RBI ರೆಪೊ ದರ ಏರಿಕೆಯಿಂದ ಹೂಡಿಕೆದಾರರಿಗೆ ಬಿಗ್ ಶಾಕ್: ಷೇರುಪೇಟೆಯಲ್ಲಿ ₹6.27 ಲಕ್ಷ ಕೋಟಿ ನಷ್ಟ

ಹಣದುಬ್ಬರ ನಿಯಂತ್ರಣಕ್ಕೆ ರಿಸರ್ವ್ ಬ್ಯಾಂಕ್ ಮಾಡಿರುವ ರೆಪೊ ದರ ಏರಿಕೆ ಘೋಷಣೆ ಷೇರುಪೇಟೆಯಲ್ಲಿ ಸಂಚಲನ ಮೂಡಿಸಿದೆ. ಹೂಡಿಕೆದಾರರು 6.27 ಲಕ್ಷ ಕೋಟಿ ರೂ.ಗಳನ್ನು ಕಳೆದುಕೊಂಡರು, ರಿಸರ್ವ್ ಬ್ಯಾಂಕ್ ರೆಪೊ ದರವನ್ನು 40 ಬೇಸಿಸ್ ಪಾಯಿಂಟ್ಗಳಷ್ಟು ಹೆಚ್ಚಿಸುವುದರೊಂದಿಗೆ ಎಲ್ಲಾ ರೀತಿಯ ಸಾಲಗಳು ದುಬಾರಿಯಾಗುತ್ತವೆ.

ರಿಸರ್ವ್ ಬ್ಯಾಂಕ್ ಘೋಷಣೆ ಬಳಿಕ ಸೆನ್ಸೆಕ್ಸ್ 1,306.96 ಅಥವಾ 2.29 ಶೇಕಡಾ ಕುಸಿದು 55,669.03 ಅಂಕಗಳಿಗೆ ತಲುಪಿದೆ. ಇದು ಕಳೆದ ಎರಡು ತಿಂಗಳಲ್ಲೇ ಕನಿಷ್ಠ ಮಟ್ಟವಾಗಿದೆ. ವಹಿವಾಟಿನ ಅವಧಿಯಲ್ಲಿ ಸೆನ್ಸೆಕ್ಸ್ 1,474.39 ಅಂಕಗಳ ಕುಸಿತ ಕಂಡಿದೆ.

ಮಾರುಕಟ್ಟೆ ಬಂಡವಾಳೀಕರಣದಲ್ಲಿ ಈ ತೀವ್ರ ಕುಸಿತದ ಪರಿಣಾಮವಾಗಿ, ಬಿಎಸ್ ಇಯಲ್ಲಿ ಪಟ್ಟಿ ಮಾಡಲಾದ ಕಂಪನಿಗಳ ಮಾರುಕಟ್ಟೆ ಬಂಡವಾಳೀಕರಣವುರೂ 6,27,359.72 ಕೋಟಿಗಳಷ್ಟು ಕುಸಿದು ₹2,59,60,852.44 ಕೋಟಿಗಳಿಗೆ ತಲುಪಿದೆ.

ಸೆನ್ಸೆಕ್ಸ್ ಕಂಪನಿಗಳಲ್ಲಿ ಬಜಾಜ್ ಫೈನಾನ್ಸ್ ಷೇರುಗಳು ಶೇಕಡಾ 4.29 ರಷ್ಟು ಕುಸಿದವು. ಟೈಟಾನ್, ಬಜಾಜ್ ಫಿನ್‌ಸರ್ವ್, ಇಂಡಸ್‌ಇಂಡ್ ಬ್ಯಾಂಕ್, ಎಚ್‌ಡಿಎಫ್‌ಸಿ ಬ್ಯಾಂಕ್, ಇಂಡಸ್ಟ್ರೀಸ್ ಮತ್ತು ಮಾರುತಿ ಷೇರುಗಳು ಸಹ ಕುಸಿದಿವೆ.

ಎನ್ ಎಸ್ ಇ ನಿಫ್ಟಿ 391.50 ಪಾಯಿಂಟ್ ಅಥವಾ 2.29 ರಷ್ಟು ಕುಸಿದು 16,677.60ರಲ್ಲಿ ಕೊನೆಗೊಂಡಿತು. ನಿಫ್ಟಿ ಬ್ಯಾಂಕ್ 899.20 ಅಂಕಗಳ ನಷ್ಟದೊಂದಿಗೆ 35,264.55ಕ್ಕೆ ಕೊನೆಗೊಂಡಿತು. ಬುಧವಾರ ಎನ್ ಎಸ್ ಇಯಲ್ಲಿ 2,454 ಷೇರುಗಳು ಕುಸಿದವು. 825 ಷೇರುಗಳು ಏರಿದವು. ಅಪೊಲೊ ಹಾಸ್ಪಿಟಲ್ಸ್, ಅದಾನಿ ಪೋರ್ಟ್ಸ್, ಹಿಂಡಾಲ್ಕೊ ಇಂಡಸ್ಟ್ರೀಸ್, ಬಜಾಜ್ ಫೈನಾನ್ಸ್ ಮತ್ತು ಬಜಾಜ್ ಫಿನ್ ಸರ್ವ್ ಹೆಚ್ಚು ನಷ್ಟ ಅನುಭವಿಸಿವೆ.

ಮುಂಬೈನಲ್ಲಿ ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಆರ್‌ಬಿಐ ಗವರ್ನರ್ ಶಕ್ತಿಕಾಂತ ದಾಸ್, ಹಣದುಬ್ಬರವನ್ನು ನಿಯಂತ್ರಿಸುವ ದೃಷ್ಟಿಯಿಂದ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಹೇಳಿದರು. ಭೌಗೋಳಿಕ ರಾಜಕೀಯ ಒತ್ತಡವು ಹಣದುಬ್ಬರವನ್ನು ಹೆಚ್ಚಿಸುತ್ತಿದೆ ಎಂದು ಅವರು ಹೇಳಿದರು, "ಜಾಗತಿಕ ಆರ್ಥಿಕ ಚೇತರಿಕೆಯು ವೇಗವನ್ನು ಕಳೆದುಕೊಳ್ಳುತ್ತಿದೆ" ಎಂದರು.

ಈಗ ರೆಪೊ ದರವು 4.40 ಶೇಕಡಾ ಮತ್ತು CRR ಶೇಕಡಾ 4.50 ರಷ್ಟಾಗಿದೆ. ರೆಪೋ ದರವು ಕೇಂದ್ರ ಬ್ಯಾಂಕ್ ವಾಣಿಜ್ಯ ಬ್ಯಾಂಕ್‌ಗಳಿಗೆ ಹಣವನ್ನು ನೀಡುವ ದರವಾಗಿದೆ. ಆದರೆ CRR ಎಂಬುದು ಬ್ಯಾಂಕ್‌ಗಳು ಕೇಂದ್ರ ಬ್ಯಾಂಕ್‌ನಲ್ಲಿ ಮೀಸಲುಗಳಾಗಿ ಠೇವಣಿ ಮಾಡಬೇಕಾದ ನಿರ್ದಿಷ್ಟ ಕನಿಷ್ಠ ಮೊತ್ತವಾಗಿದೆ.