Cheap Cars: ಈ ಅಗ್ಗದ ಕಾರುಗಳು ಮುಂದೆ ಆ್ಯಂಟಿಕ್‌ ಪೀಸ್ ಆಗಬಹುದು: ಭಾರೀ ಹಣ ಗಳಿಸುವ ಅವಕಾಶ!

ಭಾರತ ವಾಹನ ಮಾರುಕಟ್ಟೆ ದಿನದಿಂದ ದಿನಕ್ಕೆ ಬೆಳೆಯುತ್ತಿದ್ದು, ಮಾರುಕಟ್ಟೆಗೆ ಪ್ರತೀ ವರ್ಷವೂ ಭಿನ್ನ-ವಿಭಿನ್ನ ಮಾಡೆಲ್‌ಗಳು ಬಿಡುಗಡೆ ಆಗುತ್ತಲೇ ಇರುತ್ತವೆ. ನಾವು ಕೊಳ್ಳುವ ಕಾರು ನಾಲ್ಕೈದು ವರ್ಷಕ್ಕೆ ಔಟ್​ಡೇಟೆಡ್ ಆಗಿಹೋಗುವಷ್ಟು ಹೊಸತನದ ಕಾರುಗಳು ಬರುತ್ತಿರುತ್ತವೆ. ಆದರೆ ಕೆಲ ಕಾರುಗಳಿವೆ, ಇವು ಕೊಳ್ಳಲು ಅಗ್ಗ ಮತ್ತು ಭವಿಷ್ಯದಲ್ಲಿ ಇವು ಒಂದು ರೀತಿಯ ಆ್ಯಂಟಿಕ್‌ ಪೀಸ್‌ ಕೂಡ ಆಗಬಹುದು.

ಭಾರತದಲ್ಲಿ ಕೆಲ ಕಾರುಗಳಿವೆ, ಇವುಗಳು ಮಾರುಕಟ್ಟೆಗೆ ಬಂದೂ ಎಷ್ಟೇ ವರ್ಷವಾಗಿದ್ದರೂ ಇವುಗಳ ಖದರ್‌ ಮಾತ್ರ ಕಡಿಮೆಯಾಗಿಲ್ಲ. ಜನ ಇಂದಿಗೂ ಇವುಗಳನ್ನು ಕೊಳ್ಳಲು ಬಯಸುತ್ತಾರೆ. ಬೆಲೆ ಕೂಡ ಅಗ್ಗವಾಗಿರುವ ಈ ಕಾರುಗಳು ಕ್ಲಾಸಿಕ್‌ ಕಾರು ಅಂತಾನೇ ಪ್ರಸಿದ್ಧಿ ಪಡೆದಿವೆ.

ಮಾರುತಿ 800: ಫ್ಯಾಮಿಲಿ ಕಾರ್‌ ಅಂತಾನೇ ಪ್ರಸಿದ್ಧಿ ಪಡೆದಿರುವ ಮಾರುತಿ 800 ಕಾರುಗಳು ಇಂದಿಗೂ ಮಿಡಲ್‌ ಕ್ಲಾಸ್‌ ಕುಟುಂಬದ ಹಿಟ್‌ ಕಾರು. ಈ ಕಾರನ್ನು 1983 ರಿಂದ 2014 ರವರೆಗೆ ಉತ್ಪಾದಿಸಲಾಯಿತು. ಈ ಸಣ್ಣ ಕಾರು ಅನೇಕ ಮಧ್ಯಮ ವರ್ಗದ ಭಾರತೀಯ ಕುಟುಂಬಗಳಿಗೆ ಕಾರನ್ನು ಹೊಂದುವ ಕನಸನ್ನು ನನಸು ಮಾಡಿದೆ.

