Covid Fear: ಸೋಂಕಿತ ಮಗನನ್ನು ಕಾರ್ ಡಿಕ್ಕಿಯಲ್ಲಿ ಕೂಡಿದ ತಾಯಿ; ಕತ್ತಲೆಯಲ್ಲಿ ಕಂಗಾಲಾದ ಕಂದ

ಅಮೆರಿಕದ ಟೆಕ್ಸಾಸ್​​ನಲ್ಲಿ ಈ ಅಮಾನವೀಯ ಘಟನೆ ನಡೆದಿದೆ. 13 ವರ್ಷದ ಮಗನಿಗೆ ಕೋವಿಡ್ ಸೋಂಕು ದೃಢಗೊಂಡಿದೆ. ಈ ಸುದ್ದಿ ತಿಳಿದ ಆತನ ತಾಯಿ 41 ವರ್ಷದ ಸರಾ ಬೀಮ್​ , ತನಗೂ ಹರಡಬಹುದು ಎಂದು ಹೆದರಿದ್ದಾಳೆ.

ಈ ಹಿನ್ನೆಲೆ ಮಗನನ್ನು ಮನೆಯ ಕಾರ್​ ಡಿಕ್ಕಿಯಲ್ಲಿ ಕೂಡಿದ್ದಾಳೆ. ಕಾರ್ ಶೆಡ್​ನಲ್ಲಿ ಮಗು ಅಕ್ರಂದನ ಕೇಳಿ ಸ್ಥಳೀಯ ಮಹಿಳೆ ಈ ಸಂಬಂಧ ದೂರು ನೀಡಿದ್ದಾಳೆ. ಆಗ ಪೊಲೀಸರು ಬಂದು ವಿಚಾರಣೆ ನಡೆಸಿದಾಗ ಮಗು ಡಿಕ್ಕಿಯಲ್ಲಿ ಮಲಗಿದ್ದು ಪತ್ತೆಯಾಗಿದೆ ಎಂದು ವರದಿಯಾಗಿದೆ.

ಕೋವಿಡ್ ದೃಢಗೊಂಡಿದ್ದ ಮಗನನ್ನು ಮತ್ತೊಂದು ವೈದ್ಯಕೀಯ ಪರೀಕ್ಷೆಗೆ ಬೀಮ್ ಕರೆದೊಯ್ಯುವಾಗ ಆತನನ್ನು ಕಾರಿನ ಡಿಕ್ಕಿಯಲ್ಲಿ ಕೂರಿಸಿ ಕರೆದುಕೊಂಡು ಹೋಗಿದ್ದಾಳೆ. ಮಗನಿಂದ ಸೋಂಕು ಹರಡಬಾರದು ಎಂದು ಈ ಕೃತ್ಯ ಎಸಗಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಬಾಲಕನಿಗೆ ಕಾರಿನ ಹಿಂದಿನ ಸೀಟಿನಲ್ಲಿ ಕುಳಿತುಕೊಳ್ಳಲು ಅನುಮತಿಸುವವರೆಗೆ ಯಾವುದೇ ಪರೀಕ್ಷೆಯನ್ನು ಮಾಡಲಾಗುವುದಿಲ್ಲ ಎಂದು ಇದೇ ವೇಳೆ ಆರೋಗ್ಯ ಕಾರ್ಯಕರ್ತರು ಪಟ್ಟು ಹಿಡಿದರು.

ಕಳೆದ ಒಂದು ವಾರದ ಹಿಂದೆ ಕೂಡ ಈಕೆ ಮಗುವನ್ನು ಇದೇ ರೀತಿ ಕರೆದೊಯ್ದ ಸಂಬಂಧ ದೂರು ದಾಖಲಾಗಿದ್ದು, ಈ ಸಂಬಂಧ ಆಕೆ ಬಂಧನಕ್ಕೆ ವಾರೆಂಟ್​ ಜಾರಿ ಮಾಡಲಾಗಿದೆ. ಅದೃಷ್ಟವಶಾತ್ ಮಗುವಿಗೆ ಯಾವುದೇ ಹಾನಿ ಆಗಿಲ್ಲ.