Success Story: ತಳ್ಳುಗಾಡಿಯಿಂದ ಆರಂಭವಾದ ಐಸ್‌ಕ್ರೀಮ್ ಉದ್ಯಮ ಇಂದು 18,000 ಕೋಟಿಯ ಸಂಸ್ಥೆ; ಹ್ಯಾಟ್ಸನ್ ಯಶಸ್ಸು ಹೀಗಿದೆ

ಯಶಸ್ಸು ಎಂಬುದು ಸುಲಭವಾಗಿ ದೊರೆಯುವುದಿಲ್ಲ, ಅದಕ್ಕೆ ತಕ್ಕ ಪರಿಶ್ರಮ ಹಾಗೂ ಶ್ರಮವನ್ನು ಹೂಡಿಕೆಯಾಗಿ ವಿನಿಯೋಗಿಸಬೇಕು ಎಂಬ ತತ್ವಕ್ಕೆ ಬದ್ಧರಾಗಿರುವವರು ಆರ್‌ಜಿ ಚಂದ್ರಮೊಗನ್. ಭಾರತದ ಬಿಲಿಯನೇರ್‌ಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವ ಈ ಉದ್ಯಮಿ ಯಶಸ್ಸಿಗೆ ಇನ್ನೊಂದು ಹೆಸರು ಎಂದೇ ಹೇಳಬಹುದು.

ಸೇಲ್ಸ್ ವಿಷಯಕ್ಕೆ ಬಂದಾಗ ಚಂದ್ರಮೊಗನ್ ಅತಿದೊಡ್ಡ ಖಾಸಗಿ ಡೈರಿ ಕಂಪನಿಗಳಲ್ಲಿ ಒಂದನ್ನು ನಿರ್ಮಿಸಿದರು. 74 ರ ಹರೆಯದಲ್ಲೂ ಬತ್ತದ ಉತ್ಸಾಹಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಚಂದ್ರಮೊಗನ್ ಹ್ಯಾಟ್ಸನ್ ಆಗ್ರೋ ಪ್ರಾಡಕ್ಟ್‌ನ ಅಧ್ಯಕ್ಷರಾಗಿದ್ದಾರೆ. ಇವರು ಐಸ್‌ಕ್ರೀಮ್ ಉದ್ಯಮವನ್ನು ಆರಂಭಿಸಿದ್ದೇ ಒಂದು ರೋಚಕ ಕಥೆಯಾಗಿದ್ದು ತಳ್ಳುಗಾಡಿಗಳಲ್ಲಿ ಐಸ್‌ಕ್ರೀಮ್ ಮಾರಾಟ ಮಾಡಿ ಉದ್ಯಮದ ಒಂದೊಂದೇ ಮಜಲುಗಳನ್ನು ದಾಟಿದವರಾಗಿದ್ದಾರೆ.

ಚೆನ್ನೈ ಮೂಲದ ಉದ್ಯಮಿ ಚಂದ್ರಮೊಗನ್ ಅವರನ್ನು ಮಾನವ ಕಂಪ್ಯೂಟರ್ ಎಂದೂ ಕರೆಯುತ್ತಾರೆ. ಇದಕ್ಕೆ ಕಾರಣ ಅವರ ಅಪ್ರತಿಮ ಗಣಿತದ ಮೇಲಿನ ಜ್ಞಾನವಾಗಿದೆ. ಆದರೆ ಗಣಿತ ಪರೀಕ್ಷೆಯಲ್ಲಿ ವಿಫಲರಾಗಿದ್ದೇ ಇಂದು ಚಂದ್ರಮೊಗನ್ ಇಷ್ಟು ದೊಡ್ಡ ಸಾಮ್ರಾಜ್ಯವನ್ನು ಕಟ್ಟುವುದಕ್ಕೆ ಪ್ರೇರಣೆಯಾಯಿತು ಎಂದರೆ ಅತಿಶಯೋಕ್ತಿಯಲ್ಲ.

ಇವರ ತಂದೆ ಸಣ್ಣ ಪ್ರಾವಿಷನ್ ಅಂಗಡಿಯನ್ನಿಟ್ಟುಕೊಂಡು ವ್ಯಾಪಾರ ನಡೆಸುತ್ತಿದ್ದರು. ಶಿಕ್ಷಣಕ್ಕೆ ಎಳ್ಳುನೀರು ಬಿಟ್ಟ ಚಂದ್ರಮೊಗನ್ ಟಿಂಬರ್ ಡಿಪೋದಲ್ಲಿ 65 ರೂಪಾಯಿ ಸಂಬಳಕ್ಕೆ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಒಂದು ವರ್ಷದ ನಂತರ ಐಸ್‌ಕ್ರೀಮ್ ವ್ಯಾಪಾರ ಆರಂಭಿಸುವ ನಿಟ್ಟಿನಲ್ಲಿ ಉದ್ಯೋಗ ತೊರೆದರು ಹಾಗೂ 250 ಚದರ ಅಡಿ ಕೋಣೆಯಲ್ಲಿ ಕೇವಲ ಮೂರು ಕಾರ್ಮಿಕರೊಂದಿಗೆ ವ್ಯಾಪಾರ ಆರಂಭಿಸಿದರು. ತಮ್ಮ ಉದ್ಯಮಕ್ಕಾಗಿ ಇವರು ಹೂಡಿಕೆ ಮಾಡಿದ್ದು ರೂ13,000 ಮಾತ್ರ

