UPI Payment: ಡಿಜಿಟಲ್ ಪೇಮೆಂಟ್​ ಹೆಚ್ಚಳ, ದೇಶದ ಜನರಿಗೆ ಮೋದಿ ಮೆಚ್ಚುಗೆ!

UPI ಕೈಯಲ್ಲಿ ಸ್ಮಾರ್ಟ್ ಫೋನ್ ಇರುವ ಪ್ರತಿಯೊಬ್ಬರಿಗೂ ಆನ್ ಲೈನ್ ಹಣದ ವಹಿವಾಟಿನ ಬಗ್ಗೆ ತಿಳಿದಿರುತ್ತದೆ. ಅಷ್ಟೇ ಅಲ್ಲ, ಯುಪಿಐ ಮೂಲಕ ಪಾವತಿಯನ್ನೂ ಮಾಡುತ್ತಾರೆ. ಹೆಚ್ಚಿನ ಜನರು ಹಣ ಬಳಸುವುದನ್ನೇ ನಿಲ್ಲಿಸಿದ್ದಾರೆ.

ಯುಪಿಐ (UPI) ಡಿಜಿಟಲ್ ಪಾವತಿ ವ್ಯವಸ್ಥೆಯ (Digital Payment System) ಜನಪ್ರಿಯತೆ ಮತ್ತು ಈ ಪಾವತಿ ವಿಧಾನವು ದೇಶದಲ್ಲಿ ಗಣನೀಯವಾಗಿ ಹೆಚ್ಚಳವಾಗಿರುವುದರ ಬಗ್ಗೆ ವ್ಯಕ್ತಿಯೊಬ್ಬರು ಟ್ವೀಟ್ ಮಾಡಿದ್ದರು.

ಈ ಟ್ವೀಟ್​ಗೆ ಇದೀಗ ಪ್ರಧಾನಿ ಮೋದಿ ಮೆಚ್ಚೆಗೆ ವ್ಯಕ್ತಪಡಿಸಿದ್ದಾರೆ.ಯುಪಿಐ ಪಾವತಿ (UPI Payment) ಹೆಚ್ಚಳದ ಬಗ್ಗೆ ಗಮನ ಸೆಳೆದಿರುವುದನ್ನು ಮೋದಿ ಶ್ಲಾಘಿಸಿದ್ದಾರೆ.

ಡಿಜಿಟಲ್​ ಪಾವತಿ ಹೆಚ್ಚಳಕ್ಕೆ ಉತ್ಸಾಹ ತೋರುತ್ತಿರುವ ದೇಶದ ಜನರನ್ನು ಅಭಿನಂದಿಸಿದ್ದಾರೆ. ‘ಯುಪಿಐಯ ಜನಪ್ರಿಯತೆಯ ಬಗ್ಗೆ ನೀವು ಗಮನ ಸೆಳೆದಿರುವುದನ್ನು ಇಷ್ಟಪಟ್ಟಿದ್ದೇನೆ. ಡಿಜಿಟಲ್ ಪಾವತಿ ವಿಧಾನವನ್ನು ಅಳವಡಿಸಿಕೊಂಡಿರುವ ನನ್ನೆಲ್ಲ ಭಾರತೀಯರನ್ನು ಶ್ಲಾಘಿಸುತ್ತೇನೆ. ಅವರು ತಂತ್ರಜ್ಞಾನ ಮತ್ತು ಆವಿಷ್ಕಾರಗಳನ್ನು ಗಮನಾರ್ಹವಾಗಿ ಸ್ವೀಕರಿಸಿದ್ದಾರೆ’ ಎಂದು ಮೋದಿ ಟ್ವೀಟ್ ಮಾಡಿದ್ದಾರೆ.

2016ರಲ್ಲಿ ಯುಪಿಐ ವಹಿವಾಟು 38 ಲಕ್ಷ ರೂ. ಇತ್ತು. 2022ರ ಡಿಸೆಂಬರ್​ನಲ್ಲಿ ಅದು 12.8 ಲಕ್ಷ ಕೋಟಿ ರೂ. ತಲುಪಿದೆ ಎಂದು ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ ಮತ್ತು ಆರ್​ಬಿಐ ದತ್ತಾಂಶಗಳನ್ನು ಉಲ್ಲೇಖಿಸಿ ‘ಟೆಸ್ಟ್​​ಬುಕ್ ಡಾಟ್ ಕಾಂ’ನ ವಿಶೇಷ ಯೋಜನೆಗಳ ವಿಭಾಗದ ಉಪಾಧ್ಯಕ್ಷ ರವಿಸುತಾಂಜನಿ ಎಂಬವರು ಟ್ವೀಟ್ ಮಾಡಿದ್ದರು.

2016ರ ನಂತರ ಪ್ರತಿ ವರ್ಷ ಯುಪಿಐ ವಹಿವಾಟು ಹೇಗೆ ಬೆಳವಣಿಗೆ ಕಂಡಿತು ಎಂಬ ದತ್ತಾಂಶಗಳುಳ್ಳ ಗ್ರಾಫ್​ ಅನ್ನೂ ಅವರು ಟ್ವೀಟ್ ಜತೆ ಲಗತ್ತಿಸಿದ್ದಾರೆ

ಕಳೆದ ಕ್ಯಾಲೆಂಡರ್ ವರ್ಷದಲ್ಲಿ 7,404 ಕೋಟಿ ಯುಪಿಐ ವಹಿವಾಟು ನಡೆದಿದ್ದು, ಈ ಮಾಧ್ಯಮದ ಮೂಲಕ 125 ಲಕ್ಷ ಕೋಟಿ ರೂ. ಪಾವತಿ ಮಾಡಲಾಗಿದೆ.

ಇದೊಂದು ನಂಬಲಸಾಧ್ಯವಾದ ಬೆಳವಣಿಗೆ ಎಂದು ಅವರು ಮತ್ತೊಂದು ಟ್ವೀಟ್​​ನಲ್ಲಿ ಉಲ್ಲೇಖಿಸಿದ್ದಾರೆ.