Costly Mango: ಈ ಒಂದು ಮಾವಿನ ಹಣ್ಣಿನ ಬೆಲೆಗೆ ಹೊಸ ವಾಷಿಂಗ್ ಮೆಷಿನ್ ಬರುತ್ತೆ!

ಸದಾ ಮಂಜುಗಡ್ಡೆಯಿಂದ ಕೂಡಿದ ಜಪಾನ್‌ನ ಹೊಕ್ಕೈಡೊ ದ್ವೀಪದಲ್ಲಿರುವ ಒಟೊಫುಕ್‌ನಲ್ಲಿ ವಾಸಿಸುತ್ತಿರುವ ಹಿರೋಯುಕಿ ನಕಗಾವಾ ತನ್ನ ಜಮೀನಿನಲ್ಲಿ ಅತ್ಯಂತ ದುಬಾರಿ ಮತ್ತು ರುಚಿಯಾದ ಮಾವಿನ ಹಣ್ಣನ್ನು ಬೆಳೆಯುತ್ತಿದ್ದಾರೆ. ನಕಾಗಾವಾ ಅವರ ಮಾವಿನಹಣ್ಣು ಕುರಿತು ಮಾಹಿತಿ ಇಲ್ಲಿದೆ.

ನಕಗಾವಾ ಅವರು 2011 ರಿಂದ ಜಪಾನ್‌ನ ಉತ್ತರದ ದ್ವೀಪದ ಹಿಮಭರಿತ ಟೋಕಾಚಿ ಪ್ರದೇಶದಲ್ಲಿ ಮಾವಿನ ಹಣ್ಣುಗಳನ್ನು ಬೆಳೆಯುತ್ತಿದ್ದಾರೆ. ಅವರ ಮಾವಿನಹಣ್ಣುಗಳು ಪ್ರತಿ $230 (18,877 ರೂ) ರಂತೆ ಮಾರಾಟವಾಗುತ್ತವೆ. ಸುಸ್ಥಿರ ಕೃಷಿ ಪ್ರಯೋಗದಿಂದ ಅತ್ಯಂತ ದುಬಾರಿ ಮಾವಿನ ಹಣ್ಣುಗಳನ್ನು ಈ ರೈತ ಬೆಳೆಯುತ್ತಿದ್ದಾರೆ.

"ಮೊದಲಿಗೆ ಯಾರೂ ನನ್ನನ್ನು ಗಂಭೀರವಾಗಿ ಪರಿಗಣಿಸಲಿಲ್ಲ. ಇಲ್ಲಿ ಹೊಕ್ಕೈಡೋದಲ್ಲಿ, ನಾನು ನೈಸರ್ಗಿಕವಾಗಿ ಏನ್ನಾದರು ಸಾಧಿಸಬೇಕು ಎಂಬ ಗುರಿಯೊಂದಿಗೆ ನಾನು ಮಾವಿನ ಹಣ್ಣನ್ನು ಬೆಳೆಯಲು ಪ್ರಾರಂಭಿಸಿದೆ" ಎಂದು ಹಿಂದೆ ತೈಲ ಕಂಪನಿಯನ್ನು ನಡೆಸುತ್ತಿದ್ದ 62 ವರ್ಷದ ನಕಗಾವಾ ಹೇಳುತ್ತಾರೆ.

ಹಲವು ವರ್ಷಗಳ ನಂತರ ನಕಗಾವಾ ತೈಲ ಉದ್ಯಮವನ್ನು ಬಿಟ್ಟು, ನಕಗಾವಾ ಮಾವಿನ ಕೃಷಿ ಮಾಡಲು ಪ್ರಾರಂಭಿಸಿದರು. ಚಳಿಗಾಲದಲ್ಲಿ ಹಣ್ಣನ್ನು ಬೆಳೆಯುವುದು ಕಾರ್ಯಸಾಧ್ಯವೆಂದು ಪ್ರತಿಪಾದಿಸಿದ ಮಿಯಾಝಾಕಿಯ ದಕ್ಷಿಣ ಪ್ರಾಂತ್ಯದ ಮತ್ತೊಬ್ಬ ಮಾವು ರೈತನ ಮಾರ್ಗದರ್ಶನದಲ್ಲಿ, ನಕಗಾವಾ ತನ್ನ ಫಾರ್ಮ್ ಅನ್ನು ನಿರ್ಮಿಸಿದರು. ತನ್ನ ಸ್ಟಾರ್ಟ್ಅಪ್ ನೊರಾವರ್ಕ್ಸ್ ಜಪಾನ್ ಅನ್ನು ಸ್ಥಾಪಿಸಿದರು.

ಕೆಲವು ವರ್ಷಗಳ ನಂತರ ಅವರು ತಮ್ಮ ಮಾವಿನ ಬ್ರ್ಯಾಂಡ್ ಅನ್ನು ಹಕುಗಿನ್ ನೋ ತೈಯೊ ಎಂದು ಟ್ರೇಡ್‌ಮಾರ್ಕ್‌ನಲ್ಲಿ ಮಾರಲು ಪ್ರಾರಂಭಿಸಿದರು. ಕುಗಿನ್ ನೋ ತೈಯೊ ಎಂದರೆ ಸನ್ ಇನ್ ದಿ ಸ್ನೋ ಎಂದರ್ಥ.

