Lottery Tax Rules: ಬರೋಬ್ಬರಿ 1 ಕೋಟಿ ರೂಪಾಯಿ ಲಾಟರಿ ಗೆದ್ರೆ, ಎಷ್ಟು ಲಕ್ಷ ತೆರಿಗೆ ಕಟ್ ಆಗುತ್ತೆ ಗೊತ್ತೇ?

ನೀವು ಯಾವುದೇ ಸ್ಪರ್ಧೆ, ಲಾಟರಿ, ಆನ್ ಲೈನ್ ಗೇಮಿಂಗ್ ಅಥವಾ ಟಿವಿ ಶೋಗಳಲ್ಲಿ ಬಹುಮಾನದ ಹಣವನ್ನು ಗೆದ್ದರೆ ಅದು ತೆರಿಗೆ ಕಡಿತಕ್ಕೆ ಒಳಪಟ್ಟಿರುತ್ತದೆ. ಯಾವುದೇ ಬಹುಮಾನ ಅಥವಾ ಲಾಟರಿ ಮೊತ್ತವನ್ನು ಪಾವತಿಸುವ ಸಂಸ್ಥೆಯು ಮೂಲದಲ್ಲಿ ತೆರಿಗೆಯನ್ನು ಕಡಿತಗೊಳಿಸುತ್ತದೆ. ಟ್ಯಾಕ್ಸ್ ಕಡಿತಗೊಳಿಸಿದ ನಂತರ ಬಹುಮಾನದ ಮೊತ್ತವನ್ನು ನಿಮಗೆ ನೀಡಲಾಗುತ್ತದೆ.

ಪ್ರತಿಯೊಬ್ಬ ವ್ಯಕ್ತಿ ಅಥವಾ ಸಂಸ್ಥೆಯ ಆದಾಯದ ಮೇಲೆ ಭಾರತ ಸರ್ಕಾರವು ತೆರಿಗೆ ವಿಧಿಸುತ್ತದೆ. ಆದಾಯ ತೆರಿಗೆ ಕಾಯಿದೆ 1961 ಭಾರತದಲ್ಲಿ ಆದಾಯ ತೆರಿಗೆಗೆ ಸಂಬಂಧಿಸಿದ ನಿಬಂಧನೆಗಳನ್ನು ನಿಯಂತ್ರಿಸುತ್ತದೆ. ಆದಾಯ ತೆರಿಗೆ ಪಾವತಿಸುವುದು ನಾಗರಿಕರ ಸಾಂವಿಧಾನಿಕ ಕರ್ತವ್ಯ.

ಭಾರತೀಯ ಆದಾಯ ತೆರಿಗೆ ಕಾಯಿದೆ, 1961 ರ ಸೆಕ್ಷನ್ 194B ಅಡಿಯಲ್ಲಿ TDS ಅನ್ನು ಲಾಟರಿಗಳು, ಕಾರ್ಡ್ ಆಟಗಳು, ಟಿವಿ ಕಾರ್ಯಕ್ರಮಗಳು ಇತರ ಆಟಗಳಿಂದ ಗೆದ್ದ ಹಣದ ಮೇಲೆ ವಿಧಿಸಲಾಗುತ್ತದೆ. ವಿಜೇತರಿಗೆ ಪಾವತಿ ಮಾಡುವ ಮೊದಲು TDS ಅನ್ನು ಕಡಿತಗೊಳಿಸಬೇಕಾಗುತ್ತದೆ. 10,000 ಸಾವಿರಕ್ಕಿಂತ ಹೆಚ್ಚಿನ ಬಹುಮಾನದ ಮೇಲೆ 30% TDS ಕಡಿತಗೊಳಿಸಲಾಗುತ್ತದೆ. ಹೆಚ್ಚುವರಿ ಶುಲ್ಕ ಮತ್ತು ಸೆಸ್ ಸೇರಿಸಿದ ನಂತರ TDS 31.2% ಕ್ಕೆ ಏರುತ್ತದೆ.

