Pan Aadhaar Link ಮಾಡದಿದ್ರೆ ನಿಮ್ಮ ಬ್ಯಾಂಕ್​ ಖಾತೆಗಳು ಬ್ಲಾಕ್​, ಕೇಂದ್ರ ಕೊಟ್ಟ ಸ್ಪಷ್ಟನೆ ಇದು!

'ಪ್ಯಾನ್​ ಆಧಾರ್​ ಲಿಂಕ್​ ಮಾಡದಿದ್ರೆ ನಿಮ್ಮ ಖಾತೆಯನ್ನು ನಿರ್ಬಂಧಿಸಲಾಗುತ್ತದೆ'. ಕಳೆದ ಕೆಲವು ದಿನಗಳಿಂದ ಅನೇಕ ಜನರು ಇಂತಹ ಸಂದೇಶಗಳನ್ನು ಸ್ವೀಕರಿಸಿದ್ದಾರೆ. ಇದು ಸಂಪೂರ್ಣವಾಗಿ ನಕಲಿ. ಪ್ಯಾನ್ ನಂಬರ್ ಕೊಟ್ಟರೆ ಖಾತೆಯಿಂದ ಹಣ ತೆಗೆದು ವಂಚಿಸುತ್ತಾರೆ.

'ಆತ್ಮೀಯ ಗ್ರಾಹಕರೇ ಇಂದು ನಿಮ್ಮ ಬ್ಯಾಂಕ್ ಖಾತೆಯನ್ನು ನಿರ್ಬಂಧಿಸಲಾಗಿದೆ ದಯವಿಟ್ಟು ನಿಮ್ಮ ಪ್ಯಾನ್ ಕಾರ್ಡ್ ಅನ್ನು ನವೀಕರಿಸಿ' ಎಂದು ಸಂದೇಶವನ್ನು ಬರೆಯಲಾಗಿದೆ. ಸಂದೇಶದೊಂದಿಗೆ ಲಿಂಕ್ ಕೂಡ ಇದೆ. ಆ ಲಿಂಕ್ ಮೇಲೆ ಕ್ಲಿಕ್ ಮಾಡಿದರೆ ವಂಚಕರು ಎಲ್ಲವನ್ನೂ ಕದಿಯುತ್ತಾರೆ.

ಕಳೆದ 72 ಗಂಟೆಗಳಲ್ಲಿ ಖಾಸಗಿ ಬ್ಯಾಂಕ್‌ನ ಕನಿಷ್ಠ 40 ಗ್ರಾಹಕರು ಈ ರೀತಿ ಮೆಸೇಜ್ ಪಡೆದಿದ್ದಾರೆ. ಲಿಂಕ್ ಅನ್ನು ಕ್ಲಿಕ್ ಮಾಡಿದ ನಂತರ, ಖಾತೆಯಿಂದ ಹಣ ಕಣ್ಮರೆಯಾಗುತ್ತಿದೆ. ಇದು 'ಫಿಶಿಂಗ್', ನಕಲಿ ಇಮೇಲ್‌ಗಳು ಅಥವಾ SMS ಮೂಲಕ ವೈಯಕ್ತಿಕ ವಿವರಗಳು, ಬ್ಯಾಂಕ್ ಖಾತೆ ಸಂಖ್ಯೆಗಳು ಮತ್ತು ಸಂಬಂಧಿತ ಪಾಸ್‌ವರ್ಡ್‌ಗಳು, ಪಿನ್‌ಗಳು, OTP ಗಳು ಮುಂತಾದ ಸೂಕ್ಷ್ಮ ಮಾಹಿತಿಯನ್ನು ಹೊರತೆಗೆಯಲು ವಂಚಕರು ಬಳಸುವ ತಂತ್ರವಾಗಿದೆ.

ಮುಂಬೈನಲ್ಲಿ ಫೆಬ್ರವರಿ 27 ರಿಂದ ಮಾರ್ಚ್ 3 ರವರೆಗೆ ವಿವಿಧ ಪೊಲೀಸ್ ಠಾಣೆಗಳಲ್ಲಿ 40 ಎಫ್‌ಐಆರ್‌ಗಳನ್ನು ದಾಖಲಿಸಲಾಗಿದೆ. ಸೈಬರ್ ಪೊಲೀಸ್ ಠಾಣೆಯಲ್ಲಿ 10 ಎಫ್‌ಐಆರ್‌ಗಳು ದಾಖಲಾಗಿವೆ. ಮುಂಬೈ ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ.

ಶ್ವೇತಾ ಎಂಬ ಮಹಿಳೆಯಿಂದ ವಂಚಕರು 57,600 ರೂಪಾಯಿ ಎಗರಿಸಿದ್ದಾರೆ. ಈ ಕುರಿತು ಗುರುವಾರ ಬ್ಯಾಂಕ್ ಹಾಗೂ ಖಾರ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ. ಲಿಂಕ್ ಕ್ಲಿಕ್ ಮಾಡಿದ ನಂತರ ಎರಡು OTP ಗಳು ಬಂದವು ಎಂದು ಶ್ವೇತಾ ಹೇಳಿದರು. ಅವುಗಳನ್ನು ನೀಡಿದ ನಂತರ, ಪ್ಯಾನ್ ಕಾರ್ಡ್ ಸಂಖ್ಯೆ, ನೆಟ್ ಬ್ಯಾಂಕಿಂಗ್ ಐಡಿ ಮತ್ತು ಪಾಸ್‌ವರ್ಡ್‌ನೊಂದಿಗೆ ನಮೂದಿಸಿದ್ದರು. ಇದಾದ ಬಳಿಕ ಆಕೆಯ ಖಾತೆಯಲ್ಲಿದ್ದ ಹಣವೆಲ್ಲಾ ಮಾಯವಾಗಿತ್ತು.

ಕಾರ್ಡ್ ವಿವರಗಳು (ಸಂಖ್ಯೆ, ಪಿನ್)/OTP/CVV ಮುಂತಾದ ವೈಯಕ್ತಿಕ ಮತ್ತು ಗೌಪ್ಯ ಮಾಹಿತಿಯನ್ನು ಯಾರೊಂದಿಗೂ ಹಂಚಿಕೊಳ್ಳಬೇಡಿ. ಯಾವುದೇ ಲಿಂಕ್‌ಗಳನ್ನು ಓಪನ್ ಮಾಡ್ಬೇಡಿ. ಫೇಕ್​ SMS ಅನ್ನು ತಪ್ಪಿಸಬೇಕು. ಸಂದೇಹವಿದ್ದರೆ, ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಿ.