Infosys: ಎಲ್ಲಾ ಕಂಪನಿಗಳು ಕೆಲಸ ಕಿತ್ತುಕೊಳ್ತಿದ್ರೆ, ಇನ್ಫೋಸಿಸ್​ ಮಾತ್ರ ಕೆಲಸ ಕೊಡ್ತಿದೆ! 6000 ಹೊಸಬರ ನೇಮಕ

ಇಡೀ ವಿಶ್ವದಲ್ಲೇ ಈಗ ಎಲ್ಲಾ ಕಂಪನಿಗಳು ತಮ್ಮ ಉದ್ಯೋಗಿಗಳನ್ನು ವಜಾ ಮಾಡುತ್ತಿವೆ. ಅದರಲ್ಲೂ ಟ್ವಿಟ್ಟರ್, ಫೇಸ್​ಬುಕ್​ ಸೇರಿದಂತೆ ದೊಡ್ಡ ದೊಡ್ಡ ಕಂಪನಿಗಳು ದೊಡ್ಡ ಮಟ್ಟದಲ್ಲಿ ಉದ್ಯೋಗಿಗಳನ್ನು ವಜಾ ಮಾಡಿದೆ.

ಈ ಸಂದರ್ಭದಲ್ಲಿ ಬೆಂಗಳೂರು ಮೂಲದ ಇನ್ಫೋಸಿಸ್​ ಮಾತ್ರ ಹೊಸಬರ ನೇಮಕ ಮಾಡಿಕೊಳ್ಳುವುದಲ್ಲಿ ದೊಡ್ಡ ಹೆಜ್ಜೆ ಇಡುತ್ತಿದೆ. 2022-2023ನೇ ಸಾಲಿನ ಮೂರನೇ ತ್ರೈಮಾಸಿಕದಲ್ಲಿ ಇನ್ಫೋಸಿಸ್​ 6000 ಮಂದಿ ಹೊಸಬರನ್ನು ನೇಮಕ ಮಾಡಿಕೊಂಡಿದೆ.

ಒಟ್ಟಾರೆಯಾಗಿ 23ನೇ ಹಣಕಾಸು ವರ್ಷದಲ್ಲಿ 50,000 ಮಂದಿಯ ನೇಮಕ ಮಾಡಿಕೊಳ್ಳುವ ಗುರಿಯನ್ನು ಕಂಪನಿ ಹಾಕಿಕೊಂಡಿತ್ತು. ಅದರತ್ತ ವೇಗ ಹೆಚ್ಚಿಸಿಕೊಂಡಿದೆ ಇನ್ಫೋಸಿಸ್​.

40,000 ಮಂದಿಯನ್ನು ವರ್ಷದ ಮೊದಲಾರ್ಧದಲ್ಲೇ ನೇಮಕ ಮಾಡಿಕೊಳ್ಳಲಾಗಿದೆ. ಕಂಪನಿಯು ತನ್ನ ವಾರ್ಷಿಕ ಗುರಿಯನ್ನು ಸಾಧಿಸುವತ್ತ ಸಾಗುತ್ತಿದೆ.

ಆದರೆ, ನೇಮಕಾತಿ ವಿಚಾರದಲ್ಲಿ ಗುರಿಯನ್ನು ಪರಿಷ್ಕರಣೆ ಮಾಡಿಲ್ಲ ಎಂದು ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿ ನೀಲಾಂಜನ್ ರಾಯ್ ತಿಳಿಸಿದ್ದಾರೆ.

ಇನ್ನೂ ಇನ್ಫೋಸಿಸ್ ನೇಮಕಾತಿ ಪ್ರಕ್ರಿಯ್ರೆಗಳು ಕೂಡ ಮುಂದುವರೆದಿದೆ. ಹಣಕಾಸು ವರ್ಷಾಂತ್ಯದ ಸಮಯಕ್ಕೆ ಇನ್ಪೋಸಿಸ್​ ಈ ಮೊದಲು ಹೇಳಿದಂತೆ 50000 ಮಂದಿ ಹೊಸಬರನ್ನು ನೇಮಕ ಮಾಡಿಕೊಳ್ಳಲಿದೆ.

ಕಂಪನಿಯಲ್ಲಿ ಹೊಸ ಉದ್ಯೋಗಿಗಳ ಸಂಖ್ಯೆ ಈಗ ಹೆಚ್ಚಿದ್ದು, ಮೈಸೂರಿನ ಕಚೇರಿಯಲ್ಲಿ ತರಬೇತಿ ಪಡೆಯುತ್ತಿದ್ದಾರೆ ಎಂದು ನೀಲಾಂಜನ್​ ರಾಯ್​ ತಿಳಿಸಿದ್ದಾರೆ.