2000 Note Withdrawal: ಪೆಟ್ರೋಲ್​ ಬಂಕ್​ ಮಾಲೀಕರಿಗೆ ಶುರು ಟೆನ್ಶನ್​! ಕಾರಣ ಇದು

ಎಲ್ಲಿ ನೋಡಿದರೂ ಅಲ್ಲಿ 2000 ರೂಪಾಯಿ ನೋಟುಗಳ ಬ್ಯಾನ್​ ಬಗ್ಗೆಯದ್ದೇ ಮಾತು. ಇದರಿಂದ ಜನಸಾಮಾನ್ಯರಿಗೆ ಯಾವೆಲ್ಲಾ ತೊಂದರೆಯಾಗುತ್ತೆ ಅಂತ ಚರ್ಚೆಯಾಗುತ್ತಿದೆ. ಇಂದಿನಿಂದ ಬ್ಯಾಂಕ್​ಗಳಲ್ಲಿ ನೀವು 2000 ರೂಪಾಯಿ ನೋಟುಗಳನ್ನು ಬದಲಾಯಿಸಿಕೊಳ್ಳಬಹುದು.

ಇತ್ತ ಸ್ವಿಗ್ಗಿ ಮತ್ತು ಜೊಮ್ಯಾಟೋನಲ್ಲಿ ಆರ್ಡರ್ ಮಾಡುವವರು ಆನ್​ಲೈನ್​ ಪೇಮೆಂಟ್ ಮಾಡದೇ, ಕ್ಯಾಶ್​ ಆನ್​ ಡೆಲಿವರಿ ಆಪ್ಷನ್​ ಸೆಲೆಕ್ಟ್​ ಮಾಡ್ತಾ ಇದ್ದಾರಂತೆ. ಇನ್ನೂ ಕೆಲವರಂತೂ ಸುದ್ದಿ ತಿಳಿದ ಕೂಡಲೇ ಪೆಟ್ರೋಲ್​ ಬಂಕ್​ನತ್ತ ಓಡಿದ್ದಾರೆ.

ಹೌದು, 2000 ಸಾವಿರ ನೋಟನ್ನು ಚಿಲ್ಲರೆ ಮಾಡಿಸಲು ಜನರು ಪೆಟ್ರೋಲ್​ ಬಂಕ್​ಗೆ ಹೆಚ್ಚಿನ ಸಂಖ್ಯೆಯಲ್ಲಿ ಬರ್ತಿದ್ದಾರಂತೆ. 100 ರೂಪಾಯಿ ಪೆಟ್ರೋಲ್​ ಹಾಕಿಸಿಕೊಂಡು 2 ಸಾವಿರ ರೂಪಾಯಿ ನೋಟು ನೀಡುತ್ತಿದ್ದಾರೆ.

ಮಧ್ಯಪ್ರದೇಶದ ಇಂದೋರ್‌ನಲ್ಲಿರುವ ಪೆಟ್ರೋಲ್ ಪಂಪ್‌ಗಳು ಗ್ರಾಹಕರಿಂದ ಇಂಧನ ಖರೀದಿಗೆ ಪಾವತಿಯಲ್ಲಿ ಐದು ಪಟ್ಟು ಹೆಚ್ಚಳ ಕಂಡಿದೆ. ಈ ಬಗ್ಗೆ ಸ್ವತಃ ಪೆಟ್ರೋಲ್ ಪಂಪ್ ಮಾಲೀಕರು ಹೇಳಿಕೊಂಡಿದ್ದಾರೆ.

ಹಿಂದೂಸ್ತಾನ್ ಟೈಮ್ಸ್ ಪ್ರಕಾರ ದೆಹಲಿ, ಉತ್ತರ ಪ್ರದೇಶ, ಹರಿಯಾಣ, ಜಾರ್ಖಂಡ್ ಮತ್ತು ಮಹಾರಾಷ್ಟ್ರದ ವಿತರಕರು ನಗದು ವಹಿವಾಟಿನಲ್ಲಿ ಹಠಾತ್ ಹೆಚ್ಚಳವನ್ನು ವರದಿ ಮಾಡಿದ್ದಾರೆ.

ಇನ್ನೂ ಉತ್ತರ ಪ್ರದೇಶದ ವಿವಿಧ ಭಾಗಗಳಲ್ಲಿ ಸಾಕಷ್ಟು ಪೆಟ್ರೋಲ್​ ಬಂಕ್​ಗಳಲ್ಲಿ ಸಾವಿರ ರೂಪಾಯಿಗಿಂತ ಹೆಚ್ಚಿನ ಪೆಟ್ರೋಲ್​ ಹಾಕಿಸಿದರೆ ಮಾತ್ರ 2 ಸಾವಿರ ರೂಪಾಯಿ ನೋಟುಗಳನ್ನು ಸ್ವೀಕರಿಸುವುದಾಗಿ ಬರೆದು ಅಂಟಿಸಿದ್ದಾರೆ.

ಸೆಪ್ಟೆಂಬರ್ 30 ರೊಳಗೆ 2,000 ರೂಪಾಯಿಗಳ ಹೆಚ್ಚಿನ ನೋಟುಗಳು ಖಜಾನೆಗೆ ಮರಳುವ ನಿರೀಕ್ಷೆಯಿದೆ. ವ್ಯವಸ್ಥೆಯಲ್ಲಿ ಈಗಾಗಲೇ ಸಾಕಷ್ಟು ಮುದ್ರಿತ ನೋಟುಗಳು ಲಭ್ಯವಿರುವುದರಿಂದ ಆತಂಕಪಡುವ ಅಗತ್ಯವಿಲ್ಲ ಎಂದು ಆರ್​​ಬಿಐ ಗವರ್ನರ್​ ಹೇಳಿದ್ದರು.

2,000 ನೋಟು ಚಲಾವಣೆಯಿಂದ ಹಿಂಪಡೆಯಲಾಗಿದೆ. ಆದರೆ ಇದು ಕಾನೂನುಬದ್ಧವಾಗಿ ಮುಂದುವರಿಯುತ್ತದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ಮೇ 19 ರಂದು ಹೇಳಿದೆ. ಸೆಪ್ಟೆಂಬರ್ 30 ರೊಳಗೆ ನೋಟುಗಳನ್ನು ಬದಲಾಯಿಸಲು ಅಥವಾ ಠೇವಣಿ ಮಾಡಲು ಜನರಿಗೆ ಸಲಹೆ ನೀಡಿದೆ.