧಿಕ ಜನರು ಕೊರೋನಾ ಸೋಂಕಿಗೆ ತುತ್ತಾಗಿದ್ದಾರೆ.

ಮತ್ತೊಂದೆಡೆ ಕೇಂದ್ರ ಸರ್ಕಾರ ಕೊರೋನಾ ಹರಡದಂತೆ ಮುನ್ನೆಚ್ಚರಿಕೆ ಕ್ರಮ ಜರುಗಿಸಿದೆ. ಏ.14ರವರೆಗೆ ಲಾಕ್ ಡೌನ್ ಆದೇಶ ಹೊರಡಿಸಿದೆ. ಜನರು ಮನೆಯಿಂದ ಹೊರ ಬಾರದಂತೆ ತಿಳಿಸಿದೆ.

ಲಾಕ್ ಡೌನ್​​ನಿಂದಾಗಿ ಹೆಚ್ಚಿನ ಜನರು ಸಾಮಾಜಿಕ ಜಾಲತಾಣಗಳ ಮೊರೆ ಹೋಗಿದ್ದಾರೆ. ಸಾಕಷ್ಟು ಜನರು ವಾಟ್ಸ್ಆ್ಯಪ್ ಬಳಕೆ ಮಾಡುತ್ತಿದ್ದಾರೆ. ಆದರೆ, ವಾಟ್ಸ್ಆ್ಯಪ್​ನಲ್ಲಿ ಕೊರೋನಾ ಕುರಿತಾದ ಸುಳ್ಳು ಮಾಹಿತಿಗಳು ಹರಿದಾಡುತ್ತಿದೆ. ಸಾವಿನ ಕುರಿತಾದ ಮತ್ತು ಸೋಂಕಿತರ ಕುರಿತಾದ ಸುಳ್ಳು ಸುದ್ದಿಗಳು, ವದಂತಿಗಳು ಹರಿದಾಡುತ್ತಿವೆ.

ಇದಕ್ಕೆ ಬ್ರೇಕ್ ಹಾಕಲು ವಾಟ್ಸ್ಆ್ಯಪ್ ಹೊಸ ಫೀಚರ್ ಅನ್ನು ಪರಿಚಯಿಸಿದೆ. ವಾಟ್ಸ್ಆ್ಯಪ್ ಫಾರ್ವಡ್​​ ಮೆಸೇಜ್​​ಗಳ ಮೇಲೆ ಹಿಡಿತ ಸಾಧಿಸಿದೆ.

ಇನ್ಮುಂದೆ ವಾಟ್ಸ್​​ಆ್ಯಪ್​ ಬಳಕೆದಾರ ತನಗೆ ಬಂದ ಫಾರ್ವಡ್ ಮೆಸೇಜ್ ಅನ್ನು ಒಬ್ಬರಿಗೆ ಮಾತ್ರ ಶೇರ್ ಮಾಡಬಹುದಾಗಿದೆ.

ಈ ಹಿಂದೆ ವಾಟ್ಸ್ಆ್ಯಪ್​​ನಲ್ಲಿ ಬರುವ ಸಂದೇಶಗಳನ್ನು ಲೆಕ್ಕವಿಲ್ಲದಂತೆ ಎಷ್ಟು ಜನರಿಗೆ ಬೇಕಾದರು ಶೇರ್ ಮಾಡುವ ಆಯ್ಕೆಯಿತ್ತು. ಇದರಿಂದಾಗಿ ಸುಳ್ಳು ಸುದ್ದಿಗಳ ಹರಿದಾಟ ಹೆಚ್ಚಾಗುತ್ತಲೇ ಇತ್ತು.

ಆದರೀಗ ಸುಳ್ಳು ಸುದ್ದಿಗಳನ್ನು ನಿಯಂತ್ರಕ್ಕೆ ತರಲು ವಾಟ್ಸ್ಆ್ಯಪ್ ‘ಲಿಮಿಟ್ ಶೇರಿಂಗ್‘ ಫೀಚರ್ ಅನ್ನು ಪರಿಚಯಸಿದೆ. ಈ ಮೂಲಕ ಫೇಕ್ ನ್ಯೂಸ್​ಗಳು ರವಾನೆಯಾಗದಂತೆ ಕಡಿವಾಣ ಹಾಕಿದೆ.

ಮಹಾಮಾರಿ ಕೋರೋನಾ ಜಗತ್ತಿನಾದ್ಯಂತ ಪಸರಿಸಿದೆ. ಸಾಕಷ್ಟು ಜನರನ್ನು ಬಲಿ ಪಡೆದುಕೊಂಡಿದೆ. ಇದರ ನಡುವೆ ಸಾಮಾಜಿಕ ಜಾಲತಾಣದಲ್ಲಿ ಸುಳ್ಳು ಸುದ್ದಿಗಳು ಕೂಡ ಹರಿದಾಡುತ್ತಿವೆ. ಸದ್ಯ ವಾಟ್ಸ್ಆ್ಯಪ್ ಸಂಸ್ಥೆ ಹೊಸ ಫೀಚರ್ ಮೂಲಕ ಸುಳ್ಳು ಸುದ್ದಿಗಳ ಹರಿದಾಟವನ್ನು ನಿಯಂತ್ರಕ್ಕೆ ತರಲು ಮುಂದಾಗಿದೆ.