ಈ ಜನಪ್ರಿಯ ಹ್ಯಾಚ್‌ಬ್ಯಾಕ್ ಈಗಲೂ ಉಪಯೋಗಿಸಿದ ಕಾರು ಮಾರುಕಟ್ಟೆಯಲ್ಲಿ ಮಾರಾಟಕ್ಕೆ ಲಭ್ಯವಿದೆ ಮತ್ತು ಮಾರುತಿಯಾಗಿರುವುದರಿಂದ ನೀವು ಅದನ್ನು ನಿರ್ವಹಿಸುವಲ್ಲಿ ಹೆಚ್ಚು ವೆಚ್ಚ ಮಾಡಬೇಕಿಲ್ಲ. ‌ಮಾರುತಿ 800 ಆಗಿನ ಪ್ರಸಿದ್ಧ ಕಾರು ಮತ್ತು ಇದು ಭವಿಷ್ಯದಲ್ಲೂ ಎಲ್ಲರ ಗಮನ ಸೆಳೆಯುವಲ್ಲಿ ಹಿಂದೆ ಬೀಳಲ್ಲ.

ಮಾರುತಿ ಓಮ್ನಿ: ಮಾರುತಿಯ, ಮಾರುತಿ ಓಮ್ನಿ ಶೀಘ್ರದಲ್ಲೇ ಭವಿಷ್ಯದ ಕ್ಲಾಸಿಕ್ ಎಂದು ಲೇಬಲ್ ಆಗಬಹುದು. ಒಂದು ಕಾಲದಲ್ಲಿ ಜನ ಕಾರುಗಳಿಗಿಂತ ಈ ಮಾರುತಿ ಓಮ್ನಿಯನ್ನೇ ಹೆಚ್ಚಾಗಿ ಖರೀದಿ ಮಾಡುತ್ತಿದ್ದರು. ಓಡಾಟಕ್ಕೆ ಅನುಕೂಲಕರವಾಗಿರುವ ಈ ಕಾರು ಆಗಿನ ಹಿಟ್‌ ಕಾರು. ಇದು ಮಾರುತಿಯಿಂದ ಎರಡನೇ ಮಾದರಿಯಾಗಿದೆ ಮತ್ತು 1984 ರಲ್ಲಿ ಬಿಡುಗಡೆಯಾಯಿತು.

ಈ ವ್ಯಾನ್ 2020 ರವರೆಗೆ ಉತ್ಪಾದನೆಯಲ್ಲಿತ್ತು. BS6 ಹೊರಸೂಸುವಿಕೆಯ ಮಾನದಂಡಗಳ ಕಾರಣದಿಂದಾಗಿ ಇದನ್ನು ನಿಲ್ಲಿಸಲಾಯಿತು. ಸೆಕೆಂಡ್‌ ಹ್ಯಾಂಡ್‌ ಕಾರುಗಳ ಪಟ್ಟಿಯಲ್ಲಿ ಮಾರುತಿ ಓಮ್ನಿ ವ್ಯಾನ್‌ನ ಹಲವಾರು ಉದಾಹರಣೆಗಳಿವೆ. ಈ ವ್ಯಾನ್‌ಗಳು ಅತ್ಯಂತ ಕಡಿಮೆ ಬೆಲೆಯಲ್ಲಿ ದೊರೆಯುತ್ತವೆ.