ಯಾವುದೇ ಉದ್ಯಮವಾಗಿರಲಿ ಆ ಉದ್ಯಮಕ್ಕೆ ಯಶಸ್ಸು ಜಯ ಸುಲಭವಾಗಿ ದೊರೆಯುವುದಿಲ್ಲ ಅಂತೆಯೇ ಚಂದ್ರಮೊಗನ್ ಕೂಡ ಆರಂಭದಲ್ಲಿ ಸಾಕಷ್ಟು ಕಷ್ಟಗಳನ್ನು ಎದುರಿಸಬೇಕಾಯಿತು ಆದರೆ ಪರಿಶ್ರಮಕ್ಕೆ ತಕ್ಕ ಫಲ ಇದೆ ಎಂಬ ಮಾತಿನಂತೆ ಉದ್ಯಮ ಮೊದಲ ವರ್ಷದಲ್ಲಿಯೇ ರೂ 1.5 ಲಕ್ಷ ರೂಪಾಯಿ ಲಾಭ ಗಳಿಸಿ ಸಾಧನೆ ಮಾಡಿತು. ಈ ಲಾಭ ಚಂದ್ರಮೊಗನ್‌ ಅವರಲ್ಲಿ ಆತ್ಮವಿಶ್ವಾಸವನ್ನು ಹೆಚ್ಚಿಸಿತು.

1981 ರ ಸುಮಾರಿಗೆ, ಇನ್ನೂ ಕೇವಲ ಸಣ್ಣ ವ್ಯಾಪಾರದೊಂದಿಗೆ, ಸಣ್ಣ ಪಟ್ಟಣಗಳಿಗೆ ತಮ್ಮ ಉದ್ಯಮವನ್ನು ವಿಸ್ತರಿಸಿದ ಚಂದ್ರಮೊಗನ್ ಉದ್ಯಮ ಮುಂದುವರಿಸಲು ಬೇಕಾದ ತಂತ್ರಗಳನ್ನು ಅರಿತುಕೊಂಡರು. ದೊಡ್ಡ ಬ್ರ್ಯಾಂಡ್‌ಗಳು ಕೈಬಿಟ್ಟ ಮಾರುಕಟ್ಟೆಗಳನ್ನೇ ಇವರು ತಮ್ಮ ಬ್ಯುಸಿನೆಸ್‌ಗಾಗಿ ಆಯ್ದುಕೊಂಡರು.

ಹೀಗೆ ತಮ್ಮ ಬ್ರ್ಯಾಂಡ್ ಆದ ಅರುಣ್ ಐಸ್‌ಕ್ರೀಮ್ ಅನ್ನು ತಮಿಳುನಾಡಿನಲ್ಲಿ ಹೊಸ ಸ್ಪರ್ಧಿಯನ್ನಾಗಿ ಆರಂಭಿಸಿದರು. 1986 ರಲ್ಲಿ, ಅವರು ತಮ್ಮ ಕಂಪನಿಯ ಹೆಸರನ್ನು ಪ್ರಸ್ತುತ ಹ್ಯಾಟ್ಸನ್ ಆಗ್ರೋ ಉತ್ಪನ್ನ ಎಂದು ಬದಲಾಯಿಸಿದರು. ಭಾರತದ ಅತಿದೊಡ್ಡ ಖಾಸಗಿ ಡೈರಿ ಕಂಪನಿಗಳಲ್ಲಿ ಒಂದಾದ ಹ್ಯಾಟ್ಸನ್ ಪ್ರತಿದಿನ 10,000 ಹಳ್ಳಿಗಳಲ್ಲಿ 4 ಲಕ್ಷ ರೈತರಿಂದ ಹಾಲನ್ನು ಸಂಗ್ರಹಿಸುತ್ತದೆ. ಸರಳವಾಗಿ ಉದ್ಯಮ ಆರಂಭಿಸಿದ ಚಂದ್ರಮೊಗನ್ ಇಂದು ತಮ್ಮ ಸಂಸ್ಥೆಯನ್ನು 18,889 ಕೋಟಿ ರೂ ಮೌಲ್ಯದ ಸಂಸ್ಥೆಯನ್ನಾಗಿ ರೂಪಿಸಿದ್ದಾರೆ.

ಫೋರ್ಬ್ಸ್ ಶ್ರೀಮಂತ ಪಟ್ಟಿಯ ಪ್ರಕಾರ RG ಚಂದ್ರಮೊಗನ್ ಇಂದು ರೂ 13,000 ಕೋಟಿ ($ 1.7 ಬಿಲಿಯನ್) ನಿವ್ವಳ ಮೌಲ್ಯವನ್ನು ಹೊಂದಿದ್ದಾರೆ. ಅವರ ಕಂಪನಿಯ ಡೈರಿ ಉತ್ಪನ್ನಗಳನ್ನು 42 ದೇಶಗಳಲ್ಲಿ ಬಳಸಲಾಗುತ್ತದೆ. ಚಂದ್ರಮೊಗನ್ ಸಂಸ್ಥೆಯ ಅಧ್ಯಕ್ಷರಾಗಿದ್ದರೆ ಅವರ ಮಗ ಸಿ ಸತ್ಯನ್ ಇದೀಗ ಹ್ಯಾಟ್ಸನ್ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕರಾಗಿ ಕೆಲಸ ಮಾಡುತ್ತಿದ್ದಾರೆ.