Chikkamagaluru: ಯಾರ್​ ಗುರು ವೋಟ್​ ಹಾಕ್ತಾರೆ ಅನ್ನೋರು ಇವ್ರನ್ನ ನೋಡಿ!

ಮನೆಯಲ್ಲೇ ಕೂತು ಯಾರ್​ ಗುರು ವೋಟ್​ ಹಾಕೋಕ್​ ಹೋಗ್ತಾರೆ ಅಂತ ಉದಾಸೀನ ಮಾಡುವವರೆಲ್ಲಾ ಇವರನ್ನು ನೋಡಿ ಪಾಠ ಕಲಿಬೇಕು. ಸಮೃದ್ಧ ಭಾರತಕ್ಕಾಗಿ ನಾನು ಈ ಕೆಲಸ ಮಾಡಿದೆ ಎನ್ನುವ ಇವರ ಕತೆ ಕೇಳಿ.

ಇವರ ಹೆಸರು ಸ್ವರ್ಣಲತಾ ಕಾರಂತ್​​ .ಇವರು ತಮ್ಮ 74ನೇ ವಯಸ್ಸಿನಲ್ಲಿ ಎದ್ದು ನಡೆದಾಡಲೂ ಆಗದಂಥಾ ಅನಾರೋಗ್ಯದ ನಡುವೆಯೂ ಯುವಜನತೆ ನಾಚುವಂತ ಉತ್ಸಾಹದಿಂದ ಮತದಾನ ಮಾಡಲೇಬೇಕು ಎಂದು ಹಠ ಹಿಡಿದು ಕೂತಿದ್ದರಂತೆ.

ಚಿಕ್ಕಮಗಳೂರಿನವರಾದ ಇವರು ನಗರದ  ಸೇಂಟ್ ಜೋಸೆಫ್ ಕಾನ್ವೆಂಟ್ ಸ್ಕೂಲ್​(ಬೂತ್​ ನಂಬರ್​ 187)ರಲ್ಲಿ ಮತದಾನ ಮಾಡಿದ್ದಾರೆ.

ಇವರ ಆಸಕ್ತಿಯನ್ನು ಕಂಡು ಖುದ್ದು ಹಿರಿಯ ಅಧಿಕಾರಿಯಾಗಿರುವ ಇವರ ಮಗ ಪ್ರವೀಣ್ ಕಾರಂತ್ ಚುನಾವಣಾಧಿಕಾರಿಗಳನ್ನು ಸಂಪರ್ಕಿಸಿದ್ದಾರೆ. ಚುನಾವಣಾ ಆಯೋಗದ ಅಧಿಕಾರಿಗಳು ಇವರ ಮನೆ ಬಾಗಿಲಿಗೇ ಆಂಬ್ಯುಲೆನ್ಸ್ ಕಳಿಸಿ ಇವರನ್ನು ಮತಗಟ್ಟೆಗೆ ಕರೆದೊಯ್ದಿದ್ದಾರೆ.

ಬೆಳಗ್ಗೆ 10 ಗಂಟೆ ವೇಳೆಗೆ ಮನೆ ಬಳಿ ಬಂದು ನನ್ನನ್ನು ಯಾವುದೇ ಸಮಸ್ಯೆಯಾಗದಂತೆ ಜಾಗ್ರತೆಯಾಗಿ ಕರೆದುಕೊಂಡು ಹೋದರು. ಅರ್ಧ ಗಂಟೆಯಲ್ಲಿ ಮತದಾನ ಮಾಡಿ ನಾನು ಮನೆಗೆ ಮರಳಿದೆ ಎಂದು ಶ್ರೀಮತಿ ಸ್ವರ್ಣಲತಾ ಕಾರಂತ್ ನ್ಯೂಸ್ 18 ಕನ್ನಡ ಡಿಜಿಟಲ್​ಗೆ ತಿಳಿಸಿದರು.

ಮನೆಯಲ್ಲೇ ಕುಳಿತು ಹಿರಿಯರು ಮತದಾನ ಮಾಡುವ ಅವಕಾಶ ಇರುವುದು ಹೌದಾದರೂ, ಆ ಕುರಿತು ನೋಂದಣಿ ಮಾಡುವ ದಿನಾಂಕ ಕಳೆದ ನಂತರ ಇವರಿಗೆ ಅನಾರೋಗ್ಯ ಉಂಟಾಗಿದೆ. ಹಾಗಾಗಿ ಮನೆಯಿಂದ ಮತದಾನ ಮಾಡುವ ಅವಕಾಶ ಇವರಿಗೆ ಸಾಧ್ಯವಾಗಿಲ್ಲ.