ದಂಡ ಮತ್ತು ಇತರ ಕಾನೂನು ಕ್ರಮಗಳನ್ನು ತಪ್ಪಿಸಲು ಲಾಟರಿ ಅಥವಾ ಬಹುಮಾನದಲ್ಲಿ ಗೆದ್ದ ಮೊತ್ತದ ಮೇಲೆ ತೆರಿಗೆ ಪಾವತಿಸುವುದು ಬಹಳ ಮುಖ್ಯ. ಬಾಕಿ ಇರುವ ತೆರಿಗೆಯನ್ನು ಪಾವತಿಸಬೇಕು. ಈ ನಿಟ್ಟಿನಲ್ಲಿ ನೀವು ಅರ್ಹ ತೆರಿಗೆ ವೃತ್ತಿಪರರನ್ನು ಸಂಪರ್ಕಿಸಬಹುದು.

ಆದಾಯ ತೆರಿಗೆ ಸಂಗ್ರಹಿಸಲು ಸರ್ಕಾರವು 3 ವಿಧಾನಗಳನ್ನು ಬಳಸುತ್ತದೆ. ಮೊದಲನೆಯದಾಗಿ ಪಾವತಿಸುವವರ ಆದಾಯದ ಮೂಲದಲ್ಲಿ ತೆರಿಗೆ ಕಡಿತಗೊಳಿಸಲಾಗಿದೆ (TDS). ಮೂಲದಲ್ಲಿ ಸಂಗ್ರಹಿಸಲಾದ ತೆರಿಗೆ (TCS) ಮತ್ತು ಮುಂಗಡ ತೆರಿಗೆ ಮತ್ತು ಸ್ವಯಂ-ಮೌಲ್ಯಮಾಪನ ತೆರಿಗೆ ಅಂದರೆ ಬ್ಯಾಂಕ್ ಗಳಿಗೆ ತೆರಿಗೆದಾರರು ಮಾಡಿದ ಸ್ವಯಂಪ್ರೇರಿತ ಪಾವತಿಗಳನ್ನು ಒಳಗೊಂಡಿದೆ.

ಇತ್ತೀಚೆಗೆ ಮಧ್ಯಪ್ರದೇಶದ ನಿವಾಸಿ ಶಹಾಬುದ್ದೀನ್ ಕೋಲ್ಕತ್ತಾ ಮತ್ತು ಪಂಜಾಬ್ ನಡುವಿನ ಐಪಿಎಲ್ ಪಂದ್ಯದ ಆನ್ ಲೈನ್ ಗೇಮಿಂಗ್ ಅಪ್ಲಿಕೇಶನ್ ನಲ್ಲಿ ಕೇವಲ 49 ರೂ. ಹೂಡಿಕೆ ಮಾಡಿ 1.5 ಕೋಟಿ ರೂಪಾಯಿ ಬಹುಮಾನವನ್ನು ಗೆದ್ದಿದ್ದಾರೆ. ತೆರಿಗೆ ಕಡಿತಗೊಳಿಸಿದ ಬಳಿಕವೇ ಹಣವನ್ನು ಇವರಿಗೆ ನೀಡಲಾಗುತ್ತೆ.

ದೇಶ-ವಿದೇಶಗಳಲ್ಲಿ ಸಾವಿರಾರು ಜನರು ಲಾಟರಿ, ಆನ್ ಲೈನ್ ಗೇಮಿಂಗ್ ಮತ್ತು ಟಿವಿ ಶೋಗಳಲ್ಲಿ ಭಾಗವಹಿಸುವ ಮೂಲಕ ಕೋಟ್ಯಂತರ ರೂಪಾಯಿಗಳನ್ನು ಗೆದ್ದಿದ್ದಾರೆ. ಆದರೆ ಗೆಲುವಿನ ಪ್ರಮಾಣಕ್ಕಿಂತ ಸೋಲಿನ ಪ್ರಮಾಣವೇ ಇವುಗಳನ್ನು ಹೆಚ್ಚು. ಸಾಲದಕ್ಕೆ ಲಾಟರಿ ಒಂದು ಚಟ ಆಗುವ ಸಾಧ್ಯತೆಯಿದ್ದು, ಇದನ್ನು ಪ್ರೋತ್ಸಾಹಿಸಲಾಗುವುದಿಲ್ಲ.