ಟಾಟಾ ನ್ಯಾನೋ: ಕಾರು ಮಾರುಕಟ್ಟೆಯಲ್ಲಿ ಹೊಸ ಕ್ರಾಂತಿಗೆ ಕಾರಣವಾದ ಟಾಟಾ ನ್ಯಾನೋ ಕಡಿಮೆ ಬೆಲೆಯಲ್ಲಿ ಕಾರು ಖರೀದಿ ಮಾಡುವವರ ಕನಸನ್ನು ನನಸು ಮಾಡಿದೆ.ಅಗ್ಗದ ಬೆಲೆಯ ಕಾರಣದಿಂದಾಗಿ ನಗರ ಬಳಕೆಗೆ ಇದು ತುಂಬಾ ಸೂಕ್ತವಾದ ಕಾರಾಗಿತ್ತು. ಸೆಕೆಂಡ್‌ ಹ್ಯಾಂಡ್‌ ಕಾರು ಮಾರುಕಟ್ಟೆಯಲ್ಲಿ ಟಾಟಾ ನ್ಯಾನೋಗೆ ಹೆಚ್ಚಿನ ಬೇಡಿಕೆ ಇದೆ. ನ್ಯಾನೋ ದ ಮೊದಲ ಆವೃತ್ತಿಗಳಲ್ಲಿ ಹೆಚ್ಚಿನ ವೈಶಿಷ್ಟ್ಯತೆಗಳು ಇರಲಿಲ್ಲ, ಆದರೆ ನಂತರ ಬಂದ ಕಾರುಗಳ ಮಾದರಿಗಳು ಪವರ್ ವಿಂಡೋಗಳು, ಪವರ್ ಸ್ಟೀರಿಂಗ್ ಮತ್ತು AMT ಗೇರ್‌ಬಾಕ್ಸ್‌ ಹೊಂದಿದ್ದವು.

ಹಿಂದೂಸ್ತಾನ್ ಮೋಟಾರ್ಸ್ ಅಂಬಾಸಿಡರ್: ಅಂಬಾಸಿಡರ್ ಕಾರು ಈಗ ಅದಾಗ್ಲೇ ಆಂಟಿಕ್‌ ಫೀಸ್‌ ಆಗಿ ಉಳಿದಿದೆ. ಈಗಲೂ ಜನ ಈ ಕಾರು ಅಂದರೆ ಖರೀದಿಗೆ ಮುಗಿಬೀಳ್ತಾರೆ. ಭವಿಷ್ಯದಲ್ಲಿ ಸಂಗ್ರಾಹಕರ ಕಾರು ಎಂದು ಎಲ್ಲರಿಗೂ ತಿಳಿದಿರುವ ಕಾರುಗಳಲ್ಲಿ ಇದೂ ಒಂದು. ಇದು ಭಾರತದ ವಾಹನ ಇತಿಹಾಸದಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ ಕಾರು. ಈ ಸೆಡಾನ್ ಅನ್ನು ರಾಜಕಾರಣಿಗಳು, ರಾಜತಾಂತ್ರಿಕರು ಬಳಸುತ್ತಿದ್ದರು ಮತ್ತು ಸಮಾಜದಲ್ಲಿ ಸ್ಥಾನಮಾನದ ಸಂಕೇತವಾಗಿ ಬಿಂಬಿಸಲಾಗಿದೆ.

ಹೋಂಡಾ ಸಿಟಿ ಟೈಪ್ 2: ಭಾರತದ ಅನೇಕ ಕಾರು ಪ್ರಿಯರ ನೆಚ್ಚಿನ ಕಾರು ಇದು. ಸೆಡಾನ್ ಮಾರುಕಟ್ಟೆಯಲ್ಲಿ ಅತ್ಯಂತ ವಿಶ್ವಾಸಾರ್ಹ ಸೆಡಾನ್‌ಗಳಲ್ಲಿ ಒಂದಾಗಿದೆ. ಇದು ವಿಭಿನ್ನ ಚಕ್ರಗಳೊಂದಿಗೆ ಬಂದಿತು ಮತ್ತು ಬೂಟ್‌ನಲ್ಲಿ VTEC ಬ್ಯಾಡ್ಜ್ ಅನ್ನು ಸಹ ಹೊಂದಿತ್ತು. ಇದು ಸಾಕಷ್ಟು ಮಾರ್ಪಾಡು ಸಾಮರ್ಥ್ಯವನ್ನು ಹೊಂದಿರುವ ಕಾರಾಗಿದ್ದು, ಕಡಿಮೆ ಬೆಲೆಗೆ ಮಾಲೀಕರು ಈ ಕಾರನ್ನು ಬಿಟ್ಟುಕೊಳ್ಳುವುದು ಸ್ವಲ್ಪ ಕಷ್ಟವೇ ಹೌದು.