ನಕಾಗಾವಾ ಅವರ ಈ ಯಶಸ್ಸಿನ ಕೃಷಿಗೆ ಹಿಮ ಮತ್ತು ಬಿಸಿನೀರಿನ ಬುಗ್ಗೆಗಳು ಕಾರಣ ಎನ್ನುತ್ತಾರೆ ದುಬಾರಿ ಮಾವಿನ ಹಣ್ಣಿನ ಬೆಳೆಗಾರ. ಅವರು ಚಳಿಗಾಲದಲ್ಲಿ ಹಿಮವನ್ನು ಸಂಗ್ರಹಿಸುತ್ತಾರೆ. ಬೇಸಿಗೆಯಲ್ಲಿ ತನ್ನ ಹಸಿರುಮನೆಗಳನ್ನು ತಂಪಾಗಿಸಲು ಬಳಸುತ್ತಾರೆ.

ಚಳಿಗಾಲದಲ್ಲಿ, ಅವರು ಸುಮಾರು 5,000 ಮಾವಿನಹಣ್ಣುಗಳನ್ನು ಕೊಯ್ಲು ಮಾಡುತ್ತಾರೆ, ಹಸಿರುಮನೆ ಬಿಸಿಯಾಗಿಡಲು ನೈಸರ್ಗಿಕ ಬಿಸಿನೀರಿನ ಬುಗ್ಗೆಗಳನ್ನು ಬಳಸುತ್ತಾರೆ.

ಈ ಪ್ರಕ್ರಿಯೆಯು ಚಳಿಯ ತಿಂಗಳಿನಲ್ಲಿ ನಡೆಯುವುದರಿಂದ ತಂಪಾದ ತಿಂಗಳುಗಳಲ್ಲಿ ಕೀಟಗಳು ಕಡಿಮೆ ಪ್ರಮಾಣದಲ್ಲಿ ಇರುತ್ತವೆ. ಇದರಿಂದಾಗಿ ಅವರು ಯಾವುದೇ ಕೀಟನಾಶಕಗಳನ್ನು ಬಳಸುವುದಿಲ್ಲ ಎಂದು ನಕಗಾವಾ ತಿಳಿಸಿದ್ದಾರೆ. ಹೊಕ್ಕೈಡೋದ ಕಡಿಮೆ ಆರ್ದ್ರತೆಯ ವಾತಾವರಣವು ಶಿಲೀಂಧ್ರವನ್ನು ತೆಗೆದುಹಾಕುವ ರಾಸಾಯನಿಕಗಳ ಅಗತ್ಯವನ್ನು ಕಡಿಮೆ ಮಾಡುತ್ತದೆ.

ವಿಶೇಷವಾಗಿ ಗ್ರಾಮೀಣ ಪ್ರದೇಶಗಳಲ್ಲಿ, ಜಪಾನ್ ಕಾರ್ಮಿಕರ ಕೊರತೆಯನ್ನು ಎದುರಿಸುತ್ತಿದ್ದು, ಚಳಿಗಾಲದಲ್ಲಿ ಕೊಯ್ಲು ಮಾಡುವಾಗ ಕಾರ್ಮಿಕರು ಲಭ್ಯವಿರುತ್ತಾರೆ ಎಂದು ನಕಗಾವಾ ತಿಳಿಸಿದ್ದಾರೆ. ಸುಸ್ಥಿರ ವಿಧಾನದಲ್ಲಿ ಹಣ್ಣಿಗೆ ಸಿಗುವ ವಿಶೇಷ ರುಚಿ ಹೆಚ್ಚುವರಿ ಬೋನಸ್​ನಂತೆ. ನಕಾಗಾವಾ ಅವರು ಸಾಮಾನ್ಯ ಮಾವಿನಹಣ್ಣುಗಳಿಗಿಂತ ಇವು ಹೆಚ್ಚು ಸಿಹಿಯಾಗಿರುತ್ತದೆ ಎಂದು ಹೇಳುತ್ತಾರೆ.

ಇದು ಸುಮಾರು 15 ಡಿಗ್ರಿ ಬ್ರಿಕ್ಸ್‌ನ ಹೆಚ್ಚಿನ ಸಕ್ಕರೆ ಅಂಶವನ್ನು ಹೊಂದಿದೆ. ಹಣ್ಣುಗಳು ಗಡುಸಾಗಿರದೇ ಬೆಣ್ಣೆಯಂತೆ ಮೃದುವಾಗಿರುತ್ತವೆ ಎಂದು ನಕಾಗಾವಾ ಹೇಳುತ್ತಾರೆ.

