Shirdi Sai Baba ದೇವಸ್ಥಾನದಲ್ಲೀಗ ನಾಣ್ಯಗಳದ್ದೇ ಸದ್ದು! ಒಳಗೆ ಇಡೋಕಾಗದೇ, ಹೊರಗೆ ಕೊಡೋಕಾಗದೇ ಫಜೀತಿ!

ಶಿರಡಿ ಸಾಯಿ ಬಾಬಾ ದರ್ಶನ ಮಾಡುವವರ ಸಂಖ್ಯೆ ಹೆಚ್ಚು. ಒಮ್ಮೆಯಾದರೂ ಶಿರಡಿಗೆ ಭೇಟಿ ಕೊಟ್ಟು ಕೈಯಲ್ಲಿದ್ದ ಹಣ ದೇವರ ಹುಂಡಿಗೆ ಹಾಕಿ ಬಂದ್ರೆ ಅದೇನೋ ಒಂಥರ ನೆಮ್ಮದಿ ಅಂತಾರೆ ಭಕ್ತರು.

ಇನ್ನೂ ಸಾಯಿ ಬಾಬಾ ದೇಗುಲಕ್ಕೆ ಪ್ರತಿ ವರ್ಷ ಹೆಚ್ಚಿನ ಹಣ ದಾನದ ರೂಪದಲ್ಲಿ ಬರುತ್ತೆ. ಹುಂಡಿಯಲ್ಲಿರುವ ಹಣವನ್ನು ಪ್ರತಿ ವಾರಕ್ಕೊಮ್ಮೆ ತೆಗೆದು ಎಣಿಸಲಾಗುತ್ತೆ. ಪ್ರತಿ ವಾರಕ್ಕೆ 7 ಲಕ್ಷ ರೂಪಾಯಿ ನಾಣ್ಯಗಳು ಹುಂಡಿಯಲ್ಲಿ ಸಿಗುತ್ತೆ.

ಇದೇ ಈಗ ದೇವಸ್ಥಾನ ಟ್ರಸ್ಟ್​ಗೆ ತಲೆ ಬಿಸಿ ಹೆಚ್ಚಿಸಿದೆ. ಯಾಕಂದ್ರೆ ದೇಗುಲದಲ್ಲಿ ಸಂಗ್ರಹವಾಗ್ತಿರೋ ನಾಣ್ಯಗಳನ್ನು ಸ್ಟೋರಿ ಮಾಡಿಕೊಳ್ಳಲು ಬ್ಯಾಂಕ್​ಗಳು ಹಿಂದೇಟು ಹಾಕ್ತಿದ್ಯಂತೆ.

ಪ್ರತಿ ವರ್ಷ 3 ಕೋಟಿ ರೂಪಾಯಿಗಳಷ್ಟು ನಾಣ್ಯಗಳು ಇಲ್ಲಿ ಸಂಗ್ರಹವಾಗುತ್ತಿದೆ. ಹೀಗಾಗಿ ಅಷ್ಟು ನಾಣ್ಯಗಳನ್ನು ಒಂದು ಬ್ಯಾಂಕ್​ನಲ್ಲಿ ಜಮೆ ಮಾಡಿಕೊಳ್ಳಬಹುದು. ಇದೇ ರೀತಿ ಪ್ರತಿ ವರ್ಷ ಆಗುತ್ತಿರುವುದರಿಂದ ನಾಲ್ಕು ಬ್ಯಾಂಕ್​ಗಳು ಜಾಗವಿಲ್ಲ ಎಂದು ಹೇಳಿದ್ಯಂತೆ.

ಆದರೆ ಈಗ ಬ್ಯಾಂಕ್ ಗಳ ಬಳಿ ಈಗಾಗಲೇ ₹2 ಕೋಟಿ ಮೌಲ್ಯದ ನಾಣ್ಯಗಳಿರುವುದರಿಂದ ಬೃಹತ್ ನಾಣ್ಯಗಳ ನಿರ್ವಹಣೆ ಕಷ್ಟವಾಗಿದೆ ಎನ್ನುತ್ತಿವೆ.

ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವಂತೆ ಆರ್‌ಬಿಐಗೆ ಮನವಿ ಮಾಡಲಾಗಿದೆ ಎಂದೂ ಟ್ರಸ್ಟ್ ಹೇಳಿದೆ. ದೇಣಿಗೆಯಿಂದ ಬರುವ ಆದಾಯವನ್ನು ದೇವಸ್ಥಾನದ ಟ್ರಸ್ಟ್ ಖಾತೆಗಳನ್ನು ಹೊಂದಿರುವ 13 ರಾಷ್ಟ್ರೀಕೃತ ಬ್ಯಾಂಕ್‌ಗಳಲ್ಲಿ ಠೇವಣಿ ಇಡಲಾಗಿದೆ.

ನಾಣ್ಯಗಳ ತೂಕವು ಬ್ಯಾಂಕ್ ಕಟ್ಟಡಗಳಿಗೆ ಅಪಾಯವನ್ನುಂಟುಮಾಡುತ್ತದೆ. ನಾಣ್ಯಗಳ ಭಾರಕ್ಕೆ ಅದು ಕುಸಿಯಬಹುದು ಎಂದು ಬ್ಯಾಂಕುಗಳು ಭಯಪಡುತ್ತಿವೆಯಂತೆ.

ನಾಣ್ಯಗಳ ರಾಶಿಯನ್ನು ತೆಗೆಯುವಂತೆ ಬ್ಯಾಂಕ್‌ಗಳು ಮನವಿ ಮಾಡಿಕೊಂಡಿವೆ. ಆನ್‌ಲೈನ್ ವಹಿವಾಟಿನ ಹೆಚ್ಚಳದಿಂದ ನಾಣ್ಯಗಳ ಆಫ್‌ಟೇಕ್‌ಗಳು ಕಡಿಮೆಯಾಗಿದೆ.