Income Tax: ಐಟಿ ಇಲಾಖೆಯಿಂದ ಮೇಲ್​ ಬಂದಿದ್ಯಾ? ರಿಫಂಡ್​ ಬೇಕು ಅಂದ್ರೆ 15 ದಿನದಲ್ಲಿ ಐಟಿಆರ್​ ದೃಢೀಕರಿಸಿ!

ನೀವು ಕಳೆದ ಹಣಕಾಸು ವರ್ಷದಲ್ಲಿ ಆದಾಯ ತೆರಿಗೆ ರಿಟರ್ನ್ (ITR) ಅನ್ನು ಸಲ್ಲಿಸಿದ್ದರೆ, ಅಂದರೆ, FY 2021-22 ಕ್ಕೆ ಆದಾಯ ತೆರಿಗೆ ಮರುಪಾವತಿಗಾಗಿ ಕ್ಲೈಮ್‌ ಮಾಡಿದ್ದರೆ ಅದನ್ನು ಖಚಿತಪಡಿಸುವ ಇಮೇಲ್ ನಿಮಗೆ ಲಭ್ಯವಾಗಲಿದೆ.

ನೀವು 15 ದಿನದ ಒಳಗೆ ಈ ದೃಢೀಕರಣ ಮಾಡಲು ಆದಾಯ ತೆರಿಗೆ ಇಲಾಖೆಯು ಹಲವಾರು ತೆರಿಗೆದಾರರಿಗೆ ಇಮೇಲ್ ಮೂಲಕ ತಿಳಿಸಿದೆ. ಆದಾಯ ತೆರಿಗೆ ಇಲಾಖೆಯು ಹಲವಾರು ಐಟಿಆರ್ ಫೈಲ್ ಮಾಡಿದವರಿಗೆ ಈ ಬಗ್ಗೆ ಇಮೇಲ್ ಮಾಡಿದೆ.

ಇಮೇಲ್ ಸ್ವೀಕರಿಸಿದ 15 ದಿನಗಳಲ್ಲಿ ದೃಢೀಕರಣವನ್ನು ಮಾಡಬೇಕ ಎಂದು ಹೇಳಿದೆ. ಈ 15 ದಿನಗಳ ಗಡುವಿನ ಒಳಗೆ ದೃಢೀಕರಣವನ್ನು ಮಾಡದಿದ್ದರೆ, ಏನಾಗುತ್ತದೆ ಎಂದು ಇಮೇಲ್‌ನಲ್ಲಿ ಉಲ್ಲೇಖ ಮಾಡಿಲ್ಲ. ಆದರೆ ದೃಢೀಕರಣ ಮಾಡದಿದ್ದರೆ ನೋಟಿಸ್ ಲಭ್ಯವಾಗಲಿದೆ ಎಂದು ಈ ಬಗ್ಗೆ ತಿಳಿದಿರುವ ಚಾರ್ಟಡ್ ಅಕೌಂಟೆಡ್‌ಗಳು ಹೇಳಿದ್ದಾರೆ.

ಆತ್ಮೀಯ ತೆರಿಗೆದಾರರೇ, ನೀವು XXXX ನಲ್ಲಿ ಸಲ್ಲಿಸಿರುವ AY-2022-23 ಗಾಗಿ AAXXXXXXAA ಗಾಗಿ ಆದಾಯ ತೆರಿಗೆ ರಿಟರ್ನ್‌ನಲ್ಲಿ ಮರುಪಾವತಿಯ ಕ್ಲೈಮ್ ಮಾಡಲಾಗಿದೆ ಎಂದು ಕಂಡುಬಂದಿದೆ. ನಿಮ್ಮ ಆದಾಯ ತೆರಿಗೆ ರಿಟರ್ನ್ ಅನ್ನು ಆದಾಯ ತೆರಿಗೆ ಇಲಾಖೆಯ ಅಪಾಯ ನಿರ್ವಹಣೆ ಪ್ರಕ್ರಿಯೆಯ ಅಡಿಯಲ್ಲಿ ಗುರುತಿಸಲಾಗಿದೆ. ಈ ಸಂದರ್ಭದಲ್ಲಿ, ರಿಟರ್ನ್‌ನಲ್ಲಿ ಈ ಕೆಳಗಿನ ಹಕ್ಕು(ಗಳು)/ಕಳೆಯುವಿಕೆ(ಗಳು)/ಲೋಪಗಳ ಕುರಿತು ನಿಮ್ಮ ದೃಢೀಕರಣದ ಅಗತ್ಯವಿದೆ ಎಂದು ಮೇಲ್​ ಬಂದಿದೆ.

ಒಮ್ಮೆ ನೀವು ಇಮೇಲ್ ಅನ್ನು ಸ್ವೀಕರಿಸಿದ ನಂತರ, ವೈಯಕ್ತಿಕ ತೆರಿಗೆದಾರರು ಹೊಸ ಇ-ಫೈಲಿಂಗ್ ಪೋರ್ಟಲ್‌ನಲ್ಲಿ ತಮ್ಮ ಖಾತೆಗೆ ಲಾಗಿನ್ ಆಗಿ ಐಟಿಆರ್ ದೃಢೀಕರಣ ಮಾಡಬೇಕಾಗುತ್ತದೆ.

ಮೊದಲು 'Pending Actions' ಟ್ಯಾಬ್ ಮೇಲೆ ಕ್ಲಿಕ್ ಮಾಡಿ 'Worklist' ಆಯ್ಕೆ ಮೇಲೆ ಕ್ಲಿಕ್ ಮಾಡಿ. ನಂತರ 'Response for Refund Confirmation' ಆಯ್ಕೆ ಮಾಡಿಕೊಳ್ಳಿ.

ನಿಮ್ಮ ಐಟಿಆರ್‌ನಲ್ಲಿ ನೀವು ನಮೂದಿಸಿರುವ ಮಾಹಿತಿಯು ಸರಿಯಾಗಿದ್ದರೆ, ತೆರಿಗೆದಾರರು ಎ ಅನ್ನು ಆಯ್ಕೆ ಮಾಡಿಕೊಳ್ಳಬಹುದು. ಐಟಿಆರ್‌ನಲ್ಲಿ ಪರಿಷ್ಕರಣೆ ಅಥವಾ ಬದಲಾವಣೆ ಮಾಡಲಿದ್ದರೆ ಬಿ ಅನ್ನು ಆಯ್ಕೆ ಮಾಡಿಕೊಳ್ಳಬಹುದು.