Interview Questions: ಇಂಟರ್​ವ್ಯೂನಲ್ಲಿ ಕೇಳುವ ಪ್ರಶ್ನೆಗೆ ಉತ್ತರ ಗೊತ್ತಿಲ್ಲದಿದ್ದರೆ, ಏನ್ಮಾಡ್ಬೇಕು?

ಜಾಬ್ ಇಂಟರ್ ವ್ಯೂನಲ್ಲಿ ಕೇಳುವ ಎಲ್ಲಾ ಪ್ರಶ್ನೆಗಳಿಗೂ ನಿಮಗೆ ಉತ್ತರ ತಿಳಿದಿರಬೇಕು ಅಂತಿಲ್ಲ. ಉತ್ತರ ಗೊತ್ತಿಲ್ಲದ ಮಾತ್ರಕ್ಕೆ ತಡಬಡಾಗಿಸಿ ಸಂದರ್ಶನಕರ ಮುಂದೆ ಪೆಚ್ಚು ಮೊರೆ ಹಾಕಿ ನಿಲ್ಲುವ ಅಗತ್ಯವಿಲ್ಲ.

ನೇರವಾಗಿ ಎರಡೇ ಪದಗಳಲ್ಲಿ ನಂಗೆ ಇದರ ಬಗ್ಗೆ ಗೊತ್ತಿಲ್ಲ ಎನ್ನುವುದು ಕೂಡ ಸೂಕ್ತ ರೀತಿಯಲ್ಲ. ನಿಮಗೆ ಗೊತ್ತಿಲ್ಲದ್ದನ್ನು ಗೊತ್ತಿಲ್ಲ ಎಂದು ಸರಿಯಾದ ರೀತಿಯಲ್ಲಿ ಹೇಳುವುದು ಹೇಗೆ ಎಂದು ಪ್ರತಿಯೊಬ್ಬ ಉದ್ಯೋಗಾಕಾಂಕ್ಷಿಗಳು ತಿಳಿದಿರಬೇಕು.

ಸಂದರ್ಶಕರು ಕೇಳುವ ಪ್ರಶ್ನೆ ಇಲ್ಲವೇ ಕೌಶಲ್ಯದ ಬಗ್ಗೆ ನಿಮಗೆ ತಿಳಿದಿರದಿದ್ದರೆ, ಸಮಾಧಾನವಾಗಿ ಪೂರ್ತಿ ಪ್ರಶ್ನೆಯನ್ನು ಕೇಳಿಸಿಕೊಳ್ಳಿ. ಅವರು ಕೇಳುತ್ತಿರುವ ಪ್ರಶ್ನೆ ನಿಮ್ಮ ಕೆಲಸಕ್ಕೆ ಸಂಬಂಧಪಡದಿದ್ದರೆ, ಆ ವಿಷಯ ನನ್ನ ಕೆಲಸದ ವ್ಯಾಪ್ತಿಗೆ ಬರುವುದಿಲ್ಲ. ಹೀಗಾಗಿ ಆ ಬಗ್ಗೆ ಹೆಚ್ಚಿನದ್ದನ್ನು ಇನ್ನೂ ತಿಳಿದುಕೊಳ್ಳಲು ಸಾಧ್ಯವಾಗಿಲ್ಲ ಎಂದು ಉತ್ತರಿಸಿ.

ಸಂದರ್ಶಕರು ಕೇಳುವ ಪ್ರಶ್ನೆ ನಿಮ್ಮ ಕೆಲಸಕ್ಕೆ ನೇರವಾಗಿ ಸಂಬಂಧಿಸಿದ್ದಾಗಿದ್ದರೆ, ನಿಮಗೆ ಆ ಬಗ್ಗೆ ತಿಳಿಯದಿದ್ದರೆ. ಪ್ರಶ್ನೆಯನ್ನು ಪೂರ್ತಿಯ ಕೇಳಿಸಿಕೊಂಡ ಬಳಿಕ, ಆ ಬಗ್ಗೆ ಪ್ರಸ್ತಾಪಿಸಿದ್ದಕ್ಕೆ ಧನ್ಯವಾದಗಳು. ಆ ಬಗ್ಗೆ ನಾನು ಕಲಿಯಲಿ ಆಸಕ್ತನಾಗಿದ್ದೇನೆ ಎನ್ನಬೇಕು.

ನೀವು ನನಗೆ ಕೆಲಸ ನೀಡಿದರೆ ಆ ಕೌಶಲ್ಯವನ್ನು ಸರಿಯಾದ ತರಬೇತಿ ಮೂಲಕ ಕಲಿಯುವೆ. ನಾನು ಕಲಿಕೆಯಲ್ಲಿ ಮುಂದಿದ್ದೇನೆ. ಹೊಸದನ್ನು ಕಲಿಯುವುದು ನನಗೆ ಯಾವಾಗಲೂ ಆಸಕ್ತಿಕರ ಎಂದು ಹೇಳಿ.

ಈ ರೀತಿ ಗೊತ್ತಿಲ್ಲದ್ದನ್ನು ಪ್ರಮಾಣಿಕವಾಗಿ ಒಪ್ಪಿಕೊಂಡು, ಸಂಸ್ಥೆ ಬಯಸುವಂತೆ ಆ ಬಗ್ಗೆ ಕಲಿತುಕೊಳ್ಳುವೆ ಎಂಬ ಭರವಸೆಯನ್ನು ನೀಡಿದರೆ, ಸಂದರ್ಶಕರಿಗೆ ನಿಮ್ಮ ಮೇಲೆ ಒಳ್ಳೆಯ ಅಭಿಪ್ರಾಯ ಮೂಡುತ್ತದೆ.

ಕೆಲಸ ಸಿಗಲೇಬೇಕು ಎಂದು ಗೊತ್ತಿಲ್ಲದ ಬಗ್ಗೆ ಗೊತ್ತಿದೆ ಎಂದು ಹೇಳುವುದು ಅಪಾಯಕಾರಿ. ಆಗ ಸಂದರ್ಶಕರು ನಿಮಗೆ ಗೊತ್ತಿಲ್ಲದ ವಿಷಯದ ಬಗ್ಗೆ ಹೆಚ್ಚಿನ ಪ್ರಶ್ನೆಗಳನ್ನು ಕೇಳಿ ಬಿಡಬಹುದು. ಆಗ ನೀವು ಫಜೀತಿಗೆ ಸಿಲುಕಿಕೊಳ್ಳುತ್ತೀರಿ ಹುಷಾರು.