Zomato: ನಷ್ಟದ ಸುಳಿಯಲ್ಲಿ ಸಿಲುಕಿದ ಮತ್ತೊಂದು ಕಂಪನಿ, 225 ನಗರಗಳಲ್ಲಿ ಝೊಮ್ಯಾಟೊ ಸೇವೆ ಸ್ಥಗಿತ!

ಜನಪ್ರಿಯ ಆಹಾರ ವಿತರಣಾ ಕಂಪನಿಯಾಗಿರುವ ಝೊಮ್ಯಾಟೊ ಇದೀಗ ತ್ರೈಮಾಸಿಕ ನಷ್ಟವನ್ನು ವಿಸ್ತರಿಸಿದೆ. ಕಳೆದ ವರ್ಷ ಇದೇ ತ್ರೈಮಾಸಿಕದಲ್ಲಿ ರೂ.63 ಕೋಟಿಯಷ್ಟು ನಷ್ಟವಾಗಿತ್ತು, ಆದರೆ ಈಗ ಇದರ ಮೊತ್ತ ರೂ.346 ಕೋಟಿಗೆ ದಾಖಲಾಗಿದೆ.

ಕಳೆದ ತ್ರೈಮಾಸಿಕದಲ್ಲಿ ಝೊಮ್ಯಾಟೊ 251 ಕೋಟಿ ರೂಪಾಯಿ ನಷ್ಟವನ್ನು ಘೋಷಿಸಿತು ಮತ್ತು ಇದೇ ಕಾರಣಕ್ಕೆ ಕಂಪೆನಿ ನಂತರ ಹೆಚ್ಚಿನ ಸಂಖ್ಯೆಯ ಉದ್ಯೋಗಿಗಳನ್ನು ಸಹ ವಜಾಗೊಳಿಸಿದೆ. ಆರ್ಥಿಕ ಸಂಕಷ್ಟದಿಂದ ಹೊರಬರಲು ಹಲವು ಪ್ರಯತ್ನಗಳನ್ನು ಸಹ ಮಾಡಿದೆ. ಆದರೆ, ನಿರೀಕ್ಷಿತ ಫಲಿತಾಂಶ ಇನ್ನೂ ಸಿಗುತ್ತಿಲ್ಲ ಎಂದು ವರದಿಯಾಗಿದೆ.

ನಷ್ಟವನ್ನು ಭರಿಸಲು ಝೊಮ್ಯಾಟೊ ನಿರ್ಣಾಯಕ ನಿರ್ಧಾರವನ್ನು ತೆಗೆದುಕೊಂಡಿದೆ. ಆಹಾರ ವಿತರಣಾ ಕಂಪೆನಿಯು ಸುಮಾರು 225 ಸಣ್ಣ ನಗರಗಳಲ್ಲಿ ತನ್ನ ಸೇವೆಗಳನ್ನು ನಿಲ್ಲಿಸಿದೆ ಎಂದು ಘೋಷಿಸಿದೆ. ಡಿಸೆಂಬರ್ ತ್ರೈಮಾಸಿಕ ಫಲಿತಾಂಶ ವರದಿಯಲ್ಲಿ ಇದನ್ನು ಬಹಿರಂಗಪಡಿಸಲಾಗಿದೆ. ಈ ನಿರ್ಧಾರವು ಕಳೆದ ತಿಂಗಳಿನಿಂದ ಜಾರಿಗೆ ಬಂದಿದೆ ಎಂದು ಕಂಪೆನಿ ಹೇಳಿದೆ.

225 ನಗರಗಳಲ್ಲಿನ ಝೊಮ್ಯಾಟೊ ವ್ಯಾಪಾರವು ಕೆಲವು ಭಾಗಗಳಲ್ಲಿ ಲಾಭದಾಯಕವಾಗಿಲ್ಲ ಎಂದು ಜೊಮಾಟೊ ಮುಖ್ಯ ಹಣಕಾಸು ಅಧಿಕಾರಿ ಅಕ್ಷಾಂತ್ ಗೋಯಲ್ ಹೇಳಿದ್ದಾರೆ.

ಕಳೆದ ಆರ್ಥಿಕ ವರ್ಷದ ಎರಡನೇ ತ್ರೈಮಾಸಿಕದಲ್ಲಿ ಝೊಮ್ಯಾಟೊ ಒಟ್ಟು 17.5 ಮಿಲಿಯನ್ ವಹಿವಾಟುಗಳನ್ನು ನಡೆಸಿದೆ. ಮೂರನೇ ತ್ರೈಮಾಸಿಕದಲ್ಲಿ ಇದು 17.4 ಮಿಲಿಯನ್‌ಗೆ ಕುಸಿದಿದೆ.

ಅಕ್ಟೋಬರ್‌ನಿಂದ ತನ್ನ ಆಹಾರ ವಿತರಣಾ ವ್ಯವಹಾರದಲ್ಲಿ ನಿಧಾನಗತಿಯನ್ನು ಕಂಡಿದೆ ಎಂದು ಝೊಮ್ಯಾಟೊ ತನ್ನ ಬಹಿರಂಗಪಡಿಸಿದೆ. ದೇಶಾದ್ಯಂತ ಇದೇ ಟ್ರೆಂಡ್ ಕಂಡುಬಂದರೂ ಟಾಪ್-8 ನಗರಗಳಲ್ಲಿ ಉತ್ತಮ ವ್ಯವಹಾರ ದಾಖಲಿಸಿದೆ ಎಂದು ಹೇಳಿದೆ.

ಆದರೆ ಲಾಭವಿಲ್ಲದಿದ್ದರೂ ಆದಾಯ ಗಣನೀಯವಾಗಿ ಹೆಚ್ಚುತ್ತಿದೆ. ಈ ಬಾರಿ ಶೇ.75ರಷ್ಟು ಬೆಳವಣಿಗೆ ದಾಖಲಾಗಿದೆ. 111.2 ಕೋಟಿ ರೂಪಾಯಿ ಇದ್ದ ಆದಾಯ 194.8 ಕೋಟಿಗೆ ಏರಿಕೆಯಾಗಿದೆ. ಇದು ಹಿಂದಿನ ತ್ರೈಮಾಸಿಕಕ್ಕಿಂತ ಸುಮಾರು 17 ಶೇಕಡಾ ಹೆಚ್ಚಾಗಿದೆ.

ಝೊಮ್ಯಾಟೊ ಈ ಎಲ್ಲ ನಷ್ಟವನ್ನು ಕಂಡು 225 ನಗರಗಳಲ್ಲಿ ತನ್ನ ಸೇವೆಯನ್ನು ನಿಲ್ಲಿಸಲು ಸಿದ್ಧತೆ ನಡೆಸಿದೆ.