ITR Filing: ಐಟಿಆರ್​ ಸಲ್ಲಿಸೋ ಗಡುವು ಮುಕ್ತಾಯ! ಕೊನೆಯ ದಿನ 68 ಲಕ್ಷ ಜನರಿಂದ ಫೈಲಿಂಗ್​

2021-22ರ ಆರ್ಥಿಕ ವರ್ಷದ ಆದಾಯ ತೆರಿಗೆ ಸಲ್ಲಿಸಲು ಜುಲೈ 31 ಕೊನೆಯ ದಿನವಾಗಿತ್ತು. ನಿನ್ನೆ ರಾತ್ರಿ 11 ಗಂಟೆಯವರೆಗೆ 67.97 ಲಕ್ಷ ಆದಾಯ ತೆರಿಗೆ ರಿಟರ್ನ್ಸ್ (ITR Filing) ಸಲ್ಲಿಕೆಯಾಗಿದೆ ಎಂದು ಆದಾಯ ತೆರಿಗೆ ಇಲಾಖೆ ತಿಳಿಸಿದೆ.

ಈಗಾಗಲೇ ಹಲವು ಬಾರಿ ಆದಾಯ ತೆರಿಗೆ ಪಾವತಿಗೆ ಕೊನೆಯ ದಿನಾಂಕವನ್ನು ವಿಸ್ತರಿಸಿದ್ದ ಕೇಂದ್ರ ಸರ್ಕಾರ ಈ ಬಾರಿ ಗಡುವನ್ನು ವಿಸ್ತರಿಸಿಲ್ಲ.ಈ ಹಿಂದಿನಿಂದಲೂ ವಿಸ್ತರಣೆ ಗಡುವನ್ನು ವಿಸ್ತರಿಸಲ್ಲ ಎಂದು ಹೇಳಿತ್ತು. ಅದರಂತೆ ಗಡುವು ವಿಸ್ತರಣೆಯಾಗಿಲ್ಲ.

ಭಾನುವಾರ ಸಲ್ಲಿಸಿದ ಆದಾಯ ತೆರಿಗೆ ರಿಟರ್ನ್ಸ್ ಅಂಕಿಅಂಶಗಳು ಹೀಗಿವೆ. ನಿನ್ನೆ ರಾತ್ರಿ 11 ಗಂಟೆಯವರೆಗೆ 67,97,067 ITRಗಳನ್ನು ಸಲ್ಲಿಸಲಾಗಿದೆ. ಕೊನೆಯ 1 ಗಂಟೆಯಲ್ಲಿ 4,50,013 ITRಗಳನ್ನು ಸಲ್ಲಿಸಲಾಗಿದೆ ಎಂದು ಆದಾಯ ತೆರಿಗೆ ಇಲಾಖೆ ಟ್ವೀಟ್ ಮಾಡಿದೆ.

ಐಟಿಆರ್ ಫೈಲಿಂಗ್ ಮಧ್ಯರಾತ್ರಿಯವರೆಗೆ ನಡೆದಿದೆ. ಕೊನೆಯ ದಿನ ಹಲವು ಜನರು ಆದಾಯ ತೆರಿಗೆ ಪಾವತಿಸುವ ವೇಳೆ ಸಾಕಷ್ಟು ತಾಂತ್ರಿಕ ಸಮಸ್ಯೆಗಳನ್ನು ಎದುರಿಸಿದರು.

ಜುಲೈ 30ರವರೆಗೆ ಒಟ್ಟಾರೆ 5.10 ಕೋಟಿ ಆದಾಯ ತೆರಿಗೆ ಪಾವತಿಯಾಗಿತ್ತು. ಭಾನುವಾರ ರಾತ್ರಿಯವರೆಗೂ ಆದಾಯ ತೆರಿಗೆ ಇಲಾಖೆಯಿಂದ ಸಹಾಯವಾಣಿ ಸಂಖ್ಯೆಯನ್ನು ನೀಡಲಾಗಿತ್ತು.

ನಿನ್ನೆಗೆ ಗಡುವು ಮುಗಿದಿರುವುದರಿಂದ ಇಂದಿನಿಂದ ಯಾರಾದರೂ ಆದಾಯ ತೆರಿಗೆ ಪಾವತಿಸಬೇಕಾದರೆ ದಂಡ ಪಾವತಿಸಬೇಕಾಗುತ್ತದೆ. ಕಳೆದ ಹಣಕಾಸು ವರ್ಷದಲ್ಲಿ (2020-21) ಸುಮಾರು 5.89 ಕೋಟಿ ITRಗಳನ್ನು ಸಲ್ಲಿಸಲಾಗಿತ್ತು.

ಮೌಲ್ಯಮಾಪನ ವರ್ಷದ ಡಿಸೆಂಬರ್ 31ರೊಳಗೆ 5 ಲಕ್ಷಕ್ಕಿಂತ ಹೆಚ್ಚು ವಾರ್ಷಿಕ ಆದಾಯ ಇರುವವರು ತಮ್ಮ ಐಟಿಆರ್ ಅನ್ನು ಸಲ್ಲಿಸದಿದ್ದರೆ 5,000 ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.

5 ಲಕ್ಷಕ್ಕಿಂತ ಕಡಿಮೆ ವಾರ್ಷಿಕ ಆದಾಯ ಹೊಂದಿರುವ ವ್ಯಕ್ತಿಗಳು ವಿಳಂಬವಾಗಿ ಆದಾಯ ತೆರಿಗೆ ಪಾವತಿಸಿದರೆ 1,000 ರೂ. ಶುಲ್ಕವನ್ನು ಪಾವತಿಸಬೇಕಾಗುತ್ತದೆ.