ಅವುಗಳನ್ನು ಹೇಗೆ ಉತ್ಪಾದಿಸಲಾಗುತ್ತದೆ ಎಂಬ ನವೀನತೆಯು ಗ್ರಾಹಕರು ಮತ್ತು ಚಿಲ್ಲರೆ ವ್ಯಾಪಾರಿಗಳ ಆಸಕ್ತಿಯನ್ನು ಕೆರಳಿಸಿದೆ. 2014 ರಲ್ಲಿ, ಇಸೆಟಾನ್ ಡಿಪಾರ್ಟ್ಮೆಂಟ್ ಸ್ಟೋರ್ ತನ್ನ ಮಾವಿನ ಹಣ್ಣನ್ನು ಟೋಕಿಯೊದಲ್ಲಿನ ಶಿಂಜುಕು ಅಂಗಡಿಯಲ್ಲಿ ಪ್ರದರ್ಶಿಸಿತು. ಅಲ್ಲಿ ಅವರ ಮಾವಿನಹಣ್ಣು ಸುಮಾರು ಕೆಜಿಗೆ 19 ಸಾವಿರಕ್ಕೆ ಮಾರಾಟವಾಯಿತು ಎಂದು ಮೂಲಗಳು ತಿಳಿಸಿವೆ.

ಭಾರತದಲ್ಲಿ ಮ್ಯಾಂಗೋ ಮಿಲ್ಕ್ ಶೇಕ್, ಮ್ಯಾಂಗೋ ಲಸ್ಸಿ ಹೀಗೆ ಅನೇಕ ಜನಪ್ರಿಯ ಖಾದ್ಯಗಳಿದೆ. ಬೇಸಿಗೆ ಕಾಲದಲ್ಲಿ ಮಾವಿನ ಹಣ್ಣಿನ ವಿಧವಿಧವಾದ ಭಕ್ಷ್ಯಗಳನ್ನು ಸವಿದು ಜನ ಆನಂದಿಸುತ್ತಾರೆ. ಸದ್ಯ ನಾವಿಂದು ಮಾವಿನ ಹಣ್ಣಿನಲ್ಲಿ ಮಾಡಬಹುದಾದ ಕೆಲ ರೆಸಿಪಿಗಳನ್ನು ಹೇಳಿಕೊಂಡುತ್ತೇವೆ.

ಏಷ್ಯಾದ ಅತ್ಯುತ್ತಮ ಲೇಡಿ ಶೆಫ್ ನಟ್ಸುಕೊ ಶೋಜಿ ಕೂಡ ರೆಸ್ಟೋರೆಂಟ್‌ಗಳಲ್ಲಿ ಮಾವಿನ ಕೇಕ್‌ಗಳನ್ನು ಮಾಡುವಾಗ ನಕಗಾವಾ ಅವರ ಹಣ್ಣನ್ನು ಬಳಸುತ್ತಾರೆ ಎಂದು ಹೇಳಿದ್ದಾರೆ. ಅವರು ಹಾಂಗ್ ಕಾಂಗ್‌ನಲ್ಲಿರುವ ಸಿಟಿ'ಸೂಪರ್‌ನಂತಹ ಉನ್ನತ-ಮಟ್ಟದ ಚಿಲ್ಲರೆ ವ್ಯಾಪಾರಿಗಳಿಗೆ ತಮ್ಮ ಮಾವಿನಹಣ್ಣುಗಳನ್ನು ಮಾರಾಟ ಮಾಡುತ್ತಾರೆ.

ನಕಾಗಾವಾ ಚಳಿಗಾಲದ ಕೃಷಿಯ ಹೆಚ್ಚು ಅನಿರೀಕ್ಷಿತ ಪ್ರಯೋಜನಗಳನ್ನು ಕಂಡುಹಿಡಿದಿದ್ದಾರೆ. ನಾವು ಕೀಟನಾಶಕಗಳನ್ನು ಬಳಸದ ಕಾರಣ, ಚಹಾ ಕಂಪನಿ ಲುಪಿಸಿಯಾ ನಮ್ಮ ಎಲೆಗಳಿಂದ ಮಾವಿನ ಚಹಾವನ್ನು ತಯಾರಿಸಲು ನನ್ನ ಬಳಿಗೆ ಬರುತ್ತಾರೆ ಎಂದು ನಕಾಗಾವಾ ಹೇಳಿದರು.

ಚಳಿಗಾಲದಲ್ಲಿ ಟೊಕಾಚಿಯನ್ನು ಹಣ್ಣಿನ ಉತ್ಪಾದನಾ ಕೇಂದ್ರವಾಗಿ ಪರಿವರ್ತಿಸಲು ಮತ್ತು ಸ್ಥಳೀಯ ಆರ್ಥಿಕತೆಗೆ ಉತ್ತೇಜನ ನೀಡಲು ಅದೇ ವಿಧಾನವನ್ನು ಬಳಸಿಕೊಂಡು ಇತರ ಉಷ್ಣವಲಯದ ಉತ್ಪನ್ನಗಳನ್ನು ಸಂಗ್ರಹಿಸುವ ಗುರಿಯನ್ನು ಅವರು ಹೊಂದಿದ್ದಾರೆ.