Kottigehara Neer Dosa: ಕೊಟ್ಟಿಗೆಹಾರ ನೀರುದೋಸೆಯೇ ಯಾಕಷ್ಟು ಫೇಮಸ್? ಇಲ್ಲಿದೆ ಕುತೂಹಲಕರ ಕಾರಣ

ಚಿಕ್ಕಮಗಳೂರು ಜಿಲ್ಲೆಯ ಕೊಟ್ಟಿಗೆಹಾರ ಎಂಬ ಊರಿನ ನೀರುದೋಸೆಯಂತೂ ಜಗದ್ವಿಖ್ಯಾತವಾಗಿದೆ. ಕೊಟ್ಟಿಗೆಹಾರದಲ್ಲಿ ಸಿಗುವ ಗರಿಗರಿಯ ನೀರುದೋಸೆ ಎಂತಹವರ ಬಾಯಲೂ ಕೂಡ ನೀರು ತರಿಸುತ್ತದೆ.

ಅದ್ರಲ್ಲೂ ಸದ್ಯದ ವಾತಾವರಣದಲ್ಲಿ ಚಿಕ್ಕಮಗಳೂರು ಜಿಲ್ಲೆಗೆ ಪ್ರವಾಸಕ್ಕೆ ಹೋದ್ರೆ ನೀವು ತಪ್ಪದೇ ಸವಿಯಬೇಕಾದದ್ದು ಕೊಟ್ಟಿಗೆಹಾರದ ನೀರುದೋಸೆ. ಚಿಕ್ಕಮಗಳೂರು ಜಿಲ್ಲೆಯ ಪ್ರವಾಸಕ್ಕೆ ತೆರಳುವ ಪ್ರವಾಸಿಗರು ಕೊಟ್ಟಿಗೆಹಾರದಲ್ಲಿ ನೀರುದೋಸೆ ರುಚಿ ನೋಡದೇ ಇರೋದೇ ಇಲ್ಲ.

ಅಷ್ಟು ಫೇಮಸ್ ಕೊಟ್ಟಿಗೆಹಾರದ ನೀರುದೋಸೆ! ಹಾಗಾದ್ರೆ, ಈ ನೀರುದೋಸೆ ಯಾಕಷ್ಟು ಫೇಮಸ್ ಎಂಬ ಪ್ರಶ್ನೆ ನಿಮಗೆ ಹುಟ್ಟಿರಬಹುದು. ಈ ಪ್ರಶ್ನೆಗೆ ಉತ್ತರ ಇಲ್ಲಿದೆ ನೋಡಿ.

ಮಲೆನಾಡು ಪ್ರದೇಶವಾದ ಚಿಕ್ಕಮಗಳೂರಿಗೆ ಸಾಕಷ್ಟು ಪ್ರವಾಸಿಗರು ಆಗಮಿಸುತ್ತಾರೆ. ಹೀಗೆ ಆಗಮಿಸಿದ ಪ್ರವಾಸಿಗರು ಕೊಟ್ಟಿಗೆಹಾರಕ್ಕೂ ಭೇಟಿ ನೀಡಿ ಇಲ್ಲಿ ಸಿಗುವ ನೀರುದೋಸೆಯನ್ನು ಸವಿದು ಹೋಗುತ್ತಾರೆ.

ಕೊಟ್ಟಿಗೆಹಾರದ ಭೌಗೋಳಿಕತೆ, ವಾತಾವರಣವೇ ಇಲ್ಲೊಂದು ಬಿಸಿ ಬಿಸಿಯಾದ ರುಚಿಯಾದ ತಿಂಡಿ ತಿನ್ನಬೇಕು ಎಂಬ ಆಸೆ ಮೂಡಿಸುತ್ತದೆ.

ಕಾದ ಕಾವಲಿಯಿಂದ ಬೆಂದು ಬರುವ ಬಿಸಿಬಿಸಿ ಹಬೆಯಾಡುವ ನೀರುದೋಸೆಗೆ ವಿಶೇಷ ರೀತಿಯಲ್ಲಿ ಮಾಡಿದ ಚಟ್ನಿ, ಸಾಂಬಾರ್ ಸಖತ್ ಕಾಂಬಿನೇಷನ್. ನಾನ್ ವೆಜ್ ಪ್ರಿಯರಿಗೆ ಮೊಟ್ಟೆ ಗಸಿ, ಚಿಕ್ಕನ್ ಸಾಂಬಾರ್ ಅಥವಾ ಮೀನು ಸಾರಿನ ಜೊತೆಗೆ ತಿಂದರೆ ಅದರ ರುಚಿಯೇ ಬೇರೆ

ಅಲ್ಲದೇ ಬೆಂಗಳೂರಿನಂತಹ ಪ್ರದೇಶಗಳಿಂದ ಆಗಮಿಸುವ ಪ್ರವಾಸಿಗರು ಮಳೆಯ ವಾತಾವರಣದಲ್ಲಿ ಮಲೆನಾಡ ಸ್ಪೆಷಲ್ ನೀರುದೋಸೆಯನ್ನು ಸವಿಯಲು ಇಷ್ಟಪಡುತ್ತಾರೆ. ಇದೇ ಕಾರಣಕ್ಕೆ ಕೊಟ್ಟಿಗೆಹಾರದ ನೀರುದೋಸೆ ತುಂಬಾ ಫೇಮಸ್ ಆಗಿದೆ.

ಜೊತೆಗೆ ಘಟ್ಟದ ಪ್ರಯಾಣ ಮಾಡಿದ ಪ್ರಯಾಣಿಕರು ಜನವಸತಿ ಇರುವ ಒಂದೊಳ್ಳೆ ಸ್ಥಳಕ್ಕಾಗಿ ಕೊಟ್ಟಿಗೆಹಾರದಲ್ಲಿ ನಿಲ್ಲುತ್ತಾರೆ. ಅಲ್ಲೇ ನೀರು ದೋಸೆ ಸವಿಯುತ್ತಾರೆ. ಈ ಎಲ್ಲ ಕಾರಣಕ್ಕೆ ಕೊಟ್ಟಿಗೆಹಾರ ನೀರುದೋಸೆ ಪ್ರಸಿದ್ಧಿ ಗಳಿಸಿದೆ.