Infosys ಷೇರು ಹೊಂದಿರುವವರಿಗೆ ಬಿಗ್​ ಶಾಕ್!

ಐಟಿ ದಿಗ್ಗಜ ಇನ್ಫೋಸಿಸ್​ ಸಂಸ್ಥೆ ಮಾರ್ಚ್​ ತ್ರೈಮಾಸಿಕದಲ್ಲಿ ನೀರಸ ಪ್ರದರ್ಶನ ನೀಡಿದೆ. ಇದರಿಂದ ಕಂಪನಿಗೆ ಭಾರೀ ನಷ್ಟ ಉಂಟಾಗಿದೆ.ಪ್ರಮುಖ ಮಾರುಕಟ್ಟೆಗಳಾದ ಅಮೆರಿಕ ಮತ್ತು ಯುರೋಪ್‌ಗಳಲ್ಲಿನ ಬ್ಯಾಂಕಿಂಗ್ ಪ್ರಕ್ಷುಬ್ಧತೆಯ ಪರಿಣಾಮ ಆದಾಯದ ಗುರಿಯನ್ನೂ ಕಡಿತಗೊಳಿಸಿದೆ.

ಇಂದು ಇನ್ಫೋಸಿಸ್ ಲಿಮಿಟೆಡ್ ಷೇರುಗಳು ಸುಮಾರು ಶೇ. 15ರಷ್ಟು ಭಾರೀ ಕುಸಿತ ಕಂಡಿದ್ದು, ಪ್ರತಿಸ್ಪರ್ಧಿ ಕಂಪನಿಗಳ ಷೇರುಗಳೂ ಕುಸಿಯುವಂತೆ ಮಾಡಿದೆ.

ಇನ್ಫೋಸಿಸ್‌ ಮಾರ್ಚ್‌ನಲ್ಲಿ ತಜ್ಞರ ಅಂದಾಜಿಗಿಂತ ಕಡಿಮೆ ಲಾಭವನ್ನು ವರದಿ ಮಾಡಿದ ಹಿನ್ನೆಲೆಯಲ್ಲಿ ಈ ಕುಸಿತ ದಾಖಲಾಗಿದೆ. ನಿರ್ದಿಷ್ಟವಾಗಿ ಐಟಿ ವಲಯವು ಶೇ. 6ಕ್ಕಿಂತ ಹೆಚ್ಚು ಕುಸಿತ ಕಂಡಿದ್ದು, ಸೋಮವಾರ ಅತ್ಯಂತ ಕಳಪೆ ಕಾರ್ಯನಿರ್ವಹಣೆಯ ವಲಯಗಳಲ್ಲಿ ಒಂದಾಗಿದೆ.

ಮಾರ್ಚ್‌ನಲ್ಲಿ ಎರಡು ಮಧ್ಯಮ ಗಾತ್ರದ ಅಮೆರಿಕದ ಬ್ಯಾಂಕ್‌ಗಳು ಕುಸಿದಿರುವುದು ಆರ್ಥಿಕ ಪರಿಸರ ವ್ಯವಸ್ಥೆಯನ್ನು ಅಲುಗಾಡಿಸಿದೆ.

ಇನ್ಫೋಸಿಸ್ ಅಕ್ಟೋಬರ್ 2019ರ ಬಳಿಕ ಅತಿ ದೊಡ್ಡ ಇಂಟ್ರಾಡೇ ಕುಸಿತವನ್ನು ಸೋಮವಾರ ಕಂಡಿದ್ದು, ಇತರ ಐಟಿ ಷೇರುಗಳನ್ನೂ ಕುಸಿಯುವಂತೆ ಮಾಡಿದೆ. ಇದರಿಂದ ನಿಫ್ಟಿ ಐಟಿ ಸೂಚ್ಯಂಕವು ಶೇ. 7.6ರಷ್ಟು ಕುಸಿತ ಕಂಡಿದೆ.

ಬೆಳಿಗ್ಗೆ ಶೇ. 15ರಷ್ಟು ಕುಸಿದಿದ್ದ ಇನ್ಫೋಸಿಸ್‌ ಷೇರುಗಳು ಮಧ್ಯಾಹ್ನ 11.20ರ ಸುಮಾರಿಗೆ ಶೇ. 11.10 ಅಥವಾ 154.20 ರೂ. ಕುಸಿತ ಕಂಡು 1,259 ರೂ.ಗೆ ಇಳಿಕೆ ಕಂಡಿತ್ತು.

ಶುಕ್ರವಾರ ಡಾ. ಬಿ.ಆರ್‌. ಅಂಬೇಡ್ಕರ್ ಜಯಂತಿಯ ಪ್ರಯುಕ್ತ ಭಾರತೀಯ ‍ಷೇರು ವಿನಿಮಯ ಮಾರುಕಟ್ಟೆಗಳಿಗೆ ರಜಾದಿನವಾಗಿದ್ದರಿಂದ, ಇವೆಲ್ಲದರ ಮೊದಲ ಪ್ರತಿಕ್ರಿಯೆ ಇಂದು ಅಂದರೆ ಸೋಮವಾರ ಬೆಳಿಗ್ಗೆ ಕಂಡು ಬಂದಿದೆ.